ATGTİ-nin təşkilatçılığı və minlərlə gəncin iştirakı ilə “A+” adlı məzun şənliyi keçirilib
Bakı, 6 iyul, AZƏRTAC
Azərbaycan Respublikası Gənclər Fondu, Ağ Şəhərin dəstəyi və Azərbaycan Tələbə Gənclər Təşkilatları İttifaqının (ATGTİ) təşkilatçılığı ilə “A+” adlı məzun şənliyi keçirilib.
AZƏRTAC xəbər verir ki, şənlikdə Gənclər Fondunun nümayəndələri, ölkənin aparıcı Gənclər Təşkilatlarının sədrləri və 7000-dən çox tələbə gənc iştirak ediblər.
Şənliyin keçirilməsində əsas məqsəd bu il ali və orta ixtisas təhsil müəssisələrindən məzun olmuş tələbələri bir araya toplamaq, imtahanlardan sonra asudə vaxtlarının səmərəli keçirilməsini təmin etmək, onlar üçün stresdən kənar mühit formalaşdırmaq və şəbəkələşmə imkanı yaratmaq olub.
Məzun şənliyinin açılış mərasimində ATGTİ-nin sədri Pərviz Mirələmli çıxış edərək məzunları təbrik edib, onlara gələcək fəaliyyətlərində müvəffəqiyyətlər arzulayıb, həmçinin dövlət gənclər siyasəti, tələbələr üçün yaradılan imkanlardan danışıb. O, gənclərə daim istədikləri yerlərdə olmağı tövsiyə edib.
Gənclər Fondunun gənclər təşkilatları ilə iş şöbəsinin müdiri vəzifəsini icra edən Orduxan Qəhrəmanzadə çıxış edərək Gənclər Fondu tərəfindən gənclər üçün planlaşdırılan layihələrdən bəhs edib, məzunlarımızı bu fürsətlərdən faydalanmağa çağıraraq, onlara bundan sonrakı işlərində uğurlar diləyib.
Tədbirin rəsmi hissəsi yekunlaşdıqdan sonra bədii hissə başlayıb. Şənlik rəqs kompozisiyaları, müğənnilərin və dj musiqilərinin səsləndirilməsi ilə davam edib. Tələbələr üçün müxtəlif viktorinalar, yarışlar keçirilib və qalib gələn tələbələrə dəyərli hədiyyələr verilib.
Tədbir ATGTİ-nin fəaliyyətinə göstərdikləri töhfəyə görə məzun olmuş Tələbə Gənclər Təşkilatlarının Sədrləri İttifaqın sədri tərəfindən fəxri TGT məzunu mükafatları ilə təltif edilməsi ilə yekunlaşıb.
ATGTİ-nin İdarə Heyətinin üzvü Eyvaz Məhəmmədli AZƏRTAC-a müsahibəsində deyib: “Biz mütəmadi şəkildə gənclərimizin, tələbələrimizin asudə vaxtlarının səmərəli təşkili ilə bağlı tədbirlər keçiririk. Bugünkü tədbir də “A+” formatındadır. Tədris ilinin sonunda bəzi tələbələr məzun olub və digərləri imtahanlar veriblər. Burada tələbələrimizin əyləncəsini daha səmərəli keçirmək üçün müxtəlif intellektual yarışlar təşkil edirik”.
Tələbə İlqar Abbasov bildirib ki, şənlik zamanı məşhur müğənnilər səhnədə gənclər üçün çıxış edərək onları əyləndirirlər. Eyni zamanda, dördüncü kurslar məzun olmasını qeyd edir, digər tələbələr isə imtahanların stresini və gərginliyini üzərindən azaldırlar. Gənclərin asudə vaxtlarının səmərəli keçirilməsi üçün təşkil olunan bu tədbir dövlətimizin onlara göstərdiyi növbəti qayğının nəticəsidir. Biz birlikdə əylənib vaxt keçiririk. Mən daha çox pop və əyləncəli musiqiləri sevirəm. Təklif edərdim ki, gələcəkdə gənclər üçün təşkil olunan belə məzun şənliklərindən əvvəl Azərbaycan klassik musiqilərimiz də səslənsin, klassik rəqslərimiz nümayiş etdirilsin.
Tələbə Yeganə Abbasova isə qeyd edib: “Hazırda ATGTİ-nın təşkilatçılığı ilə keçirilən şənlikdə dəstək komandasının üzvüyəm. Şənlik çox maraqlıdır. Tələbələr, məzunlarımız burada vaxtlarını səmərəli keçirirlər”.
Bölmənin digər xəbərləri
