AVROPA İTTİFAQI GÜRCÜSTANDA HƏRBİ ƏMƏLİYYATLARIN GENİŞLƏNMƏSİNDƏN NARAHATDIR
AZƏRTAC-ın xüsusi müxbiri Yelisey sarayının mətbuat xidmətinə istinadla xəbər verir ki, Avropa İttifaqının (Aİ) sədri Gürcüstanda baş verən hadisələrlə əlaqədar bəyanat vermişdir.
Bəyanatda deyilir ki, Avropa İttifaqı Gürcüstanda hərbi əməliyyatların geniş miqyas almasından ciddi narahatdır və tərəflərdən tezliklə atəşkəsin əldə olunmasını tələb edir. Atəşkəs barədə Gürcüstanın təklifini alqışlayır və Rusiyanın da tezliklə buna razılıq verəcəyini gözləyir.
Aİ insan tələfatından, böyük dağıntılardan və qaçqınların sayının durmadan artmasından narahatlıq keçirdiyini, yurd-yuvalarından didərgin düşmüş insanlara humanitar yardım göstərməyə hazır olduğunu bildirir.
Münaqişə tərəflərindən əvvəlki vəziyyətə qayıtmağı, problemin həlli üçün tezliklə danışıqlar barədə öhdəliklərin yerinə yetirilməsini tələb edən Aİ, eyni zamanda, Gürcüstanın suverenliyini və ərazi bütövlüyünü tanıyır, Rusiyanı da buna hörmətlə yanaşmağa çağırır.
Bəyanatda o da vurğulanır ki, hərbi əməliyyatların genişlənməsi Rusiya ilə əlaqələrə mənfi təsir göstərə bilər.
Xatırladaq ki, iyulun 1-dən Avropa İttifaqına Fransa sədrlik edir.
Bölmənin digər xəbərləri
