Avropa İttifaqı startapların sürətli yaradılması üçün “EU Inc.” mexanizmini təqdim edib
Berlin, 18 mart, AZƏRTAC
Avropa Komissiyası startapların daha sürətli yaradılması və inkişafını təşviq etmək məqsədilə “EU Inc.” adlı yeni hüquqi mexanizmi təqdim edib.
AZƏRTAC xəbər verir ki, Komissiyanın Prezidenti Ursula Fon der Lyayen bununla bağlı Brüsseldə keçirilən təqdimatda yeni model çərçivəsində sahibkarların 48 saat ərzində tam rəqəmsal şəkildə və Avropa İttifaqının istənilən nöqtəsindən şirkət yarada biləcəklərini deyib. U.Lyayen Avropa İttifaqı məkanında sahibkarların vahid bazar əvəzinə 27 hüquqi sistem və 60-dan çox milli şirkət forması ilə üzləşdiklərini qeyd edərək yeni təşəbbüsün bu maneələri aradan qaldırmağa və investorlar üçün daha şəffaf mühit yaratmağa yönəldiyini bildirib .
“EU Inc.” sisteminə əsasən, sahibkarlar vahid onlayn platforma vasitəsilə maksimum 100 avro ödənişlə iki gün ərzində qeydiyyatdan keçə biləcəklər. Təqdim edilən məlumatlar avtomatik olaraq bütün 27 üzv dövlətin milli reyestrlərinə ötürüləcək və şirkətlər əlavə prosedurlara ehtiyac olmadan vergi və ƏDV nömrələri əldə edəcəklər.
Eyni zamanda, investisiya cəlbi, payların ötürülməsi və müflisləşmə prosedurlarının da tam rəqəmsal qaydada həyata keçirilməsi nəzərdə tutulur. Bu yanaşma startaplara innovativ ideyaları daha rahat sınaqdan keçirmək və fəaliyyətlərini çevik şəkildə inkişaf etdirmək imkanı verəcək.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
