AVROPA İTTİFAQI VƏ AZƏRBAYCAN ENERJİ TƏRƏFDAŞLIĞI BARƏDƏ RAZILIĞA GƏLDİLƏR
Avropa İttifaqı və Azərbaycan Aİ-nin enerji təhlükəsizliyinin möhkəmləndirilməsi və Azərbaycanın Avropa enerji bazarına çıxmasına imkan verilməsi üçün tərəfdaşlıq barədə razılığa gəlmişlər.
Aİ-nin enerji məsələləri üzrə komissarı Andris Pyebalqs demişdir: “Aİ üçün enerji daşıyıcılarının başlıca təchizatçısı və mühüm tranzit ölkə kimi Azərbaycanla yaxın əlaqələr enerji təhlükəsizliyinin möhkəmlənməsinə kömək edir”.
Sazişi Avropa Komissiyasının sədri Joze Manuel Barrozu və Azərbaycan Respublikasının Prezidenti İlham Əliyev imzalamışlar.
İlham Əliyev görüşdən sonra jurnalistlərə demişdir: “Bu, münasibətlərimizdə yeni eranın başlanğıcıdır”.
Azərbaycan Avropa İttifaqı ilə əlaqələri möhkəmləndirməklə təkcə öz iqtisadi inkişafına təkan verməyə deyil, həm də demokratik cəmiyyət qurmağa çalışır. Azərbaycan dövlətinin başçısı vurğulamışdır ki, “biz ümimu dəyərləri bölüşürük”.
Bununla əlaqədar qəzet xatırladır ki, hələ 2004-cü ildə Azərbaycan və Aİ iqtisadi əlaqələrə və siyasi əməkdaşlığa əsaslanan daha sıx münasibətlər yaradılması barədə razılığa gəlmişdilər. Yeni enerji sazişində energetika sahəsində Azərbaycan qanunvericiliyini Aİ-nin qaydalarına tədricən uyğunlaşdırmaq nəzərdə tutulur. Sənəddən daha bir əsas məqsəd enerji ehtiyatlarının təhlükəsiz göndərilməsini, Azərbaycandan və Xəzər hövzəsindən Avropa İttifaqının bazarına tranzitini təmin etməkdir. Bundan əlavə, Azərbaycan və Aİ enerji tələbatına dair ümumi siyasət hazırlamaq və energetika sahəsində təcrübə mübadiləsi aparmaq haqqında da razılığa gəlmişlər.
Britaniyanın enerji nəhəngi bp sentyabrda bildirmişdir ki, “Şahdəniz” qaz yatağında hasilata başlayır və bu, Avropanı əlavə yanacaq mənbəyi ilə təmin edəcəkdir. “Şahdəniz” layihəsinin əsas operatorları bp, “Statoyl” və ARDNŞ-dir. Xəzərdəki yataqdan çıxarılan qaz boru kəməri ilə Azərbaycan və Gürcüstan vasitəsilə Türkiyənin Ərzurum şəhərinə nəql olunacaq, burada boru kəməri Avropa şəbəkəsi ilə birləşdiriləcək və mavi yanacaq Yunanıstan və İtaliyaya göndəriləcəkdir.
Şərhdə deyilir ki, Avropanı enerji daşıyıcıları ilə təmin etmək üçün çəkilən bu boru kəməri Azərbaycanın və Gürcüstanın enerji bazarında Rusiyanın təsirini zəiflədən amil olmuşdur.
İlham Əliyev demişdir ki, Azərbaycan daha bir layihənin – Avropa İttifaqının enerji təhlükəsizliyini möhkəmlətməli olan Odessa-Brodı-Plotsk boru kəməri layihəsinin həyata keçirilməsində maraqlıdır. O xatırlatmışdır ki, bu məsələ Ukrayna Prezidenti Viktor Yuşşenko ilə müzakirə edilmişdir. Azərbaycanın layihədə iştirakının mümkünlüyünü öyrənmək üçün Azərbaycan-Ukrayna birgə işçi qrupu yaradılmışdır.
Azərbaycan Prezidenti demişdir: “Həmçinin razılığa gəlmişik ki, bizim iştirakımız təkcə neft göndərilməsi ilə məhdudlaşmayacaq, çünki Azərbaycan neftin emalında və neft məhsullarının satışında da iştirak etmək niyyətindədir”.
Prezident İlham Əliyev Aİ-nin layihəyə marağından danışarkən vurğulamışdır ki, bu amil problemin həlli üçün əlverişli şərait yaradır. O bildirmişdir ki, Azərbaycan gələcəkdə daha böyük həcmdə neft hasil edəcəkdir.
Qəzet öz şərhini Azərbaycan dövləti başçısının bu fikri ilə bitirir: “Neftin Avropa bazarlarına nəqli üçün alternativ marşrutların olması bizim üçün də böyük əhəmiyyət kəsb edir”.
Bölmənin digər xəbərləri
