AVROPA ŞURASININ İNSAN HÜQUQLARI ÜZRƏ RƏHBƏR KOMİTƏSİNIN İCLASI KEÇİRİLMİŞDİR

07.04.2006 [13:54]
Çap et
A⁺ A^-

Azərbaycanın Avropa Şurası yanındakı daimi nümayəndəliyindən AZƏRTAC-ın xüsusi müxbirinə bildirmişlər ki, Strasburqda Avropa Şurasının İnsan Hüquqları üzrə Rəhbər Komitəsinin iclası keçirilmişdir.

İclasda Avropa Şurası Nazirlər Komitəsinin 114-cü toplantısında qəbul olunmuş sənədlərin həyata keçirilməsi, çoxmədəniyyətli cəmiyyətdə insan hüquqları, terrorizmlə mübarizədə insan hüquqlarının müdafiəsi, milli azlıqlar, komitənin gələcək fəaliyyətinə dair məruzənin hazırlanması ilə bağlı məsələlər müzakirə olunmuşdur.

Tədbirdə ölkəmizi Xarici İşlər Nazirliyinin Beynəlxalq Hüquq və Müqavilələr İdarəsinin rəisi Murad Nəcəfov təmsil etmişdir.

İclasda Avropa İnsan Hüquqları Konvensiyasının nəzarət sisteminə düzəlişlər barədə 14-cü protokolun Nazirlər Komitəsinin bu ilin may ayında keçirilməsi nəzərdə tutulmuş 116-cı iclasınadək ratifikasiya edilməsinin vacibliyini nəzərə alaraq, Avropa Şurasına üzv olan dövlətlərdə bununla bağlı vəziyyəti aydınlaşdırmaq üçün müvafiq tədbirlərin görülməsindən danışılmışdır.

Yığıncaqda 14-cü protokolun Avropa Şurasının 36 üzvü tərəfindən artıq ratifikasiya edildiyi, 10 dövlətin bu məsələnin həllində yubandığı qeyd edilmişdir.

Murad Nəcəfov bu protokolun Azərbaycan Respublikasının Milli Məclisi tərəfindən artıq ratifikasiya edildiyini iştirakçıların diqqətinə çatdırmışdır.

Protokol qalan ölkələr tərəfindən ratifikasiya edildikdən sonra qüvvəyə minəcəkdir.