AVROPA TRENİNQ FONDUNUN ƏMƏKDAŞLARI BAKIDA SƏFƏRDƏ OLMUŞLAR
İqtisadi İnkişaf Nazirliyinin İqtisadi İslahatlar Elmi-Tədqiqat İnstitutu və Avropa Treninq Fondunun (ATF) birgə təşkilatçılığı ilə “Qara dəniz hövzəsi ölkələrinin əmək bazarlarının tədqiqi - Azərbaycan” layihəsi çərçivəsində Fondun əməliyyat departamentinin əməkdaşları Eduarda Castel-Branco və Ummuhan Bardak Bakıda səfərdə olmuşlar.
Nazirliyin mətbuat xidmətindən AZƏRTAC-a bildirmişlər ki, səfər çərçivəsində ATF əməkdaşları ilə İqtisadi İslahatlar Elmi-Tədqiqat İnstitutunda görüş keçirilmişdir. Görüşdə Azərbaycanda əmək bazarlarının vəziyyəti, problemlər və perspektivlər müzakirə olunmuş, “Qara dəniz hövzəsi ölkələrinin əmək bazarlarının tədqiqi - Azərbaycan” layihəsinin icra vəziyyəti ilə bağlı fikir mübadiləsi aparılmışdır.
İnstitutun direktoru Namiq Tağıyev Azərbaycanda əmək bazarının vəziyyəti və layihə çərçivəsində görülən işlərlə bağlı qonaqlara məlumat vermişdir. Qeyd olunmuşdur ki, Azərbaycan üzrə ilk hərtərəfli tədqiqat layihəsi olan “Qara dəniz hövzəsi ölkələrinin əmək bazarlarının tədqiqi - Azərbaycan” layihəsinin məqsədi ölkədə demoqrafik vəziyyətin, məşğulluq və işsizliyin, insan kapitalının vəziyyətini, təhsilin ÜDM-də və adambaşına düşən gəlirdə rolunun, əmək miqrasiyası və əmək bazarları üzrə iqtisadi-siyasi çərçivənin təhlilini aparmaqdır.
Azərbaycanda əmək bazarının real vəziyyəti, həmçinin bu istiqamət üzrə görülən işlərlə yaxından tanış olmaq üçün Fondun əməkdaşları İqtisadi İnkişaf, Əmək və Əhalinin Sosial Müdafiəsi, Təhsil nazirliklərində, Dövlət Statistika Komitəsində, Əmək və Sosial Problemlər üzrə Elmi-Tədqiqat İnstitutu və Tədris Mərkəzində, Azərbaycan Respublikası Sahibkarlar (İşəgötürənlər) Təşkilatları Milli Konfederasiyasında, Beynəlxalq Əmək Təşkilatı, TUSİAB, Dünya Bankı, UNDP, GTZ və digər qurumların yerli ofislərində də görüşlər keçirmişlər.
Xatırladaq ki, “Qara dəniz hövzəsi ölkələrinin əmək bazarlarının tədqiqi” layihəsi Qara dəniz regionunun beş ölkəsini - Azərbaycan, Moldova, Ermənistan, Gürcüstan, Ukrayna və Tacikistanı əhatə edir. Layihənin məqsədi milli mütəxəssislərin iştirakı ilə lazımi iqtisadi və statistik məlumatları toplamaq, onların təhlilini təşkil etmək, ölkələr üzrə tədqiqat hesabatlarını hazırlamaq və əmək bazarlarının müqayisəli təhlilini aparmaqdır.
Bölmənin digər xəbərləri
