AVROPADA YAŞAYAN ERMƏNİLƏRTÜRKİYƏNİN AVROPA BİRLİYİNƏ ÜZV OLMASINA MANE OLMAQ İSTƏYİRLƏR
Sentyabrın 22-də Brüsseldə “Avropa Ermənilər Assambleyası” tərəfindən jurnalistlər üçün təşkil olunmuş mətbuat konfransında ermənilər “erməni soyqırımını” qəbul etmədiyi halda Türkiyənin Avropa Birliyi üzvlüyünə qəbul olunmaması üçün fəaliyyətə başlayacaqlarını bəyan etmişlər.
Həmin gün axşam Türkiyənin baş naziri Rəcəb Tayyib Ərdoğan da qısa işgüzar səfərlə Brüsselə yola düşmüşdür. Ankaranın Esenboğa hava limanında jurnalistlərin suallarına cavab verən baş nazir demişdir ki, səfər zamanı Avropa Birliyinin genişlənməsi üzrə komissiyanın sədri Günter Verhögen ilə görüş planlaşdırılmışdır. Görüşdə Avropa Birliyinin genişlənməsi üzrə komissiyanın Türkiyə ilə əlaqədar hazırlayacağı hesabat haqqında fikir mübadiləsi aparılacaqdır. Ərdoğan demişdir ki, Türkiyə söz verdiyi bütün öhdəlikləri yerinə yetirir və bu proses bundan sonra da davam edəcəkdir. O həmçinin bildirmişdir ki, məlum şərtlərdən başqa Avropa Birliyi Türkiyə qarşısında heç bir yeni tələb qoymamışdır.
