AVROPADAKI DAŞQINLARIN ƏSAS SƏBƏBLƏRİ HAQQINDA
Avropanın ekologiya ekspertləri insanın sənaye fəaliyyətinin nəticələrini qitədəki daşqınların əsas səbəbləri sırasında göstərirlər. Londonun “İndependent” qəzeti yazır ki, son hadisələr tullantı qazların təsiri və meşələrin qırılması nəticəsində başlanmış qlobal iqlim dəyişiklikləri ilə əlaqədar narahatlığı gücləndirir.
Qəzet nəzərə çarpdırır ki, alimlər gələcəkdə bu cür təbii fəlakətlərin qarşısını almaq üçün Kioto sazişlərinin ratifikasiya olunmasının zəruriliyi barədə dünya birliyinə, ilk növbədə, ABŞ-a xəbərdarlıq edirlər.
BMT-nin Ətraf Mühit Proqramının icraçı direktoru Klaus Tepfer Almaniyanın kütləvi informasiya vasitələrinə müsahibəsində bildirmişdir ki, Yer üzündə qlobal iqlim dəyişikliklərinin və Avropada insan tələfatına gətirib çıxaran təbii fəlakətlərin insanın fəaliyyəti ilə bağlı olduğuna indi heç bir şübhə yeri qalmır. O demişdir: “Biz bu hallarla (daşqınlarla) mübarizə üçün mümkün olan bütün işləri görməliyik və bu, ilk öncə, sənayecə inkişaf etmiş ölkələrin borcudur”. Ekoloqun fikrincə, vəziyyəti dəyişdirmək üçün təcili surətdə ümumdünya miqyasında enerji istehlakını azaltmaq və enerjinin bərpa mənbələrinin işlənib hazırlanmasını işini sürətləndirmək lazımdır.
Avropa ölkələrində daşqınların əsas səbəblərdən biri insanın dağıdıcı fəaliyyətidir. İTAR-TASS-ın verdiyi xəbərə görə, alimlər Almaniyanı, Avstriyanı, Çexiyanı, Mərkəzi və Şərqi Avropanın digər ölkələrini bürümüş təbii fəlakətin səbəblərini araşdıraraq, belə qənaətə gəlmişlər.
Si-En-En teleşirkətinin baş meteoroloqu Gilyermo Arduino demişdir: “Torpaq artıq lazımi miqdarda suyu hopdurmaq iqtidarında deyildir, çünki insanların ətraf mühitə laqeyd münasibəti nəticəsində meşələr getdikcə azalır”. Onun sözlərinə görə, insanın sənaye fəaliyyəti də qlobal istiləşməyə və yağıntıların səviyyəsinin artmasına gətirib çıxarır.
Mütəxəssislər bildirirlər ki, fəlakətlərin miqyasına El-Ninyo təbiət hadisəsi də təsir göstərir. Söhbət Sakit okeanda vaxtaşırı yaranan isti cərəyandan gedir. Bu cərəyan alimlərə indiyədək məlum olmayan səbəblərə görə bütün dünyanın iqliminə təsir göstərir. Arduino demişdir: “El-Ninyonun müşahidə edildiyi illərdə daşqınlar və digər dəhşətli təbii hadisələr daha çox baş verir”. Kiçik daşqınlar Avropanın müxtəlif hissələrində, əslində, hər il baş verir, lakin indikilər son 50-100 ildə ən güclü daşqınlardır.
Bölmənin digər xəbərləri
