Avstriya qastronomiya obyektlərini açmağa hazırlaşır
Vyana, 9 may, AZƏRTAC
Avstriyada koronavirus pandemiyası səbəbindən fəaliyyətini dayandıran qastronomiya obyektləri mayın 15-də qapılarını yenidən müştərilərin üzünə açacaq.
AZƏRTAC xəbər verir ki, Avstriya hökuməti hələ aprel ayında elan edilən bu planın qüvvədə qaldığını bildirib və detalları açıqlayıb. Plana əsasən, ölkədəki qastronomiya obyektləri axşam saat 11-dək müştərilərə xidmət göstərəcək və restoranın ərazisindən asılı olaraq müştəri sayı məhdudlaşacaq. Restoran işçiləri maska və şəffaf üz qoruyucularından istifadə öhdəliyi daşıyacaqlar. Bir masada əyləşən müştərinin sayı dörddən artıq olmayacaq və masalar arasında məsafə bir metr təşkil etməlidir.
Federal Kansler Sebastian Kurts bildirib ki, qastronomlara dəyən zərərin qarşısını mümkün qədər almaq üçün vergi yüngülləşdirmələri nəzərdə tutulur. Adətən daha gec saatlarda açıq olan obyektlər (diskoteka və barlar) üçün isə ayrıca yardım paketi hazırlanacaq.
Avstriyada əhalinin pandemiya ilə əlaqədar olduqca intizam nümayiş etdirməsi və sosial məsafə qaydalarına əməl etməsi qastronomiya obyektlərinin təkrar fəaliyyətinin nə dərəcədə uğurlu olacağını da sual altına alıb. Hesab edilir ki, əhali kafe və restoranlara üz tutmaq əvəzinə, insanların toplaşdığı məkanlardan uzaq olmağa çalışacaqlar. Bu isə onsuz da ağır vəziyyətdə olan qastronomların iqtisadi vəziyyətini daha da ağırlaşdıra bilər.
Elgün Niftəli
AZƏRTAC-ın xüsusi müxbiri
Vyana
Bölmənin digər xəbərləri
