AVTOMOBİL YOLLARININ VƏZİYYƏTİ YAXŞILAŞACAQDIR
“Azəraqrotikinti” - “Azərkörpü” - “Azvirt” (AR-Almaniya) şirkətləri konsorsiumu “Azəravtoyol” Dövlət Şirkətinin Gəncə-Şəmkir avtomobil magistralının yenidən qurulması üzrə keçirdiyi tenderin qalibi olmuşdur. “Azəravtoyol” Dövlət Şirkətindən AZƏRTAC-a bildirmişlər ki, konsorsium layihəni ən ucuz qiymətə həyata keçirməyi təklif etmişdir. Hazırda tenderin yekunları təsdiq olunmaq üçün bu layihəni maliyyələşdirən Dünya Bankına (DB) göndərilmişdir. Bu nüfuzlu beynəlxalq maliyyə qurumunun cavabı bir ay ərzində alınacaqdır. Yenidənqurma layihəsi DB-nin 40 milyon dollar məbləğində ayırdığı kredit hesabına həyata keçiriləcək və ən geci 2004-cü ildə başa çatdırılacaqdır.
Bundan başqa, “Azəravtoyol” Dövlət Şirkətində bildirmişlər ki, Naxçıvan MR-in “Naxavtoyol” konserni Muxtar Respublikada yolların bəzi hissələrinin yenidən qurulması, habelə Araz çayı üstündən körpü salınması barədə İran İslam Respublikasının Nəqliyyat Nazirliyi ilə protokol imzalamışdır. Bu layihə çərçivəsində Ordubad-Culfa avtomobil yolu yenidən qurulacaq, Şahtaxtı kəndi yaxınlığında yeni körpü salınacaqdır. Araz çayının üstündə tikiləcək 260 metr uzunluğunda körpü Culfadakı köhnə körpünün yaxınlığında inşa ediləcəkdir. Bu layihəni İran tərəfi maliyyələşdirəcək, lakin ayrılacaq kreditin məbləği ekspertlər texniki-iqtisadi əsaslandırmanı hazırlayandan sonra müəyyənləşdirəcəkdir.
Bölmənin digər xəbərləri
