Azərbaycan Ağsaqqallar Şurasında Zəfər Günü münasibətilə tədbir keçirilib
Bakı, 29 oktyabr, AZƏRTAC
Azərbaycan Ağsaqqallar Şurasında 8 Noyabr - Zəfər Gününə həsr edilmiş növbəti tədbir keçirilib.
Şuradan AZƏRTAC-a bildiriblər ki, əvvəlcə Vətən uğrunda canlarından keçən şəhidlərimizin və Yardımlı Rayon Ağsaqqallar Şurasının mərhum sədri Məzlum Mənsimovun xatirəsi bir dəqiqəlik sükutla yad edilib.
Sonra çıxış edən Eldar Quliyev qarşıdan çoxdan gözlədiyimiz möhtəşəm bayramın - Zəfər Gününün gəldiyini diqqətə çatdırıb. Bu Qələbənin qazanılmasında xalqımızın şəhidlər verdiyini söyləyən natiq Zəfər bayramı ərəfəsində bütün şəhər və kəndlərimizdə şəhidlərimizin anım günlərinin, ildönümü mərasimlərinin və digər tədbirlərin keçirildiyini, Şuranın yerli təşkilatlarının nümayəndələrinin bu tədbirlərdə yaxından iştirak etdiyini deyib.
E.Quliyev işğaldan azad olunmuş torpaqlarda genişmiqyaslı bərpa-quruculuq işlərinin aparıldığını vurğulayıb, xalqımızın oktyabrın 26-da Prezident İlham Əliyevin qardaş Türkiyə Prezidenti Rəcəb Tayyib Ərdoğanla birgə Zəngəzur dəhlizinin təməlini qoyduğu möhtəşəm tarixi hadisəyə şahidlik etdiyini bildirib. O, həmçinin belə bir məsuliyyətli zamanda ağsaqqalların öz fəaliyyətlərini daha da aktivləşdirməli olduqlarını, xüsusilə son zamanlar artan ailə-məişət zorakılıqlarının, boşanmaların, əsasən qızların məktəbə davamiyyət problemlərinin, narkotik aludəçiliyinin və digər zərərli vərdişlərin qarşısının alınması üçün gənclərlə mütəmadi, səmərəli işlərin aparılmasının vacibliyini vurğulayıb.
Azərbaycan Ağsaqqallar Şurasının sədr müavini professor Elmira Süleymanova iş bölgüsü əsasında nəzarət etdiyi və bütün tədbirlərinə qatıldığı cənub bölgəsinin təşkilat sədrlərini salamlayaraq, 44 günlük Vətən müharibəsində bütün xalqımızın, xüsusilə əsgər analarının böyük iradə nümayiş etdirdiyini vurğulayıb. Bildirib ki, bu gün biz də həmin əsgər-qazilərimizdən, şəhid ailələrindən diqqətimizi əsirgəməməliyik, onlara daim hərtərəfli dəstək olmalıyıq. Elmira Süleymanova Prezident, Müzəffər Ali Baş Komandan İlham Əliyevin rəhbərliyi ilə şanlı Ordumuzun şücaəti ilə 30 illik yurd həsrətimizə son qoyulduğunu, yüz minlərlə məcburi köçkünümüzün qəribçilikdən qurtulduğunu və öz doğma torpaqlarına qayıdacaqlarını vurğulayıb. “Hazırda Böyük Qayıdış ərəfəsindəyik, işğaldan azad edilmiş torpaqlarımızda geniş məskunlaşma prosesi həyata keçiriləcək və biz də öz növbəmizdə məcburi köçkünlərlə müəyyən işlər aparmalıyıq”, - deyən Elmira Süleymanova Azərbaycan Ağsaqqallar Şurasının cənub bölgəsini əhatə edən rayon təşkilatlarının fəaliyyətindən ətraflı danışıb.
Sonra çıxış edən Azərbaycan Ağsaqqallar Şurasının müavini professor Vahid Novruzov cənub bölgəsindən olan ictimai-siyasi xadim, İdarə Heyətinin üzvü İbrahim Quliyev və rayon sədrləri qarşıdan gələn böyük Zəfər bayramından, bu tarixin daşıdığı misilsiz əhəmiyyətdən bəhs ediblər. Qeyd olunub ki, Prezident, Müzəffər Ali Baş Komandan İlham Əliyevin başçılığı ilə 44 günlük Vətən müharibəsində Azərbaycan xalqının və rəşadətli Ordumuzun Qələbəsi bütün dünyaya doğma torpaqlarımızdan bir qarış belə heç kimə verməyəcəyimizi bir daha sübut etdi. Qazandığımız bu Zəfər haqqın, ədalətin Zəfəridir. Azərbaycanda gənc nəslin təlim-tərbiyəsinə hər zaman xüsusi diqqətin ayrılmasının zəruriliyindən danışan natiqlər bu barədə ağsaqqalların da üzərinə böyük məsuliyyətin düşdüyünü vurğulayıblar. Rayon təşkilatlarının sədrləri də öz növbələrində bölgələrdə Anım və Zəfər günləri ilə əlaqədar bir sıra tədbirlər keçirdiklərini, qaziləri, şəhid ailələrini, həmçinin xəstə və yaşlı insanları ziyarət etdiklərini, həmçinin gənclərlə görüşlər keçirdiklərini, onlardan öz məsləhət və tövsiyələrini əsirgəmədiklərini diqqətə çatdırıblar. Xüsusi qeyd edilib ki, pandemiya səbəbindən işlərində müəyyən çətinliklər olsa da, gələcəkdə fəaliyyətlərini daha da artırmaq əzmindədirlər.
Daha sonra Azərbaycan Ağsaqqallar Şurasının sədri, deputat Eldar Quliyev bütün tədbir iştirakçılarına təşəkkürünü bildirərək, onları qarşıdan gələn Zəfər Günü münasibətilə təbrik edib. Vurğulayıb ki, bu bayramı bir neçə ictimai-siyasi xadimlə birlikdə Azərbaycandan kənarda, xarici ölkələrdə keçirilən tədbirlərə qatılmaqla qeyd edəcəklər və bütün dünyaya fəxrlə göstərəcəklər, bir daha sübut edəcəklər ki, “Qarabağ Azərbaycandır!”.
Sonda Eldar Quliyev tədbirdə iştirak edən cənub bölgəsinin rayon sədrlərinə yeni vəsiqələrini təqdim edərək, onlara gələcək fəaliyyətlərində daha böyük uğurlar arzulayıb.
Bölmənin digər xəbərləri
