AZƏRBAYCAN AVROPA HƏRƏKATININ TƏQDİMAT MƏRASİMİ KEÇİRİLMİŞDİR
Hərəkatın prezidenti Həbib Quliyev bildirmişdir ki, 1947-ci ilin iyulunda İngiltərənin keçmiş baş naziri Uinston Çörçill və fransalı diplomat Dunkan Sandi ilk dəfə olaraq ingilis-fransız Birləşmiş Avropa Hərəkatının əsasını qoymuş, 1948-ci il oktyabrın 25-dən isə təşkilat rəsmi fəaliyyətə başlamışdır.
Diqqətə catdırılmışdır ki, Avropanın birliyi ideyasını təbliğ edən hərəkatın ilk əhəmiyyətli uğuru 1949-cu ildə Avropa Şurasının yaradılması olmuşdur.
Vurğulanmışdır ki, Azərbaycan Avropa Hərəkatı 2004-cü il iyulun 19-da Tallin Şəhər Məhkəməsində qeydiyyatdan kecmiş və hazırda fəaliyyətini respublikamızda davam etdirir.
Təşkilatın əsas məqsədi Azərbaycanın Avropa İttifaqına inteqrasiyası sahəsində dövlətin siyasətini dəstəkləmək, bu yöndə gənclərin rolunu daha da artırmaq, onlara Avropa dəyərlərini aşılamaq və ölkəmizi Avropa ailəsində layiqincə təmsil etməkdir.
Hərəkatın üzvləri bildirmişlər ki, gənclərin Avropa İttifaqı barədə ətraflı məlumatlandırılması üçün “Avropa İttifaqı nədir?” məlumat kitabı cap olunmuşdur. Bu kitabdan təhsil ocaqlarında gənclərin maarifləndirilməsi üçün əyani vəsait kimi istifadə olunur.
