AZƏRBAYCAN BEYNƏLXALQ BANKI 130 MİLYON DOLLAR MƏBLƏĞİNDƏ KREDİT SAZİŞİ İMZALAMIŞDIR

10.11.2006 [23:23]
Çap et
A⁺ A^-

AZƏRTAC xəbər verir ki, Azərbaycan Beynəlxalq Bankı (ABB) noyabrın 10-da LIBOR+0,9 faiz dərəcəsi üzrə 12 ölkənin 26 bankından ibarət sindikatla 130 milyon dollar məbləğində kredit sazişi imzalamışdır. Bir il müddətinə verilmiş kredit, əsasən, infrastruktur layihələrinə yönəldiləcəkdir.

Maliyyələşdirmənin təşkilatçıları City Group, JP Morgan bankları, Avstriyanın RZE bankı və Almaniyanın Commers Bankıdır. Bu bankların hər biri 9 milyon dollar ayırmış, vəsaitin qalan hissəsini digər 22 bank vermişdir.

İmzalanma mərasimində bildirilmişdir ki, ilkin danışıqlar 60 milyon dollar kredit verilməsi ilə əlaqədar aparılmışdır, lakin sindikat Azərbaycanda bank sektorunun uğurla inkişaf etdiyini nəzərə alıb, kreditin məbləğini iki dəfə artırmaq və onu aşağı faiz dərəcəsi ilə vermək qərarına gəlmişdir.

Bankların sayının çox olması, habelə onların geniş coğrafiyanı - ABŞ, Almaniya, Hollandiya, Avstriya, Birləşmiş Ərəb Əmirlikləri, Fransa və İsveçrə kimi dövlətləri əhatə etməsi xarici şirkətlərin ABB-yə göstərdiyi etimadın parlaq nümunəsidir. Bu kredit dövlət zəmanəti olmadan cəlb edilmişdir.

Sənədi Beynəlxaq Bankın İdarə heyətinin sədri Cahangir Hacıyev və City Bankın kredit şöbəsinin müdiri Əhməd Bekte imzalamışlar.