AZƏRBAYCAN BEYNƏLXALQ ÜZÜM VƏ ŞƏRAB TƏŞKİLATININ PARİS TOPLANTISINDA TƏMSİL OLUNMUŞDUR
Bakı, 8 aprel (AZƏRTAC). Azərbaycan Elmi Tədqiqat Üzümçülük və Şərabçılıq İnstitutunun direktoru Tariyel Pənahov Beynəlxalq Üzüm və Şərab Təşkilatının (OİV) komissiya və ekspert qruplarının Parisdə keçirilən toplantısından qayıtmışdır.
T.Pənahov demişdir ki, tədbirə qurumun baş direktoru Federiko Kastelluçi tərəfindən dəvət olunmuşdum. Ölkəmizdə üzümçülük və şərabçılığın tarixi, inkişaf strategiyası haqqında komissiya və ekspert qruplarına təqdim etdiyim material maraqla müzakirə olundu. Sənəddə dünyanın müxtəlif ölkələrindən dəvət olunmuş alim və mütəxəssislərin nəzərinə çatdırılırdı ki, Azərbaycan torpaqlarının 20 faizdən çoxunun Ermənistan silahlı qüvvələri tərəfindən işğal edilməsi nəticəsində təkcə üzümçülük və şərabçılıq sahəsində ölkə iqtisadiyyatına 1 milyard avro dəyərində ziyan vurulmuşdur. Azərbaycanın qədim üzüm sortları, şərab zavodları məhv edilmiş, müvafiq infrastruktur tamamilə dağıdılmışdır.
Səfər çərçivəsində qurum rəhbərləri ilə Azərbaycanın həmin təşkilata üzvlüyü məsələsi də müzakirə olunmuş, OİV-in internet səhifəsində ölkəmizdə üzümçülük və şərabçılığın inkişafı barədə məqalə dərc edilmişdir.
Bölmənin digər xəbərləri
