AZƏRBAYCAN BİRİNCİLİYİNİ YIĞMA KOMANDALARIN BAŞ MƏŞQÇİLƏRİ DƏ İZLƏYƏCƏKLƏR
Bakı, 12 oktyabr (AZƏRTAC). Oktyabrın 16-da Mingəçevirdəki “Kür” Təlim-Tədris İdman Mərkəzində avarçəkmə üzrə Azərbaycan birinciliyi start götürəcəkdir. İki gün davam edəcək yarışda 18 yaşadək avarçəkənlər mübarizə aparacaqlar.
Azərbaycan Milli Avarçəkmə Federasiyasının mətbuat xidmətindən bildirmişlər ki, ümumilikdə ölkə birinciliyində 3 yaş kateqoriyasında (1991-1992, 1993-1994 və 1995-1996) 120-dək avarçəkənin iştirakı gözlənilir. Çempionatı akademik avarçəkmə, kayak və kanoe üzrə yığma komandalarımızın baş məşqçiləri - Rudiger Hauffe, Yohan Tsülke və Aleksandr Kolıbelnikov da izləyəcəklər.
Akademik avarçəkənlər 1 nəfərlik, 2 nəfərlik qoşa avarlı, 2 nəfərlik sükansız, 4 nəfərlik qoşa avarlı və 4 nəfərlik sükansız qayıqlarda mübarizə aparacaqlar. Onlardan 1991-1992-ci il təvəllüdlü idmançılar 2000 metr, 1993-1994-cü il təvəllüdlülər 1500 metr, 1995-1996-cı il təvəllüdlülər isə 1000 metr məsafələrə yürüş edəcəklər. Kayak və kanoeçilər isə 1 və 2 nəfərlik qayıqlarla 1000 metr, 500 metr və 200 metr məsafələrə yürüşlərə qatılacaqlar.
Bütün mükafatçılar Gənclər və İdman Nazirliyi və Azərbaycan Milli Avarçəkmə Federasiyasının diplomları ilə tərtif olunacaqlar.
Bölmənin digər xəbərləri
