Bakı, 8 avqust, AZƏRTAC

Cənubi Qafqazda tarixi transformasiya, geosiyasi dəyişikliklər baş verir. Ənənəvi ittifaqlar zəifləyir, yeni əməkdaşlıq formatları meydana gəlir. Prezident İlham Əliyevin 2-ci Şuşa Qlobal Media Forumunda vurğuladığı kimi, bu tarixi gedişata müdaxilə etmək, prosesi öz maraqlarına uyğun şəkildə dəyişmək istəyən güc mərkəzləri var. Regiona yönəlik ekspansiyanı gücləndirən mərkəzlər müxtəlif üsullardan istifadə edərək hadisələrin təbii gedişatını dəyişmək istəyirlər. Ermənistanda və Gürcüstanda baş verən son proseslər bu ideyanı bir daha təsdiqləyir. Amma dövlətimizin başçısı onu da vurğuladı ki, indi Cənubi Qafqazda müharibədən qalib çıxmış, ərazi bütövlüyünü və suverenliyini təmin etmiş qüdrətli Azərbaycan dövləti var. Bu gün Azərbaycan təkcə öz ərazisini və suverenliyini deyil, həm də ümumilikdə regionu kənar müdaxilələrdən qorumaq gücündədir. 2020-ci ildən etibarən Azərbaycanın gerçəkləşdirdiyi proseslər, hərbi və diplomatik müstəvidə qazandığı nailiyyətlər bu qənaəti daha da gücləndirir.

Bu sözləri Mətbuat Şurasının İdarə Heyətinin üzvü, media eksperti Müşfiq Ələsgərli AZƏRTAC-a açıqlamasında söyləyib.

O bildirib ki, Azərbaycanın regionda əsas söz sahibi olmasının göstəricilərindən biri insan resursları və iqtisadi inkişafdırsa, digəri də güclü ordusudur. Cənubi Qafqazın iqtisadi potensialının 80 faizə qədəri Azərbaycanın payına düşür. Paralel olaraq, Azərbaycan Ordusu Cənubu Qafqazın ən güclü ordusudur. Mərkəzi ofisi ABŞ-da yerləşən “Global Fire Power” təşkilatı qeyd edir ki, Azərbaycan Silahlı Qüvvələri nəinki Cənubi Qafqazın, həm də dünyanın ən güclü orduları sırasında yer alır. Təşkilat 2024-cü il üzrə hesabatını hərbi bölmələrin sayı, maliyyə, logistika imkanları və digər 60 göstəricisi əsasında hazırlayır. Həmin siyahıda Azərbaycan 59-cu, Gürcüstan 84-cü, Ermənistan isə 102-ci yerdə qərarlaşıb. Bu göstərici ilə ölkəmiz ordusunun gücünə görə həm Ermənistandan və Gürcüstandan, həm də dünyanın bir sıra tanınmış dövlətlərindən öndədir.

“Nəzərə almaq lazımdır ki, Azərbaycan Ordusu digər ölkələrlə müqayisədə təkcə müasir texniki təminatı, say və logistik imkanları ilə deyil, həm də praktiki döyüş bacarıqları ilə fərqlənir. Təsadüfi deyil ki, 2020-ci ildə baş vermiş İkinci Qarabağ müharibəsini ordumuz ən modern yeniliklərlə həyata keçirib. Minimal itkilər, sürətli hərəkət və böyük qələbələr Vətən müharibəsini xarakterizə edən əsas əlamətlərdir. Müqayisə üçün qeyd edək ki, Vətən müharibəsində Azərbaycan Ordusu 3 min nəfərə yaxın şəhid verib. Ermənistanın hərbi heyətinin itkiləri isə 10 min nəfərdən artıq olub. Özlərinin etiraf etdiklərinə görə, bu müharibədə Ermənistanın 4520 hərbi qulluqçusu öldürülüb, 1600 hərbçi itkin düşüb, 9094 hərbi qulluqçu yaralanıb. Yəni, Ermənistan dörd dəfə artıq itki verib. Onu da nəzərə almaq lazımdır ki, müstəqil müşahidə mərkəzləri Ermənistanın öldürülən hərbçilərinin sayının 4520 nəfər deyil, 6300 nəfər olduğunu qeyd edirlər. Məlumat üçün qeyd edək ki, 44 günlük savaşdan fərqli olaraq, Birinci Qarabağ müharibəsi dönəmində 11 min 557 nəfər Azərbaycan hərbçisi şəhid olub. Əlavə olaraq, torpaqlarımız işğala məruz qalıb. Təkcə bu nümunəyə əsaslanaraq demək olar ki, Vətən müharibəsinə qədər Azərbaycan Ordusu kifayət qədər güclənib, peşəkar orduya çevrilib və ən son texnikalarla təchiz edilib. Azərbaycan Silahlı Qüvvələri 2023-cü il sentyabrın 19-20-də həyata keçirdiyi antiterror tədbirlərini də eyni səriştə ilə başa vurdu. Minimal itki və sürətli manevrlər nəticəsində separatçılar cəmi bir sutka ərzində darmadağın edildi, dövlət suverenliyimiz tam bərpa olundu”, - deyə ekspert vurğulayıb.

M.Ələsgərli əlavə edib ki, Azərbaycan Vətən müharibəsi və antiterror tədbirləri zamanı təkcə döyüş meydanında deyil, həm də diplomatik müstəvidə ciddi savaş aparıb və nailiyyətlər qazanıb. Məsələn, 44 günlük müharibə dönəmində və ondan sonra Fransa Azərbaycana qarşı diplomatik savaş açıb, təsir dairəsində olan media qurumlarını, transmilli media subyektlərini qarayaxma kampaniyasına cəlb edib. Bu vasitə ilə qlobal ictimai rəyi Azərbaycana qarşı yönəltməyə çalışıb. Fransa, həmçinin təmsil olunduğu beynəlxalq platformalarda qondarma müzakirələr açıb, ölkəmizin adına kölgə yaxmaq istəyib.

Eləcə də Fransa 2020-ci ildə hələ müharibənin davam etdiyi dövrdə Qarabağ məsələsini BMT Təhlükəsizlik Şurasının müzakirəsinə çıxararaq, Azərbaycana təzyiq göstərmək, ölkəmizi özünün haqq işini tamamlamaqdan yayındırmaq istəmişdi. Paris 2022-ci ilin dekabrında “Laçın yolu” mövzusunu əsas götürərək, Azərbaycan məsələsini BMT müstəvisinə çıxarmaq üçün növbəti dəfə təşəbbüs göstərmişdi. Eyni hərəkətlərini 2023-cü ilin avqust ayında da təkrarladı. Qarabağ bölgəsində yaşayan erməniəsilli sakinlərin guya “blokadaya salınması” barədə əsassız iddialar irəli sürdü. Bölgədə yaşayan ermənilər üçün yalançı humanitar yardım karvanı göndərməklə “humanitar böhran” kampaniyası başlatdı. 2023-cü ilin oktyabr ayında BMT-nin İnsan Hüquqları Şurasında Azərbaycan əleyhinə birgə bəyanat verdirməyə təşəbbüs göstərdi. Amma Azərbaycan bu və buna bənzər bütün təşəbbüsləri iflasa uğratdı. Azərbaycanın uzun müddət ərzində apardığı müstəqil və balanslı xarici siyasət kursu öz bəhrəsini verdi. Ölkəmiz dünyanın bütün qitələrində, fərqli qütblərdə yerləşən tərəqqipərvər ölkələrdən dəstək alaraq haqq işini tamamlaya bildi.

“Hazırda Azərbaycan müharibə mərhələsini aşaraq zəruri iqtisadi-siyasi layihələrə qoşulub. Bu gün Azərbaycanın həmmüəllif olduğu regional və beynəlxalq layihələr onu dünya üçün əvəvzedilməz ölkəyə çevirir. İndi Azərbaycan Qərb ölkələri üçün əhəmiyyətli enerji qaynaqlarından biri, həmçinin Avropa ilə Asiya arasında ən mühüm nəqliyyat qovşağıdır. İki qitəni birləşdirən ən sərfəli nəqliyyat dəhlizləri Azərbaycan ərazisində layihələndirilib. Bu dəhliz Avropa və Asiya ilə yanaşı, bütövlükdə dünya üçün əhəmiyyət daşıyır.

Amma Azərbaycan adı dünyada təkcə nəqliyyat dəhlizləri və ya enerji layihələri üzrə diqqət çəkmir. Son dörd ildə baş verən proseslər Azərbaycanın adını region hüdudlarından kənara çıxan, “orta güc” kateqoriyasına daxil olan ölkə kimi tanıdıb. Çox mühüm geopolitik proseslər mövcuddur ki, Azərbaycan orada açar nöqtələrdən biridir. Geopolitik güc mərkəzlərinin Cənubi Qafqaz və ətraf regionlar üzrə layihələrinin taleyi həm də Azərbaycanın iradəsindən asılıdır. Azərbaycan iqtidarı bu amilləri ölkəmiz üçün üstünlüyə çevirə bilir”, - deyə M.Ələsgərli bildirib.