Azərbaycanın Birləşmiş Ərəb Əmirliklərindəki səfirliyindən AZƏRTAC-a bildirmişlər ki, mayın 3-5-də Dubay şəhərində “Cinayət qurbanları” mövzusunda konfrans və “Orta Şərq polisi və hüquq mühafizə orqanları” adlı sərgi keçiriləcəkdir. Hər iki tədbiri Birləşmiş Ərəb Əmirliklərinin müdafiə naziri, Dubay Əmirliyinin vəliəhdi və Dubay Polisi və İctimai Təhlükəsizlik Departamentinin rəhbəri general Şeyx Məhəmməd bin Rəşid Əl Maktumun himayəsi altında Dubay Polis Akademiyası təşkil edəcəkdir.

Ölkəmizin Birləşmiş Ərəb Əmirliklərindəki səfirliyinin Dubay Polis Akademiyasında keçirdiyi görüş və apardığı danışıqlar nəticəsində tədbirlərə Azərbaycandan da nümayəndə heyəti dəvət olunmuşdur. Respublikamızı tədbirlərdə daxili işlər nazirinin müavini, polis general-leytenantı Əsgər Ələkbərovun rəhbərliyi ilə nümayəndə heyəti təmsil edəcəkdir. Səfər çərçivəsində BƏƏ–nin dövlət rəsmiləri və Dubay Polis Akademiyasının rəhbərliyi ilə görüşlər keçiriləcək və tərəflər arasında əməkdaşlığın inkişaf yolları barədə fikir mübadiləsi aparılacaqdır.