AZƏRBAYCAN DÖVLƏT İQTİSAD UNİVERSİTETİ “QIZIL FORTUNA” MÜKAFATINA LAYİQ GÖRÜLMÜŞDÜR

10.11.2006 [12:45]
Çap et
A⁺ A^-

AZƏRTAC xəbər verir ki, Azərbaycan Dövlət İqtisad Universiteti (ADİU) Beynəlxalq Reytinq Texnologiyaları və Sosiologiya Akademiyasının “Reytinq populyarlığı” nominasiyası üzrə “Qızıl fortuna” mükafatına layiq görülmüşdür.

Mükafat universitetə MDB məkanında ilk dəfə olaraq iqtisadi təhsilin yeni modelinin yaradılması, təhsil sistemində informasiya texnologiyalarının tətbiqi, görkəmli siyasi xadim Heydər Əliyevin iqtisadi irsinin öyrənilməsi, tətbiqi, gənc nəslin onun zəngin ideyaları əsasında tərbiyə olunması sahəsində uğurlu fəaliyyətinə görə verilmişdir.

Qeyd edək ki, ADİU 2002-ci ildə elm və təhsil sahəsindəki nailiyyətlərinə görə akademiyanın “Gümüş fortuna” mükafatını almışdı.

Əvvəlki nominantlar arasında Türkiyə, Böyük Britaniya, Yaponiya, Rusiya və Almaniyanın tanınmış universitetləri vardır.