Azərbaycan Elm Fondu yeni dövrün elmi prioritetlərini açıqlayıb
Bakı, 31 iyul, AZƏRTAC
Azərbaycan Elm Fondu yaxın dövrdə ölkənin elmi və texnoloji inkişaf prioritetlərinə uyğun istiqamətlər üzrə fəaliyyətini davam etdirəcək. Fond elmi potensialın gücləndirilməsi, innovativ tədqiqatların dəstəklənməsi, gənc alimlərin fəaliyyətinə yeni imkanların yaradılması və elmi nəticələrin praktik tətbiqinə yönəlmiş layihələrin maliyyələşdirilməsinə xüsusi diqqət ayıracaq.
Elm Fondundan AZƏRTAC-ın sorğusuna cavab olaraq bildirilib ki, Fondun əsas diqqət istiqamətlərindən biri müasir çağırışlara cavab verən elmi tədqiqatların dəstəklənməsi olacaq. Bu çərçivədə süni intellekt, rəqəmsal texnologiyalar, yaşıl texnologiyalar, biotexnologiya, səhiyyə, iqlim dəyişiklikləri, ərzaq və su təhlükəsizliyi sahələrində innovativ layihələrin maliyyələşdirilməsinə xüsusi önəm veriləcək. Bununla yanaşı, Qarabağ və Şərqi Zəngəzurun bərpası və davamlı inkişafı ilə bağlı elmi araşdırmaların dəstəklənməsi Fondun prioritet istiqamətləri sırasında yer alacaq.
Azərbaycan Elm Fondu elmi potensialın artırılması məqsədilə gənc alimlərin fəaliyyətinə dəstəyini davam etdirəcək, beynəlxalq elmi əməkdaşlığın genişləndirilməsinə, elmi nəticələrin praktiki tətbiqinə və innovasiyayönümlü tədqiqatların təşviqinə xüsusi diqqət ayıracaq.
Fondun həyata keçirdiyi layihələr elmi nailiyyətlərin ölkənin sosial-iqtisadi inkişafına töhfə verməsinə, yeni texnologiyaların yaradılmasına və elmi mühitin daha da gücləndirilməsinə xidmət edəcək.
Müxbir - Tünzalə Zeyvəliyeva
Bölmənin digər xəbərləri
