AZƏRBAYCAN HƏMKARLAR İTTİFAQLARI KONFEDERASİYASININ II QURULTAYI ÖZ İŞİNƏ BAŞLAMIŞDIR
Fevralın 5-də Opera və Balet Teatrında Azərbaycan Həmkarlar İttifaqları Konfederasiyasının II qurultayı öz işinə başlamışdır.
Konfederasiyanın sədri Səttar Mehbalıyev qurultayı açdı.
Azərbaycanın Dövlət himni səsləndi.
Sonra gündəlik elan edildi, qurultayın rəhbər orqanları seçildi.
Prezidentin İcra Aparatının rəhbəri Ramiz Mehdiyev dövlətimizin başçısı Heydər Əliyevin qurultaya təbrik məktubunu oxudu. Qurultay iştirakçıları Prezidentin səmimi təbrikini hərarətli alqışlarla qarşıladılar.
Bir sıra beynəlxalq təşkilatların, xarici ölkələrin həmkarlar ittifaqlarının nümayəndələri təbrik sözü söylədilər.
Sonra Konfederasiyanın sədri, Milli Məclisin deputatı Səttar Mehbalıyev Azərbaycan Həmkarlar İttifaqları Konfederasiyasının ötən qurultayından keçən dövr ərzində görülmüş işlər barədə hesabat məruzəsi ilə çıxış etdi.
Natiq respublikamız müstəqilliyə qovuşduqdan sonra göstərilən çoxsaylı təzyiqlərə, eləcə də, həmkarlar ittifaqları təşkilatlarını şəxsi məqsədlər naminə alətə çevirmək istəyən ayrı-ayrı qrupların siyasi ambisiyalarına baxmayaraq, ölkəmizin həmkarlar ittifaqlarının öz strukturlarında dövrün tələblərinə müvafiq əsaslı islahatlar apararaq, Həmkarlar İttifaqları Konfederasiyasını yaratdıqlarını xatırlatdı. Bildirildi ki, Prezident Heydər Əliyevin Azərbaycanda ikinci dəfə hakimiyyətə gəlişindən sonra ölkəmizdə həmkarlar ittifaqlarının fəaliyyətinə diqqət və qayğı artıb. Həmkaralar ittifaqlarının cəmiyyətdə statusunu müəyyənləşdirən “Həmkarlar ittifaqları haqqında”, “Kollektiv müqavilələr və sazişlər haqqında”, “Fərdi əmək müqavilələri haqqında” və digər normativ- hüquqi aktlar qəbul edilmişdir. Azərbaycanın həmkarlar ittifaqları həmişə olduğu kimi, xalqın mənafeyini müdafiə edən, onun rifahının yaxşılaşması, daha xoşbəxt gələcəyi uğrunda mübarizə aparan bütün siyasi və ictimai qüvvələri dəstəkləyir.
Konfederasiyanın sədri qeyd etdi ki, 1,5 milyondan çox üzvü olan həmkarlar ittifaqları yalnız işçilərin mənafeyini müdafiə edir və xalqın iradəsinin əleyhinə gedən, konstitusion dövlət quruluşuna və qanuni yolla seçilmiş Prezidentin siyasətinə zidd çıxan qüvvələrə qarşı həmişə barışmaz mövqe tutmuş və tutacaqdır.
Məruzəçi birmənalı şəkildə bəyan etdi ki, həmkarlar ittifaqları həmişə olduğu kimi, bundan sonra Prezident Heydər Əliyevin müdrik siyasi xəttini dəstəkləyəcəkdir. Qarşıdan prezident seçkiləri gəlir. Təbii ki, xalq, eləcə də onun ayrılmaz tərkib hissəsi olan həmkarlar ittifaqlarının çoxsaylı üzvləri özünün sınanmış rəhbərinə - Heydər Əliyevə böyük inamla səs verəcəklər. Konfederasiyanın bütün üzv təşkilatları özlərinin qurultayqabağı plenum, konfrans və məclislərində qarşıdan gələn prezident seçkilərində Heydər Əliyevin namizədliyini irəli sürəcəklərini və yalnız ona səs verəcəklərini bəyan etmişlər. Həmin yığıncaqların iştirakçıları bu barədə tapşırığı təmsil etdikləri həmkarlar ittifaqları təşkilatlarının sıravi üzvlərindən aldıqlarını xüsusi vurğulamış, xalqın əksəriyyətinin prezident seçkilərində Heydər Əliyevin namizədliyini dəstəkləyəcəklərinə əmin olduqlarını bildirmişlər. Məruzəçi həmkarlar ittifaqları üzvlərinin yekdil fikrini ifadə edərək, qurultay nümayəndələri adından 2003-cü ilin prezident seçkilərində Heydər Əliyevin namizədliyinin irəli sürülməsini təklif etdi.
Konfederasiyanın sədri bildirdi ki, hazırda 22 sahə, iki federativ tipli həmkarlar ittifaqı və Naxçıvan Muxtar Respublikası Həmkarlar İttifaqları Şurası Konfederasiyanın üzvüdür. İndi respublika üzrə 5383 özəl təşkilatda 280 min 895 həmkarlar ittifaqı üzvü fəaliyyət göstərir.
Natiq həmkarlar ittifaqlarının təşkilati cəhətdən möhkəmləndirilməsində, bir sıra mühüm proqramların həyata keçirilməsində, qanunvericilik aktlarının qəbul olunmasında, əməkçilərin hüquqlarının qorunmasında, sosial problemlərin həllində və digər işlərin görülməsində Konfederasiyanın rolu barədə geniş məlumat verdi.
Sonra məruzə ətrafında müzakirələr başlandı. Sahə həmkarlar ittifaqlarının sədrləri çıxış edərək, hesabat dövründə görülən işlərdən, mövcud problemlərdən və qarşıda duran vəzifələrdən danışdılar. Bütün natiqlər qarşıdan gələn prezident seçkilərində Heydər Əliyevin namizədliyinin irəli sürülməsi barədə təklifi yekdilliklə dəstəklədiklərini bildirdilər.
Qurultayda Təftiş komissiyasının hesabatı dinlənildi. Konfederasiyanın Nizamnaməsinə, habelə Təftiş komissiyasının Əsasnaməsinə əlavə və dəyişikliklər edildi.
Sonra qurultay təşkilat məsələsinə baxdı. Milli Məclisin deputatı Səttar Mehbalıyev açıq səsvermə yolu ilə yenidən Azərbaycan Həmkarlar İttifaqları Konfederasiyasının sədri seçildi.
Qurultay qətnamə qəbul etdi. Azərbaycan Həmkarlar İttifaqları Konfederasiyası II qurultayının nümayəndələri Azərbaycan xalqına ünvanladıqları müraciətdə təmsil etdikləri həmkarlar ittifaqları təşkilatlarının milyon yarımlıq üzvü adından respublikamızda bu il keçiriləcək prezident seçkilərində Heydər Əlirza oğlu Əliyevin namizədliyini irəli sürəcəklərini bəyan edərək, hamını bu təklifi dəstəkləməyə çağırdılar. Qurultay nümayəndələri Azərbaycan Prezidenti Heydər Əliyevə müraciət qəbul etdilər.
Fevralın 6-da qurultay öz işini davam etdirəcəkdir.
Qurultayda Prezidentin İcra Aparatının rəhbəri Ramiz Mehdiyev, Milli Məclis sədrinin müavini Ziyafət Əsgərov, Prezidentin İcra Aparatının ictimai-siyasi şöbəsinin müdiri Əli Həsənov və digər rəsmi şəxslər iştirak edirdilər.
Bölmənin digər xəbərləri
