“AZƏRBAYCAN” HOTELİNİN BƏRPASI VƏ İSTİSMARI BARƏDƏ MÜQAVİLƏ İMZALANMIŞDIR
AZƏRTAC xəbər verir ki, müqaviləyə əsasən, indiki “Azərbaycan”ın ikinci korpusunda bərpa işləri başa çatdıqdan sonra burada “Rezidor SAS” şirkətinin “Park İnn” ticarət markası altında tanınmış 4 ulduzlu, 248 otaqlı hotel fəaliyyətə başlayacaqdır. Köhnə binada sökmə işləri başa çatdıqdan sonra respublikamızda fəaliyyət göstərən inşaat şirkətləri arasında “Park İnn” hotelinin tikintisini aparmaq üçün rəsmi tender elan olunacaqdır.
“Park İnn” çoxfunksiyalı bina kimi istifadəyə veriləcək. Belə ki, onun birinci mərtəbəsində restoran və barlar, ikinci mərtəbəsində konfrans zalı və icarə üçün ofislər nəzərdə tutulmuşdur. Hotelin 248 otağı isə 3-11-ci mərtəbədə yerləşdiriləcəkdir.
Qeyd edək ki, “Park İnn” “Rezidor SAS” şirkətinin Azərbaycanda ikinci layihəsidir. Artıq altı ildir ki, “İSR Plaza” biznes mərkəzindəki 5 ulduzlu “Radisson SAS” hoteli paytaxtımızın qonaqlarına xidmət göstərməkdədir.
Bölmənin digər xəbərləri
