Azərbaycan ilə Avropa İttifaqı arasında miqrasiya sahəsində əməkdaşlıq məsələləri müzakirə olunub
Bakı, 25 may, AZƏRTAC
Dövlət Miqrasiya Xidmətinin (DMX) rəisi Vüsal Hüseynov Xidmətin inzibati binasında Avropa İttifaqının (Aİ) Azərbaycandakı nümayəndəliyinin rəhbəri Kestutis Yankauskasla görüşüb. Avropa Komissiyasının qonşuluq və genişlənmə müzakirələri üzrə baş direktorluğunun regional proqramlar bölməsinin rəhbəri Vasilis Maraqos da görüşdə iştirak edib.
DMX-nin mətbuat xidmətindən AZƏRTAC-a bildiriblər ki, görüşdə Aİ ilə mövcud əlaqələrdən söhbət açılıb və əməkdaşlığın perspektivləri müzakirə olunub.
Vüsal Hüseynov iqtisadiyyatın, turizmin, ticarətin, investisiyaların şaxələndirilməsi istiqamətində Azərbaycanın həyata keçirdiyi tədbirlər haqqında məlumat verib. Görülən tədbirlərin Avropa İttifaqı vətəndaşlarına sürətlə inkişaf edən Azərbaycanı tanımaları, münasibətləri inkişaf etdirmək üçün də əlverişli imkan yaratdığı qeyd olunub. Xidmət rəisi Azərbaycan ilə Avropa İttifaqı arasında əlaqələrin genişləndirilməsi istiqamətində həyata keçirilən tədbirlərdən danışıb. V.Hüseynov 2013-cü il dekabrın 5-də Brüsseldə imzalanmış “Azərbaycan Respublikası, Avropa İttifaqı və onun iştirakçı üzv dövlətləri arasında Yerdəyişmə üzrə Tərəfdaşlıq barədə Birgə Bəyannamə”nin də əhəmiyyətini vurğulayıb.
Xidmət rəisi DMX-nin də iştirak etdiyi, donoru və ya donorlarından biri Avropa İttifaqı olan və hazırda icrası davam etdirilən layihələrin bir platforma kimi önəminə diqqət çəkib. O, Beynəlxalq Miqrasiya Təşkilatının Azərbaycanda miqrasiya və sərhəd idarəçiliyi, həmçinin insan alverinə qarşı mübarizə üzrə potensialların gücləndirilməsi layihələrini qeyd edib. Həmçinin Miqrasiya Siyasətinin İnkişafı üzrə Beynəlxalq Mərkəzin “Azərbaycan Respublikası ilə Aİ arasında yerdəyişmə üzrə tərəfdaşlığın icrasına dəstək (MOBİLAZE)” layihəsi çərçivəsində görülən işlərdən bəhs olunub. Bu silsilədən BMT-nin Qaçqınlar üzrə Ali Komissarlığının “Şərqi Avropada və Cənubi Qafqazda sığınacaq sistemlərinin keyfiyyətinin artırılması təşəbbüsü” (ŞACQKT) layihəsi də xüsusi vurğulanıb.
Avropa İttifaqının Azərbaycandakı nümayəndəliyinin rəhbəri Kestutis Yankauskas görüşə görə minnətdarlığını bildirib. DMX ilə əməkdaşlığa önəm verdiklərini deyən qonaq DMX-nin prioritet hesab etdiyi sahələrə dəstək verməyə hazır olduqlarını söyləyib.
Görüşdə miqrasiya sahəsində əməkdaşlığa dair qarşılıqlı maraq doğuran məsələlər barədə geniş fikir mübadiləsi aparılıb.
Bölmənin digər xəbərləri
