Bakı, 6 noyabr, AZƏRTAC

Azərbaycanın paytaxtı Bakı növbəti mötəbər tədbirə - VIII Qlobal Bakı Forumuna ev sahibliyi edir. Nizami Gəncəvi Beynəlxalq Mərkəzinin təşkilatçılığı ilə "COVID-19-dan sonrakı dünya" mövzusu ilə ənənəvi Qlobal Bakı Forumu öz işinə başlayıb.

Panel iclaslarla davam edən forumda "COVID-19-dan sonra yaranan yeni dünya nizamı", "Yeni dünya iqtisadiyyatı", "Yeni dövrdə sülh, təhlükəsizlik və insan hüquqları", "İqlim dəyişikliyi ilə mübarizə və qlobal enerji tələbatının qarşılanması", "Səhiyyə və insanların peyvənd edilməsi" və başqa mövzularda müzakirələr aparılıb. 3 gün ərzində hibrid formatda davam edən foruma 40 ölkədən canlı və onlayn qaydada 300 nəfərə yaxın iştirakçı qatılıb. 2013-cü ildən etibarən keçirilən ənənəvi forumda dünyanın nüfuzlu sabiq dövlət və hökumət başçıları, beynəlxalq təşkilatların rəhbərləri, tanınmış ictimai-siyasi xadimlər, alimlər iştirak ediblər. Foruma qatılan iştirakçı sayının ildən ilə çoxalması ölkəmizin dünyada və regionda nüfuzunun daha da artmasının bariz nümunəsidir.

Bunu AZƏRTAC-a açıqlamasında “Gənc Nəslin Maarifləndirilməsi” İctimai Birliyinin sədri Mikayıl Həsənli deyib.

Sədr bildirib ki, noyabrın 4-dən keçirilən VIII Qlobal Bakı Forumu Azərbaycan Respublikasının Prezidenti İlham Əliyevin çıxışı ilə başlayıb. Prezident İlham Əliyev Forumun gündəliyinə uyğun olaraq “COVID-19-dan sonrakı dünya” mövzusu istiqamətində, eləcə də ölkəmizin pandemiya dövrü ərzində həyata keçirdiyi proqramlar, fəaliyyətlər barədə geniş məlumat verib.

Prezident İlham Əliyev çıxışının önəmli bir hissəsini 30 il həll olunmayan Ermənistan-Azərbaycan münaqişəsinin həll olunmasına həsr edib. Zəfərimizlə yekunlaşan 44 günlük İkinci Qarabağ müharibəsi barədə söz açaraq Azərbaycanın BMT qətnamələrini özünün icra etməsini xüsusi vurğulayıb. Azərbaycanın öz gücünə ərazi bütövlüyünü bərpa etməsəydi, beynəlxalq ictimaiyyətin laqeyd münasibəti şəraitində bu münaqişənin hələ uzun illər həllini tapmamış qalacağını deməsi, beynəlxalq ictimaiyyətə açıq bir mesaj idi. Azərbaycan 2010-ci ildən etibarən beynəlxalq arenada hər zaman bəyan edib ki, beynəlxalq hüquq çərçivəsində Qarabağ problemi həll olunmasa, Azərbaycan öz torpaqlarını hərbi yolla işğaldan azad edəcək.

Mikayıl Həsənli qeyd edib ki, hər il hərbi büdcəmizin artırılması, hərbi sahəyə ciddi önəm verilməsi ölkəmizin heç zaman ədalətsizliklə barışmayacağının, beynəlxalq hüququn işləməyəcəyi təqdirdə hərbi güc ilə öz tarixi torpaqlarını işğaldan azad etməyə hazır olmasına yönəlik addımlar idi. Müdafiə sənayesinin önəmliliyini artırmaq, Ordumuzun hərbi texniki bazasının gücləndirilməsi və bu sahədə xaricdən asılılığın azaldılması məqsədilə 2003-cü ildə ulu öndər Heydər Əliyev tərəfindən "Azərbaycan Respublikası müdafiə sənayesi müəssisələrinin 2003-2005-ci illərdə inkişafına dair Dövlət Proqramı" təsdiq edilib. Elə həmin tarixdən də respublikada müdafiə sənayesinin inkişafının yeni mərhələsinə qədəm qoyuldu. Hakimiyyət illərinin ilk dönəmindən ölkə iqtisadiyyatının digər sahələri ilə yanaşı, müdafiə sənayesinə də xüsusi diqqət ayıran Prezident İlham Əliyev 2005-ci ildə Azərbaycan Silahlı Qüvvələrini qısa müddət ərzində yerli istehsal hesabına təmin edəcək gücə qadir olan bir qurumun - Azərbaycan Respublikası Müdafiə Sənayesi Nazirliyinin yaradılmasına dair Sərəncam imzaladı. Ölkəmiz bütün sahələrdə olduğu kimi milli təhlükəsizlik siyasətinin həyata keçirilməsi, hərbi sahədə və digər sahələrdə milli maraqların təmin edilməsinə yönəlik işlər həyata keçirib. Dövlətimizin başçısının tapşırığına əsasən ölkəmizin milli təhlükəsizlik konsepsiyası və bu sənədin əsasında Hərbi Doktrinası hazırlanaraq qəbul olunub. Bütün bunları qeyd etməkdə məqsədim odur ki, yəni ölkəmiz müharibənin qaçılmaz olduğunu bilərək kompleks işlər həyata keçirib.

“Prezident İlham Əliyev bu Forum vasitəsilə bir daha bəyan etdi ki, biz artıq postmünaqişə vəziyyətindəyik və Ermənistana bir sıra təkliflər etmişik ki, sülh müqaviləsi üzərində işləməyə başlayaq, çünki biz müharibə deyil, sülh, gələcək haqqında danışmaq istəyirik. Əfsuslar olsun ki, bu təklifə hələ də cavab verilməyib. Eyni zamanda, biz hər iki ölkənin ərazi bütövlüyünü tanımaqla, dövlət sərhədlərimizin delimitasiyası və demarkasiyası üzərində işə başlamağı təklif etdik. Bu, həmçinin beynəlxalq hüquq normalarına və normal davranışa uyğundur. Bu təklifə də hələ baxılmayıb.

İstər müharibə zamanı hərbi gücümüz, istərsə də iqtisadi gücümüz bir daha göstərdi ki, Qafqazda söz sahibi olan Azərbaycanın torpaqlarını işğaldan azad etməsi bizim qürur məsələmiz olmaqla bərabər region üçün də önəm kəsb etməkdədir və bu gün qalib Azərbaycanın uzatdığı zeytun budağını Ermənistan nə qədər tez qəbul edərsə və ikili münasibətlərin düzəlməsi üçün addımlar atarsa, Ermənistan bu vəziyyətdən o qədər çox qazanmış olacaq. Azərbaycan işğala son qoymaqla bölgədə yeni geopolitik reallıqlar yaratmış oldu və bu reallıqlar bölgə ölkələri ilə bərabər qlobal güclərin də diqqətini çəkir”, - deyə Mikayıl Həsənli əlavə edib.

“Geosiyasi cəhətdən olduqca həssas regionda yerləşən Azərbaycan hər zaman bütün qonşuları ilə mehriban qonşuluq və sülh şəraitində yaşamağın tərəfdarı olub. Ölkəmiz Qarabağ probleminin artıq tarixdə qaldığını və sülh üçün addımların atılmasının önəmini vurğulayır. Azərbaycan yeni səhifə açaraq sülh üçün ikili münasibətlərin bərpa olunması naminə addımlar atmağa hazırdır və Ermənistana zeytun budağını çoxdan uzatmış bir ölkədir. Otuz il ərzində üçüncü ölkələrin əlində oyuncaq olan Ermənistan nəhayət ki, öz dövlətini qurmaq istəyirsə, qalib ölkəmizin sülh təkliflərini mütləq şəkildə dəyərləndirməlidir.

Bu illər ərzində dövlətimizin başçısı siyasəti və strategiyaları sayəsində ölkəmizi bölgənin önəmli gücünə çevirərək daha böyük hədəflər üçün irəliyə aparmağa davam edir. Azərbaycan ilə əməkdaşlıq etmək istəyən ölkələr, - sadəcə bölgə ölkələri deyil, qlobal güclər də, - həm siyasi, həm də iqtisadi münasibətləri gücləndirməyi hədəfləyir. Bu ölkələr arasında Böyük Britaniyanı misal göstərmək olar. “Birləşmiş Krallıq Azərbaycanın etibarlı tərəfdaşıdır”. Bu fikirlər Böyük Britaniya və Şimali İrlandiya Birləşmiş Krallığının Baş naziri Boris Consonun VIII Qlobal Bakı Forumuna müraciətində də yer alıb”, - deyə Malik Həsənli vurğulayıb.