Azərbaycan komandasının COP29 üzrə məlumatlandırma işi səmərəli oldu - RƏY
Bakı, 28 noyabr, AZƏRTAC
Azərbaycan COP29 sammitində informasiya açıqlığını təmin etmək üçün modern tətbiqlərin hamısından yararlandı. Ölkəmiz yerli və beynəlxalq statuslu media subyektlərinin, qeyri-hökumət təşkilatlarının konfransda rahat iştirakı üçün zəruri olan bütün addımları atdı. Hətta fəaliyyəti mübahisə doğuran media subyektlərinin də sammitdə iştirakına şərait yaradıldı. Tipindən, siyasi təmayülündən asılı olmayaraq, bütün media subyektləri və QHT-lər üçün COP29 sammitində bərabər iştirakçılıq şərtləri tanındı.
Bu sözləri AZƏRTAC-a açıqlamasında Mətbuat Şurası İdarə Heyətinin üzvü, media eksperti Müşfiq Ələsgərli söyləyib.
Onun sözlərinə görə, Azərbaycan ev sahibi qismində yeniliklər edərək COP29 üzrə qeydiyyata düşən xarici jurnalistlər və QHT təmsilçiləri üçün 2024-cü ilin may-iyun aylarında Almaniyanın Bonn şəhərində məlumatlandırıcı seminar-treninqlər də keçirdi. Rəsmi açıqlamadan məlum oldu ki, sammiti işıqlandırmaq üçün 200 nəfərdən çox yerli, 3000 nəfərdən çox xarici jurnalist qeydiyyatdan keçib. Onların sırasında dünyanın ən məşhur media qurumlarının nümayəndələrini gördük. Məsələn, milyonlarla izləyicisi olan BBC şirkəti COP29-u işıqlandırmaq üçün 20 nəfərdən çox əməkdaşını qeydiyyatdan keçirmişdi. Digər transmilli media subyektləri də mövzuya həssas yanaşmışdılar.
“Nəticə odur ki, COP29 sammiti üzrə informasiyalar qlobal xəbər gündəmində trendə çevrilib. İnternetdə axtarış sistemləri göstərir ki, sammitin keçirildiyi dövrdə beynəlxalq media subyektləri mövzu üzrə hər gün 10 minlərlə məlumat paylaşıblar. Ümumilikdə yayılan məqalələrin və məlumatların sayı 100 mindən çoxdur. Bu məlumatların mütləq əksəriyyəti dəqiq, obyektiv, qərəzsizdir. Yəni, onlar məlumatlandırma və maarifləndirmə funksiyasını icra ediblər.
COP29 üzrə məlumat yayan resursların siyahısı media subyektləri ilə məhdudlaşmır. Digər xarakterli informasiya resursları da sammiti diqqət mərkəzində saxlayıblar. Statistik məlumatların yayılmasına daha çox beynəlxalq təşkilatların, həmçinin tədqiqat mərkəzlərinin səhifələrində təsadüf edilir. Məsələn, Birləşmiş Millətlər Təşkilatının saytında COP29 sammitinin mahiyyəti, müzakirə edilən mövzular, həmçinin konfransa ev sahibliyi edən Azərbaycan barədə məlumatlandırıcı xarakterli çoxsaylı məqalələr yerləşdirilib. Təkcə BMT deyil, digər beynəlxalq təşkilatların, o cümlədən Avropa İttifaqının saytında da COP29 və Azərbaycan barədə statistik məlumatlar yer alıb.
Dünyanın məşhur tədqiqat mərkəzləri, institut və universitetləri də COP29-la bağlı 100-lərlə məqalə və məlumat yayıb. Məsələn, öz nüfuzuna və tarixinə görə dünyada 4-cü sayılan Kembric Universiteti (Cambridge Institute for Sustainability Leadership ) “What is COP29?” sərlövhəli geniş məqalə dərc edib və orada həm COP29, həm də Azərbaycan barədə geniş məlumatlar açıqlanıb”, - deyə M.Ələsgərli vurğulayıb.
Ekspert əlavə edib ki, ekoloji mövzuda tədqiqatlar aparan beynəlxalq mərkəzlərin COP29 barədə yaydıqları materialların sayı isə daha çoxdur. Bu kontekstdə İUCA (International Universities Climate Alliance) qismində birliklərin fəaliyyəti diqqət çəkir. Alyans “UN Climate Change Conference - COP29” başlıqlı xüsusi rubrika yaradıb və bu başlıq altında 10-larca məqalə yayımlayıb. Belə institutların, elmi mərkəzlərin Bakı Sammiti barədə paylaşdıqları materialların sayı kifayət qədər çoxdur. Demək olar ki, COP29 Azərbaycanın ev sahibi olaraq təqdim etdiyi modullar sayəsində tədqiqat mərkəzlərinin, beynəlxalq təşkilatların araşdırma predmetinə çevrildi, hələ uzun illər ərzində müzakirə ediləcək mövzu kimi tarixə düşdü.
Eyni yanaşma transsərhəd və transmilli media subyektlərinin səhifələrində də müşahidə olunur. COP29 sammitində 196 ölkədən rəsmi nümayəndə heyətləri iştirak etdi. Həmin ölkələrin media resurslarında ən azı öz nümayəndə heyətlərinin səfərləri barədə informasiya verildiyini nəzərə alsaq, o zaman beynəlxalq media qurumlarında COP29 və Azərbaycan barədə nə qədər çox məlumatlandırıcı informasiyanın yayıldığını təsəvvür edə bilərik.
Yekun nəticə budur ki, Azərbaycan komandasının COP29 üzrə məlumatlandırma işi səmərəli oldu. Sammitdə müzakirə olunan mövzular, Azərbaycanın ev sahibliyi üzrə peşəkar fəaliyyəti barədə zəruri informasiyalar beynəlxalq ictimai rəyə uğurla çatdırıla bildi. Azərbaycanın COP29-a uğurlu ev sahibliyi etməsi barədə məqalələrin sayı beynəlxalq media məkanında minlərlədir. Əminliklə deyə bilərik ki, ölkəmizin adı qlobal informasiya məkanında kəmiyyət baxımından heç zaman indiki qədər yüksək, məzmun baxımından bu qədər zəngin olmayıb.
Bölmənin digər xəbərləri
