AZƏRTAC xəbər verir ki, iyulun 14-də Bakıda “Hyatt Regensy-Naxçıvan” mehmanxanasında Azərbaycan Respublikası Konstitusiya Məhkəməsinin 10 illiyinə həsr olunmuş “Konstitusiya məhkəməsi qərarlarının icrası konstitusiya ədalət mühakiməsinin həyata keçirilməsi prosesinin mühüm mərhələsi kimi” mövzusunda beynəlxalq konfrans keçirilmişdir.

Almaniya Texniki Əməkdaşlıq Cəmiyyəti (GTZ) və Avropa Şurası Venesiya Komissiyasının birgə təşkilatçılığı ilə keçirilən beynəlxalq konfransın iştirakçıları əvvəlcə Fəxri xiyabana gələrək, müstəqil Azərbaycan dövlətinin memarı və qurucusu, ümummilli lider Heydər Əliyevin xatirəsini ehtiramla anmış və məzarı önünə əklil qoymuşlar.

Görkəmli oftalmoloq alim, akademik Zərifə xanım Əliyevanın məzarı üzərinə də gül-çiçək dəstələri düzülmüşdür.

Azərbaycanın Dövlət himninin səslənməsi ilə başlayan konfransda Prezidentin İcra Aparatının hüquq mühafizə orqanları ilə iş şöbəsinin müdiri Fuad Ələsgərov Prezident İlham Əliyevin Konstitusiya Məhkəməsinin yaradılmasının onuncu ildönümü münasibətilə təbrik məktubunu oxumuşdur (Məktubun mətni qəzetin bugünkü nömrəsində dərc olunur).

Konstitusiya Məhkəməsinin sədri Fərhad Abdullayev qurumun yaranma tarixindən, fəaliyyət göstərdiyi dövrdə həyata keçirdiyi tədbirlərdən, dövlət hakimiyyəti sistemindəki mühüm rolundan danışmışdır. Qeyd olunmuşdur ki, müstəqil Azərbaycanda 1993-cü ildən başlayaraq həyata keçirilən irimiqyaslı islahatlar nəticəsində ölkəmiz davamlı sosial-iqtisadi yüksəlişə nail olmuş, əhalinin rifahının yüksəlməsi istiqamətində mühüm addımlar atılmışdır. Bu gün Azərbaycan çox yüksək iqtisadi inkişaf göstəricilərinə malik ölkələr sırasındadır.

F.Abdullayev vurğulamışdır ki, qeyd olunan amillər Azərbaycanda, həmçinin qanunvericilik, məhkəmə-hüquq, institusional və digər sahələrdə ciddi islahatların aparılmasına, sosial-mədəni, hüquqi dəyərlərin inkişafına zəmin yaratmışdır. 1995-ci ildə ulu öndər Heydər Əliyevin rəhbərliyi altında hazırlanaraq ümumxalq səsverməsi yolu ilə qəbul edilmiş Konstitusiyamız ölkədə demokratik, hüquqi dövlət quruculuğuna, vətəndaş cəmiyyətinin yaradılmasına və hüquq sisteminin müasir tələblərə uyğun formalaşmasına geniş imkanlar açmışdır.

Konstitusiyanın müddəalarından irəli gələn prinsiplərin həyata keçirilməsində, onun aliliyinin təmin edilməsində mühüm rola malik olan Konstitusiya Məhkəməsinin yaranmasından keçən 10 ilə nəzər salan natiq, bu orqanın ölkəmizdə demokratik, hüquqi, dünyəvi dövlət quruculuğu prosesində fəal iştirak etdiyini, qəbul etdiyi qərarlarla hər bir vətəndaşın Əsas Qanuna və digər qanunlara hörmət və ehtiramının, ədalət, azadlıq və humanizm kimi prinsiplərin möhkəmləndirilməsinə, demokratiyanın və hüquq mədəniyyətinin inkişafına dəyərli töhfələr verdiyini qeyd etmişdir. Vurğulanmışdır ki, məhkəmə ötən dövrdə insan hüquq və azadlıqlarının müdafiəsi istiqamətində fəaliyyətini daim təkmilləşdirmiş, beynəlxalq təcrübəni, o cümlədən İnsan Hüquqları üzrə Avropa Məhkəməsinin presedent hüququnu mənimsəməyə və tətbiq etməyə çalışmışdır.

F.Abdullayev Konstitusiya Məhkəməsinin fəaliyyəti dövründə 150 qərar, o cümlədən fərdi şikayətlər üzrə 58 qərar qəbul olunduğunu diqqətə çatdırmışdır. Bildirmişdir ki, bu qərarlarda bir sıra normativ hüquqi aktlar Konstitusiyaya uyğun olmadığına görə qüvvədən düşmüş hesab edilmiş, Əsas Qanunun və digər qanunların ayrı-ayrı müddəaları şərh edilmiş, pozulmuş hüquq və azadlıqların bərpa olunması ilə yanaşı, mövcud təlimatlar sistemi təkmilləşdirilmiş, zəruri hüquqi mövqelər formalaşdırılmışdır.

Konstitusiya Məhkəməsinin sədri qeyd etmişdir ki, bu gün insan hüquq və azadlıqları dövlətlərin müstəsna daxili işi olmaqdan kənara çıxaraq, bütün beynəlxalq ictimaiyyətin ümumi problemi kimi nəzərdən keçirilir. Təsadüfi deyildir ki, xalqımızın ümummilli lideri Heydər Əliyevin siyasi xəttinin layiqli davamçısı Prezident İlham Əliyevin həyata keçirdiyi siyasətdə beynəlxalq birliyə hərtərəfli inteqrasiya dövlətimizin əsas prioritetlərindən biri kimi müəyyənləşdirilmişdir. Bu siyasət çərçivəsində Azərbaycanda demokratik prinsiplərin bərqərar olmasına, sivil dəyərlərin cəmiyyətimizdə layiqli yerini tutmasına və dövlətimizin modernləşdirilməsi prosesinə yönəlmiş bir sıra mühüm işlər görüldüyü qeyd edilmişdir.

Konfransın çox aktual və vacib bir məsələyə - Konstitusiya Məhkəməsinin qərarlarının icrası probleminə həsr edildiyini qeyd edən F.Abdullayev əmin olduğunu bildirmişdir ki, aparılacaq müzakirələr və fikir mübadiləsi həmin istiqamətdə işin təşkilinə əhəmiyyətli təsir göstərəcəkdir.

Milli Məclis sədrinin birinci müavini Ziyafət Əsgərov, Avropa Şurası Venesiya Komissiyasının katibi Canni Bukikkio, Almaniya Texniki Əməkdaşlıq Cəmiyyətinin layihə rəhbəri Tomas Herman Konstitusiya Məhkəməsinin kollektivini yubiley münasibətilə təbrik edərək onlara uğurlar arzulamışlar. Qeyd olunmuşdur ki, təsis edilməsindən qısa bir dövr keçməsinə baxmayaraq, Azərbaycan Konstitusiya Məhkəməsi əldə etdiyi nailiyyətlərlə həm respublikanın dövlət hakimiyyəti sistemində fəal rol oynamış, həm də beynəlxalq aləmdə əlaqədar sahədə geniş nüfuz qazanmış quruma çevrilmişdir.

Sonra əslən bakılı, Qazaxıstan Respublikası Konstitusiya Şurasının sədri İqor Roqov “ Qazaxıstan Respublikası Konstitusiya Şurasının qərarlarının qanunvericiliyə və hüquqtətbiqetmə təcrübəsinə təsiri”, Türkiyə Konstitusiya Məhkəməsinin hakimi Sacit Adalının “Konstitusiya Məhkəməsinin qərarlarının icrasında Türkiyə təcrübəsi”, İnsan Hüquqları üzrə Avropa Məhkəməsinin hakimi Xanlar Hacıyevin “İnsan Hüquqları üzrə Avropa Məhkəməsinin qərarlarının milli səviyyədə icrası”, Macarıstan Respublikası Konstitusiya Məhkəməsinin sədri Piter Pakjolayın “Macarıstanda qanunvericilik boşluğu barədə elan edilən Konstitusiya Məhkəməsinin qərarlarının icra edilməsi təcrübəsi”, Moldova Konstitusiya Məhkəməsinin sədri Dmitri Pulberin “Moldova Konstitusiya Məhkəməsinin qərarlarının icrası - təhlil və aspektləri”, Gürcüstan Konstitusiya Məhkəməsinin sədri Georgi Papuaşvilinin “Gürcüstan Konstitusiya Məhkəməsinin qərarlarının icrası - qanunvericilik, təcrübə və problemlər”, Azərbaycan Respublikası Konstitusiya Məhkəməsinin hakimi Bəhman Qəribovun “İnsanın konstitusiya hüquq və azadlıqlarının təmin edilməsinə Azərbaycan Konstitusiya Məhkəməsinin töfhəsi”, Rusiya Federasiyası Konstitusiya Məhkəməsinin hakimi Qadis Hacıyevin ”Konstitusiya icraedici icraatının əsas problemləri”, Latviya Konstitusiya Məhkəməsinin sədri Qunars Kutrisin “Konstitusiya Məhkəməsinin nüfuzu onun qərarlarının icrasının mütləq şərti kimi“, Çex Respublikasının Konstitusiya Məhkəməsi sədrinin müavini Elişka Vaqnerovanın “Qərarların növləri konstitusiya ədalət mühakiməsinin səmərəliliyinə töhfə kimi”, İsrail Ali Məhkəməsi sədrinin müavini Elizer Rivlinin “Konstitusiya Məhkəməsinin qərarlarının icrası-İsrailin təcrübəsi”, Almaniya Federativ Respublikası Konstitusiya Məhkəməsinin hakimi Ziqfrid Brossun “Demokratik və hüquqi dövlətdə Konstitusiya Məhkəməsinin qərarlarının icrası ilə bağlı mülahizələr”, Litva Konstitusiya Məhkəməsinin hakimi Romualdas Kestitis Urbaitisin “Litva Respublikası Konstitusiya Məhkəməsi aktlarının icrası”, Koreya Respublikası Konstitusiya Məhkəməsinin hakimi Yonq-Jun Mokun “Koreya Respublikası Konstitusiya Məhkəməsinin qərarlarının hüquqi qüvvəsi və icrası”, Belarus Konstitusiya Məhkəməsinin hakimi Liliya Kozırevanın “Belarus Respublikası Konstitusiya Məhkəməsinin qərarlarının icrasının səmərəliliyi haqqında” və Rumıniya Konstitusiya Məhkəməsinin nümayəndəsi Klaudia Miunun “Rumıniya Konstitusiya Məhkəməsinin qəraralarının dövlət hakimiyyəti orqanları üçün məcburi qüvvəsi” mövzularında məruzələri dinlənilmişdir.

Məruzələr ətrafında müzakirələrdən sonra Azərbaycan Konstitusiya Məhkəməsinin sədri Fərhad Abdullayev konfransın işinin maraqlı keçməsində göstərdikləri fəallığa görə iştirakçılara minnətdarlığını bildirmiş, aparılmış fikir mübadilələrinin gələcək fəaliyyətə mühüm təsir göstərəcəyini qeyd etmişdir.

######