AZƏRBAYCAN KORRUPSİYANIN SƏVİYYƏSİNİN AZALDIĞI ÖLKƏLƏR SIRASINDADIR
Təqdimatda bildirilmişdir ki, “Korrupsiyanın qavranma indeksi” əvvəlkindən daha çox, 163 ölkəni əhatə etmişdir. İndeksdə ötən il ərzində korrupsiyanın səviyyəsinin artdığı və ya azaldığı ölkələr və onların bu sahədə əldə etdikləri ballar əks olunmuşdur. İndeksə görə, Azərbaycan Respublikası təkcə keçən illə müqayisədə deyil, həm də son 4 il ərzində korrupsiyanın səviyyəsinin azaldığı ölkələr sırasındadır. Bu məqam təqdimat müddətində müxtəlif ekspertlər tərəfindən dəfələrlə vurğulanmış və korrupsiyaya qarşı mübarizə sahəsində əsaslı irəliləyiş kimi qeyd edilmişdir. Belə ki, əgər 2003-cü ildəki indeksdə Azərbaycanın korrupsiyaya qarşı mübarizə sahəsində balı 1,8, 2004-cü ildə 1,9, 2005-ci ildə 2,2 idisə, 2006-cı ildə bu rəqəm 2,4 bala yüksəlmişdir. Bu isə deməyə imkan verir ki, Azərbaycanda korrupsiyaya qarşı mübarizə sahəsində həyata keçirilən islahatlar bütün beynəlxalq təşkilatlar tərəfindən yüksək qiymətləndirilir.
Bununla belə, təqdimatda iştirak edən nümayəndələr bildirmişlər ki, Azərbaycanın irəliləyiş əldə edən ölkə kimi göstərilməsinə baxmayaraq, bu indeks respublikada korrupsiyanı və ona qarşı mübarizəni tam əks etdirmir. İndeks müəlliflərinin də göstərdiyi kimi, “Transparency İnternational” təşkilatının indeksi yalnız üç il bundan əvvəlki, yəni 2003-cü ilə qədərki vəziyyəti əks etdirir. Azərbaycan Respublikasında korrupsiyaya qarşı mübarizə sahəsində son üç il ərzində ciddi tədbirlər həyata keçirilmişdir. Korrupsiyaya qarşı Dövlət Proqramı və korrupsiyaya qarşı mübarizə haqqında qanun qəbul olunmuş, müvafiq qanunlara dəyişikliklər edilmişdir. Korrupsiyaya qarşı mübarizə aparan ixtisaslaşmış qurumlar - Korrupsiyaya Qarşı Mübarizə üzrə Komissiya və Baş prokuror yanında Korrupsiyaya Qarşı Mübarizə İdarəsi yaradılmış, həmin qurumlar tərəfindən praktik tədbirlər görülmüşdür. Dövlət qulluğuna şəffaf əsaslarla qəbul və dövlət orqanlarının fəaliyyəti sahəsində islahatlar aparılmışdır. Bundan əlavə, əhalinin həyat səviyyəsinin yüksəldilməsi, sosial müdafiəsinin gücləndirilməsi, əmək haqlarının əsaslı surətdə artırılması üçün bir sıra iqtisadi və sosial islahatlar həyata keçirilmişdir. Bütün bunlar Azərbaycan dövlətinin korrupsiyaya qarşı mübarizədə siyasi iradəsini nümayiş etdirir. Bu tədbirlər son üç il ərzində görüldüyündən, onlar İndeksdə öz əksini tapmamışdır. Əgər indeks son üç il ərzində görülmüş işləri əhatə etsəydi, onda Azərbaycanın balı və yeri daha yüksək olardı.
Təqdimat mərasimində iştirak edən Korrupsiyaya Qarşı Mübarizə üzrə Komissiyanın üzvləri həmçinin bildirmişlər ki, Azərbaycan Respublikası korrupsiyaya qarşı mübarizə sahəsində tədbirlərin həyata keçirilməsində qeyri-hökumət təşkilatları ilə əməkdaşlığa böyük əhəmiyyət verir. “Transparency İnternational” təşkilatı ilə Azərbaycan Respublikası arasında səmərəli əməkdaşlıq həyata keçirilir. Buna bariz nümunə kimi Azərbaycanın 4 şəhərində “Transparency İnternational” təşkilatının “İctimai Maraqların müdafiəsi və Hüquq Məsləhət Mərkəzləri”nin açılmasını, onların təşkilində dövlət orqanlarının yaxından iştirak etməsini göstərmək olar. Belə layihələrin gələcəkdə də genişləndirilməsi nəzərdə tutulur. “Transparency İnternational” və digər qeyri-hökumət təşkilatları Komissiyanın və başqa dövlət orqanlarının fəaliyyətinə cəlb edilmişlər. Bu ilin sentyabrında “Transparency İnternational” təşkilatının Avropa və Mərkəzi Asiya ölkələri üzrə regional direktoru Mikloş Marşal Azərbaycana səfər etmiş və gələn il bu təşkilatın regional görüşünün Bakıda keçirilməsi barədə razılıq əldə olunmuşdur.
Bölmənin digər xəbərləri
