Azərbaycan məhsullarının Birləşmiş Ərəb Əmirliklərinə ixrac edilməsi ilə bağlı məsələlər müzakirə olunub
Əbu-Dabi, 1 mart, AZƏRTAC
Azərbaycanın Birləşmiş Ərəb Əmirliklərindəki səfiri Daşqın Şikarov bu ölkənin iqlim dəyişikliyi və ətraf mühit naziri Tani bin Əhməd əl Zeyudi ilə görüşüb.
Səfir Azərbaycan və Birləşmiş Ərəb Əmirlikləri arasında əlaqələrin ümummilli lider Heydər Əliyev və Şeyx Zayed əl Nəhyan tərəfindən yaradılması, inkişaf edən ikitərəfli siyasi və iqtisadi əlaqələr, son nailiyyətlər və həyata keçirilən tədbirlər barədə danışıb. O, Azərbaycanın iqlim dəyişikliyi ilə mübarizəyə və ətraf mühitin qorunmasına verdiyi diqqət, neft və qaz hasil edən ölkə olduğundan ətraf mühitə tullantıların azaldılması məqsədilə müasir texnologiya və təcrübələrə külli miqdarda vəsait sərf etməsi, beynəlxalq müstəvidə bu sahədə əməkdaşlıq etməsi, Paris Müqaviləsinin üzvü olması haqqında məlumat verib. Davamlı iqtisadi inkişaf yolunu tutmuş Azərbaycanın əldə etdiyi nailiyyətlərə toxunan səfir ölkəmiz tərəfindən həyata keçirilən iqtisadi, humanitar, mədəni, idman və incəsənət tədbirləri barədə də danışıb. O, bütün sahələrdə inkişaf edərək dünyada nüfuz sahibi ölkəyə çevrilmiş Azərbaycanın tək problemi olan ərazilərinin Ermənistan tərəfindən işğalı və bunun nəticəsində yaranmış humanitar və iqtisadi problemlər, Ermənistanın işğal altında saxladığı ərazilərdə ətraf mühitə verdiyi zərər, nüvə tullantılarını bu torpaqlarda basdırması, təbii sərvətləri talan etməsi, bununla yanaşı, məscid və digər tarixi, mədəni abidələri dağıtması barədə ətraflı məlumat verib.
Nazir iqlim dəyişikliyinin getdikcə daha vacib xarakter aldığı, Körfəz regionunun bu dəyişikliklərdən daha çox əziyyət çəkdiyi, bu səbəbdən ölkəsinin bu sahədə görülən tədbirləri artırması barədə məlumat verib. O, neft mühəndisliyi sahəsində işlədiyi zamanlarda Azərbaycanda olduğunu, ölkəmizin gözəlliyinə heyran qaldığını, müvafiq sahələrlə tanış olduğunu diqqətə çatdırıb.
İqlim Dəyişikliyi və Ətraf Mühit Nazirliyinin müvafiq sahə ilə yanaşı, BƏƏ-yə idxal olunan məhsulların sertifikatlaşdırılması sahəsində də fəaliyyətinə toxunan səfir Azərbaycanın iqtisadi və ticarət nöqteyi-nəzərindən bu ölkəyə xüsusi diqqət verməsi, mükəmməl coğrafi mövqeyinə və təbii şəraitinə görə Azərbaycanda bir çox kənd təsərrüfatı məhsullarının yetişdirilməsi, BƏƏ-də bu məhsullara daim tələbatın olması, məhsullarımızın bu bazara çıxarılması üçün əlavə tədbirlər görülməsi barədə danışıb. Şirkətlərimizin BƏƏ bazarına çıxışını asanlaşdırmaq üçün nazirliklə əməkdaşlığa ehtiyac duyulduğunu deyən Daşqın Şikarov BƏƏ-yə verilən xüsusi diqqəti bir daha qeyd edərək, Azərbaycanın dörd ticarət nümayəndəsindən birinin məhz bu ölkəyə təyin edilməsinin bunun göstəricisi olduğunu diqqətə çatdırıb.
Görüşdə iştirak edən Azərbaycanın Birləşmiş Ərəb Əmirliklərindəki ticarət nümayəndəsi Elnur Əliyev Azərbaycan məhsullarının BƏƏ və region ölkələri bazarına çıxarılması məqsədilə görülən tədbirlər barədə məlumat verib, məsulların sertifikatlaşdırılması sahəsində işlərin operativ və məhsuldar şəkildə qurulması üçün nazirliklə sıx əməkdaşlığın vacib olduğunu diqqətə çatdırıb.
Səfirin müavini Leyla Süleymanova Azərbaycanda və müxtəlif ölkələrdə bir çox təhsil, mədəniyyət və xeyriyyə layihələri həyata keçirən Heydər Əliyev Fondu tərəfindən ekoşəhərciklərin salınması layihəsinin olduğu barədə məlumat verib, gələcəkdə BƏƏ ilə əməkdaşlığın gündəliyinə bu sahədə birgə təşəbbüslər həyata keçirilməsinin daxil olunmasını təklif edib. Nazir bu sahədə əməkdaşlığın maraqlı ola biləcəyini deyib.
Asya Hacızadə
AZƏRTAC-ın xüsusi müxbiri
Əbu-Dabi
Bölmənin digər xəbərləri
