Körfəz ölkələrində neft hasilatı oktyabr ayına qədər bərpa oluna bilər
Bakı, 19 iyun, AZƏRTAC
İranla bağlı münaqişənin bitməsindən sonra Körfəz ölkələrində neft hasilatı oktyabr ayına qədər bərpa oluna bilər.
AZƏRTAC “Bloomberg” agentliyinə istinadla xəbər verir ki, Amerikanın “Goldman Sachs” bankının mütəxəssislərinin hesablamalarına görə, hazırda Hörmüz boğazından gündə təxminən 1,3 milyon barel neft və neft məhsulları keçir. Bu rəqəmin iyulun sonuna qədər 13 milyon barel artacağı gözlənilir. Bununla belə, ekspertlər qeyd edirlər ki, hasilat tam bərpa olunduqdan sonra belə, boğazdan keçən daşımaların həcmi müharibədən əvvəlki səviyyənin 70 faizini keçməyəcək, çünki münaqişə zamanı istehsalçılar Qırmızı dəniz sahilindəki Yanbu əl-Bəhr limanına boru kəmərləri də daxil olmaqla, neft və neft məhsullarının daşınması üçün alternativ yollar tapıblar.
Həmçinin əvvəllər bildirilmişdi ki, Səudiyyə Ərəbistanının dövlət neft şirkəti olan “Saudi Aramco” Yaxın Şərqdəki münaqişə fonunda fasiləsiz enerji təchizatının təmin edilməsi üçün strateji ehtiyatların vacibliyini nəzərə alaraq qlobal neft saxlama şəbəkəsini genişləndirməyi düşünür.
İyunun 14-də ABŞ və İran münaqişəyə son qoymaq məqsədi daşıyan anlaşma memorandumu barədə razılığa gəldiklərini açıqlayıb. Vasitəçi qismində çıxış edən Pakistanın Baş naziri Şahbaz Şərifin sözlərinə görə, sənəd artıq qüvvəyə minib. O əlavə edib ki, ilk addım olaraq, İran fevralın 28-də hərbi əməliyyatların başlamasından bəri pozulan Hörmüz boğazını dərhal açacaq.
Xatırladaq ki, ABŞ və İsrailin İrana qarşı hərbi əməliyyatları fevralın 28-də başlayıb. Tehran da daxil olmaqla, İranın böyük şəhərlərinə zərbələr endirilib. İranın İslam İnqilabı Keşikçiləri Korpusu isə İsrailə hücum edərək genişmiqyaslı cavab əməliyyatı elan edib. Bəhreyn, İordaniya, İraq, Qətər, Küveyt, BƏƏ və Səudiyyə Ərəbistanındakı ABŞ hərbi obyektlərinə də zərbələr endirilib. Bundan əlavə, İran hakimiyyəti ABŞ, İsrail və İslam Respublikasına qarşı təcavüzü dəstəkləyən ölkələrlə əlaqəli gəmilər üçün Hörmüz boğazını bağlamaq qərarına gəlmişdi. Dünya neft ticarətinin təxminən 25 faizi və mayeləşdirilmiş təbii qazın təqribən 20 faizi Hörmüz boğazından daşınır.
Bölmənin digər xəbərləri
