AZƏRBAYCAN MOK-UN PREZİDENTİ, MİLLİ MƏCLİSİN DEPUTATI İLHAM ƏLİYEVİN MALAYZİYADA İŞGÜZAR GÖRÜŞLƏRİ
Xəbər verildiyimiz kimi, Malayziyanın paytaxtı Kuala-Lumpur şəhərində Milli Olimpiya Komitələri Assosiasiyasının (MOKA) XIII Baş Assambleyası keçirilir. Assambleyanın işində Azərbaycan Milli Olimpiya Komitəsinin prezidenti, Milli Məclisin deputatı İlham Əliyev iştirak edir. Mayın 21-də Kuala-Lumpur şəhərində Avropa Olimpiya Komitəsinin (AOK) növbədənkənar assambleyası keçirilmiş, Beynəlxalq Olimpiya Komitəsində MOKA-nı Avropadan təmsil edəcək nümayəndələr seçilmişdir.
Mayın 22-də MOKA-nın Baş Assambleyası öz işinə başlamışdır. Həmin gün MOKA-nın qitələr üzrə vitse-prezidentlərinin raportları və Assosiasiya komissiyalarının fəaliyyəti haqqında məlumatlar dinlənilmişdir. Günün ikinci yarısında MOKA prezidentinin seçkiləri keçirilmişdir Mario Vaskes Rana yenidən MOKA-nın prezidenti seçilmişdir.
Həmin gün Azərbaycan MOK-un prezidenti İlham Əliyevin bir sıra işgüzar görüşləri olmuşdur. MOKA-nın prezidenti Mario Vaskes Rana ilə görüşdə Azərbaycan Milli Olimpiya Komitəsinin fəaliyyəti, respublikada olimpiya hərəkatının genişləndirilməsi sahəsində son illərdə əldə etdiyi uğurlar, komitənin gələcək fəaliyyəti barədə söhbət getmişdir. Cənab Mario Vaskes Rana Azərbaycan MOK-un gördüyü işləri yüksək qiymətləndirmiş, bu təcrübənin yayılmasının vacibliyini bildirmişdir. Görüşdə MOKA ilə Azərbaycan MOK arasında əlaqələrin və əməkdaşlığın daha da genişləndirilməsinə dair fikir mübadiləsi aparılmışdır.
Azərbaycan Milli Olimpiya Komitəsinin prezidenti İlham Əliyev ilə Avropa Olimpiya Komitəsinin prezidenti Mario Peskante arasında görüş də işgüzar və səmimi şəraitdə keçmişdir. Görüşdə MOK-un ölkə daxilindəki fəaliyyəti və AOK-un tədbirlərində iştirakı barədə söhbət getmişdir. Cənab Mario Peskante Azərbaycana səfərini xatırlamış, ötən müddətdə MOK-un gördüyü yeni işlərdən məmnun olduğunu söyləmiş, Azərbaycanda olimpiya hərəkatının və idmanın yüksək sürətlə inkişafını alqışlamışdır.
MOK-un prezidenti İlham Əliyevin növbəti görüşü Beynəlxalq Olimpiya Komitəsinin (BOK) vitse-prezidenti Vitali Smirnovla olmuşdur. Səmimi və işgüzar şəraitdə keçən bu görüşdə beynəlxalq olimpiya hərəkatının bir çox məsələləri ətrafında söhbət getmiş, MOK ilə BOK arasında əlaqələrin genişləndirilməsi yolları müzakirə olunmuşdur.
Elə həmin gün İlham Əliyev AOK-un baş katibi Patrik Hikey və bir sıra ölkələrin milli olimpiya komitələrinin prezidentləri ilə görüşmüşdür. Bu görüşlərdə də MOK-un fəaliyyəti, onun olimpiya hərəkatının inkişafı sahəsində əldə etdiyi nailiyyətlərdən danışılmış, təcrübə mübadiləsi aparılmışdır.
İlham Əliyev daha sonra Beynəlxalq Ağırlıqqaldırma Federasiyasının prezidenti Tomaş Ayanla görüşmüşdür. Cənab Tomaş Ayan bu yaxınlarda Azpərbaycana səfərini xatırlayaraq, ölkə cempionatı barədə təəssüratını danışmış, əvvəlki səfərindən cəmi bir il keçməsinə baxmayaraq, idman səhəsində olduqca böyük irəliləyişin olduğunu vurğulamışdır. O, Azərbaycanda ağır atletika üzrə nəinki Avropa, hətta dünya cempionatlarının keçirilməsi üçün hər cür şəraitin olduğunu bildirmişdir.
Milli Olimpiya Komitəsinin prezidenti İlham Əliyev cənab Tomaş Ayanın Azərbaycana səfəri zamanı Bakıda olmamasına təəssüfləndiyini bildirmiş, ölkəmizdə idmanın və olimpiya hərəkatının inkişafı barədə xoş sözlərə görə ona təşəkkür etmişdir. Əmin olduğunu bildirmişdir ki, İlham Əliyev Beynəlxalq Ağırlıqqaldırma Federasiyasının Azərbaycanla əlaqələri bundan sonra da inkişaf edəcəkdir.
MOKA-nın XIII Baş Assambleyası mayın 23-də öz işini davam etdirəcəkdir.
Bölmənin digər xəbərləri
