AZƏRBAYCAN MUSİQİÇİLƏRİ NORVEÇDƏ FESTİVALDA İŞTİRAK EDƏCƏKLƏR
Avqustun 25-dən 31-dək Norveçin Stavanger şəhərində 15-ci “Ofşor Şimal neft-qaz” beynəlxalq sərgi-konfransı keçiriləcəkdir. Sərgi-konfrans çərçivəsində musiqi festivalının keçirilməsi də planlaşdırılmışdır. Avqustun 27-dən 31-dək davam edəcək festivalda 42 ölkənin nümayəndələrinin iştirakı gözlənilir.
Uzaq Skandinaviyada respublikamızı xalq artisti, Bakı Musiqi Akademiyasının professoru Ramiz Quliyev, gənc tarzən, Prezident təqaüdçüsü Əyyub Quliyev və pianoçu Zülfiyyə Sadıqova təmsil edəcəklər. Azərbaycan musiqiçilərinin proqramına dahi Üzeyir Hacıbəyovun “Koroğlu” operasının uvertürası və muğamlar daxildir.
Bundan əlavə, Ramiz və Əyyub Quliyevlərin beş solo konserti də nəzərdə tutulmuşdur. Həmin konsertlərdə dinləyicilərə 15 ölkənin - Azərbaycan, Avstriya, Almaniya, Rusiya, Fransa, Norveç, Yunanıstan, Çexiya, Macarıstan, Rumıniya və s. - bəstəkarlarının əsərləri təqdim olunacaqdır.
Bölmənin digər xəbərləri
