AZƏRBAYCAN PƏHLƏVANLARI DÜNYA ÇEMPİONATININ İLK GÜNÜNDƏ BİR QIZIL VƏ BİR BÜRÜNC MEDAL QAZANMIŞLAR
İstanbulda gənclər arasında güləs üzrə dünya çempionatının ilk günündə mübarizəyə qatılmış 4 Azərbaycan idmançısı görüşləri başa vurmuşdur.
Azərbaycan Güləş Federasiyasından AZƏRTAC-a bildirmişlər ki, yığma komandamızın üzvü Elvin Mürsəliyev (74 kq) bir-birinin ardınca Koreya Respublikası, Hindistan, Özbəkistan və İran təmsilçilərinə qalib gələrək finala vəsiqə qazanmışdır. Həlledici görüşdə, o, Alxazur Özdiyevi (Qazaxıstan) məğlub edərək qızıl medalın sahibi olmuşdur.
60 kiloqram çəki dərəcəsində çıxış edən Hacıxan Mustafayev isə ilk qarşılaşmanı məğlubiyyətlə başa vurmuş, onun rəqibi finaladək irəlilədiyindən Azərbaycan təmsilçisi təsəlliverici görüşlərə qatılmalı olmuşdur. H.Mustafayev bürünc medalı qazanmaq üçün Ermənistan təmsilçisi Varam Xaçatryanı məğlub etməli idi. Azərbaycan pəhləvanı bu şərəfli işin öhdəsindən layiqincə gəlmiş və rəqibin kürəyini yerə vuraraq 3-cü yerə çıxmışdır.
Digər idmançılarımız Xurşud Babaşov (50 kq) və Səməd Cəbrayılov (96 kq) isə dünya çempionatını nəticəsiz başa vurmuşlar.
Mübarizəni bu gün yunan-Roma güləşçiləri davam etdirəcəklər.
Bölmənin digər xəbərləri
