Azərbaycan Respublikasının Prezidenti Heydər Əliyev martın 30-da Prezident iqamətgahında Çin Xalq Respublikasının ölkəmizdə yeni təyin olunmuş səfiri Çjan Siyunun etimadnaməsini qəbul etmişdir. 

Səfir cənab ÇJAN SIYUN etimadnaməsini Azərbaycan dövlətinin başçısına təqdim edərək dedi:

-Cənab Prezident!

Mənim Azərbaycan Respublikasında förqəladə və səlahiyyətli səfir təyin olunmağım haqqında Çin Xalq Respublikası Sədrinin imzaladığı etimadnaməni bu gün Sizə təqdim etməkdən böyük şərəf duyuram.

Cənab Prezident, mən Sədr Tszyan Tszeminin səmimi salamını və ən gözəl arzularını Sizə çatdırmaq kimi xoş bir tapşırığı da yerinə yetirirəm.

Cənab Prezident, Çin Azərbaycana özü üçün dost bir ölkə kimi baxır və qarşılıqlı münasibətlərimizi Azərbaycan tərəfi ilə birgə yeni səviyyəyə qaldırmağa hazırdır.

Cənab Prezident, etimadnaməmi Sizə təqdim edərək, öz məsuliyyətimi tamamilə başa düşürəm və Sizi əmin edirəm ki, dövlətlərarası münasibətlərimizin daha da inkişafı naminə bütün səylərimi və bacarığımı əsirgəməyəcəyəm.

Sağ olun.

X X X

Azərbaycan Prezidenti HEYDƏR ƏLİYEV səfirə müraciətlə dedi:

-Hörmətli cənab səfir!

Çin Xalq Respublikasının Azərbaycanda fövqəladə və səlahiyyətli səfiri təyin olunmağınız münasibətilə Sizi təbrik edirəm və gələcək işinizdə uğurlar arzulayıram.

Çin ilə Azərbaycan arasında dostluq münasibətləri, demək olar, bütün sahələrdə geniş əməkdaşlıq mövcuddur və biz bunu özümüz üçün çox vacib hesab edirik. Biz Çin Xalq Respublikasını özümüzə dost ölkə bilirik və münasibətlərimizi inkişaf etdirmək niyyətindəyik.

Çin Xalq Respublikası ilə müstəqil Azərbaycan arasında diplomatik münasibətlər yaradılmasının bu günlər 10 ili tamam olur. Sizin bəxtiniz gətirmişdir ki, Çin Xalq Retpublikasının səfiri kimi öz vəzifələrinizin yerinə yetirilməsinə bu münasibətlərin 10-cu ildönümünü qeyd etdiyimiz günlərdə başlayırsınız. Keçdiyimiz bütün dövr sizin üçün də, bizim üçün də böyük əhəmiyyətə malikdir, çünki biz onillik yolu keçərək, bir-birimizi yaxşı tanıdıq və təbii ki, münasibətlərimizi daha geniş inkişaf etdirməyə imkanımız var.

Çin Xalq Respublikasının Sədri cənab Tszyan Tszeminin salamını mənə yetirdiyinizə görə Sizə təşəkkür edirəm. Xahiş edirəm, mənim dostluq salamımı, ən xoş arzularımı və yüksək dövləti fəaliyyətində uğurlar dilədiyimi ona yetirəsiniz.

Sizi bir daha təbrik edirəm.

X X X

Sonra Azərbaycan Prezidenti Heydər Əliyev, Çinin Azərbaycandakı fövqəladə və səlahiyyətli səfiri Çjan Siyun, onun xanımı, səfirliyin əməkdaşları xatirə şəkli çəkdirdilər.

X X X

Etimadnamənin təqdim edilməsi mərasimindən sonra Prezident Heydər Əliyev ilə səfir Çjan Siyun arasında səmimi söhbət oldu.

Səfir ÇJAN SİYUN Azərbaycan Prezidentinə müraciətlə dedi:

- Sizin dövlətlərarası münasibətlərimizin inkişafına belə diqqət yetirməyinizi Çində çox yüksək qiymətləndirirlər. Bu münasibətlər müvəffəqiyyətlə inkişaf edir, biz məhz Sizin Çinə səfəriniz zamanı təməli qoyulmuş zəmində ikitərəfli əməkdaşlıq sahəsində yeni-yeni uğurlar qazanırıq. Sədr Tszyan Tszemin Sizinlə görüşlərini böyük səmimiyyətlə xatırlayır.

Sizi bir daha əmin etmək istəyirəm ki, Sizinlə cənab Tszyan Tszemin arasında əldə olunmuş bütün razılaşmaların həyata keçirilməsi üçün var qüvvə ilə səy göstərəcəyəm.

HEYDƏR ƏLİYEV: Sağ olun. İndi Çin Xalq Respublikası ilə Azərbaycan arasında bütün sahələrdə münasibətlər artıq qəti təşəkkül tapmışdır. Çin Xalq Respublikasının buradakı səfirliyi möhkəmlənmişdir, onun üçün yaxşı bina tikilmişdir.

ÇJAN SİYUN: Sizin diqqətiniz sayəsində indi bizim yaxşı, gözəl binamız var.

HEYDƏR ƏLİYEV: Yeri gəlmişkən, mən cənab Li Pen ilə birlikdə səfirliyin binasının bünövrəsinin qoyulması mərasimində iştirak etmişdim. Sonra isə onun açılışı olanda səfirin xahişi ilə təntənəli mərasimdə iştirak etdim.

ÇJAN SİYUN: Bir halda ki, Siz mənim sələfimin xahişini yerə salmamısınız, onda səmimiyyətinizdən istifadə edərək, Sizi diplomatik münasibətlərimizin 10 illiyi münasibətilə aprelin 2-də səfirliyimizdə keçiriləcək tədbirə dəvət etmək istərdim.

HEYDƏR ƏLİYEV: Belə çıxır ki, biz çox tez-tez görüşəcəyik?

ÇJAN SİYUN: Bu, dövlətlərmimiz arasında sıx əlaqələr olduğuna dəlalət edən yaxşı əlamətdir.

HEYDƏR ƏLİYEV: Əlbəttə, mən bu barədə düşünəcəyəm. Hər halda, biz Çin Xalq Respublikası səfirliyinin burada, Azərbaycanda fəaliyyətindən çox razıyıq. Burada dövlət hakimiyyəti orqanları ilə, ictimai təşkilatlarla yaxşı münasibətlər yaranmışdır, ona görə də fəaliyyət üçün yaxşı zəmin var. Görürəm, Siz də təcrübəli diplomatsınız, bir çox illər Moskvada işləmisiniz, keçmiş Sovetlər İttifaqına, keçmiş İttifaqın respublikalarına, o cümlədən Azərbaycana da bələdsiniz. Ona görə də, zənnimcə, burada işləmək də, dövlət hakimiyyəti orqanları, ictimai təşkilatlar, ayrı-ayrı vətəndaşlar ilə ünsiyyət saxlamaq da Sizin üçün çox asan olacaqdır. Bir sözlə, burada fəaliyyətiniz üçün çox əlverişli şərait olacaqdır.

ÇJAN SİYUN: Cənab Prezident, təyinatım haqqında məlumat alanda və biləndə ki, Azərbaycanda Çinin çoxlu dostu var, çox sevindim.

Yeri gəlmişkən, mən Sizinlə 1980-ci illərin ortalarında görüşmüşəm. Siz Sovet İttifaqının Moskvadakı səfirliyimizə gələn ilk rəhbərlərindən biri idiniz. O zaman mən gənc və indikindən bir qədər gözəl idim. Mən Sizin görüşünüzdə tərcüməçilik edirdim. Mənim əsas işim tərcüməçilik ıdi. Mən bunda da dostluq münasibətlərimiz üçün yaxşı zəmin görürəm, sələfim də çox işlər görmüşdür. Əlbəttə, Çin Xalq Respublikasının Sədri və Siz, cənab Prezident, bütün sahələrdə əməkdaşlığımızın inkişafına daim diqqət yetirirsiniz. Zənnimcə, burada bunun üçün yaxşı əsas var. Biz bu fikirdəyik ki, Sizin köməyiniz və diqqətinizlə, təbii ki, Azərbaycan Xarici İşlər Nazirliyindəki həmkarlarımın köməyi və dəstəyi ilə biz daha böyük uğurlar qazanacağıq.

Mən öz vəzifəmi mövcud nailiyyətləri inkişaf etdirməkdə və ikitərəfli yaxşı münasibətləri iqtisadi əməkdaşlığın real səviyyəsi ilə dolğunlaşdırmaqda görürəm.

HEYDƏR ƏLİYEV: Deməli, biz köhnə tanışlarıq. Mən Çinin Moskvadakı səfirliyinə getməyimi xatırlayıram. Əgər Siz onda çox gənc idinizsə, deməli, indi də heç qoca deyilsiniz.

ÇJAN SİYUN: Moskvadakı səfirliyimizə gəlməyiniz bizim üçün boyük hadisə oldu və bununla əlaqədar səfirimiz bütün əməkdaşlarına əməlli-başlı səliqə-sahman yaratmağı tapşırmışdı. Odur ki, Sizin səfirliyimizə gəlməyiniz təkcə bizim üçün deyil, həm də ikitərəfli münasibətlər üçün böyük hadisə idi. Zənnimcə, Sizin doğma Bakı şəhərində səfirliyimizə yenidən təşrif gətirməyiniz də böyük hadisəyə çevriləcək və Çin- Azərbaycan münasibətləri ilə məşğul olan bizləri yeni uğurlara ruhlandıracaqdır.

HEYDƏR ƏLİYEV: Bəli, Siz razılıq almağı bacarırsınız. Bəli, səfirliyinizə gəlməyimi xatırlayıram. Həqiqətən, o zaman Sovetlər İttifaqı ilə Çin arasında münasibətlərdə heç də hər şey qaydasında deyildi. Belə görüşlər də az-az olurdu və ona görə də Siyasi Büro üzvünün, SSRİ Nazirlər Soveti Sədrinin birinci müavininin səfirliyə gəlməsi sizin üçün də, bizim üçün də hadisə idi. Çünki o zaman dövlətimizin siyasəti mövcud münasibətlərlə müəyyənləşdirilirdi. Lakin bunlar artıq keçmişdə qalmışdır. İndi Siz müstəqil Azərbaycandasınız, münasibətlər də bambaşqadır və hesab edirəm ki, Sovetlər İttifaqı və Çin arasındakı kimi deyildir. O zaman bu münasibətlər gah səmimi, gah da soyuq, hətta bəzən çox gərgin olurdu.

ÇJAN SİYUN: Bizim aramızda isə ancaq yaxşı münasibətlər var.

HEYDƏR ƏLİYEV: Bizim isə diplomatik münasibətlərimiz elə qurulan andan yaxşıdır və belə də qalacaqdır. Çünki Azərbaycanın Çinlə mübahisə etməli bir məsələsi yoxdur, aramızda da heç bir problem mövcud deyildir. O vaxt isə Sovetlər İttifaqı ilə mübahisələr vardı, bəziləri bəlkə hələ bu günədək qalır.

ÇJAN SİYUN: Mübahisələr həm bizim üçün, həm də Sovet Ittifaqi üçün anlaşıqlı deyildi.

HEYDƏR ƏLİYEV: Bir sözlə, burada sizin probleminiz olmayacaqdır, çünki ölkələrimiz arasında dostluq münasibətləri yaranmışdır və bu münasibətlər davam və inkişaf edəcəkdir. Buna şübhə etməyə bilərsiniz. Burada Sizin uğurla işləməyiniz üçün hər cür şərait yaradılacaqdır.

X X X

Mərasimdə Azərbaycanın xarici işlər naziri Vilayət Quliyev, Prezidentin Katibliyinin rəisi Dilarə Seyidzadə, Prezidentın İcra Aparatının xarici əlaqələr şöbəsinin müdiri Novruz Məmmədov iştirak edirdilər.

AZƏRTAC

Fotolar Oqtay Aydınoğlunun,

Rafiq Bağırovundur