Dövlətimizin başçısı əvvəlcə Astarada respublikada ilk modul tipli elektrik stansiyasının təntənəli açılış mərasimində iştirak etmişdir. Mərasimə toplaşanlar Prezidenti böyük hörmət və ehtiramla, gül-çiçəklə qarşıladılar.

Rayonun Ərçivan kəndində tikilmiş stansiyanın təməli 2005-ci il sentyabrın 8-də Prezident İlham Əliyevin iştirakı ilə qoyulmuşdur. Tikintinin baş podratçısı Finlandiyanın “Wartsila” və İsveçrənin “ABB” şirkətləridir. Stansiyada hər birinin gücü 8,7 meqavat olan 10 generator quraşdırılmışdır. Stansiyanın ərazisində inşa edilmiş gücləndirici yardımçı stansiyada hər biri 25 meqavatlıq 5 ədəd transformator qoyulmuşdur. 2 kilometr uzunluğunda 110 kilovoltluq elektrikötürmə xətləri, 1,2 kilometrlik qaz xətti çəkilmiş, vertolyot meydançası inşa edilmişdir. Elektrik stansiyasının 51 hektarlıq ərazisində ikimərtəbəli inzibati və idarəetmə binaları inşa edilmiş, əraziyə axan suların qarşısını almaq məqsədi ilə 900 metr uzunluğunda 2 kanal çəkilmiş, 2 keçid körpüsü, 1 hektar ərazidə isə su hovuzu inşa edilmişdir. 20 hektar ərazidə bağ salınmış və 5 minə yaxın ağac və kol əkilmişdir. Stansiyanın tikintisində 500 nəfərə yaxın inşaatçı və quraşdırıcı çalışmışdır ki, onlardan da 300 nəfəri yerli inşaatçılardır.

Astara elektrik stansiyası cənub bölgəsinin elektrik enerjisi ilə təminatında əhəmiyyətli rol oynayacaq, qış mövsümündə enerji qıtlığını aradan qaldıracaqdır. Burada 110 nəfər daimi işlə təmin olunacaqdır.

Prezident İlham Əliyev stansiyada quraşdırılmış müasir avadanlıqla yaxından tanış oldu.

Sonra dövlətimizin başçısı Astara elektrik stansiyasının işə salınmasını bildirən düyməni basdı və stansiya ümumi şəbəkəyə qoşuldu.

Prezident İlham Əliyev stansiyanı inşa edən yerli və xarici mütəxəssislərlə söhbət etdi, müasir tələblərə cavab verən bu obyektin qısa müddətdə başa çatdırılmasına görə minnətdarlığını bildirdi.

İsveçrənin “ABB” şirkətinin vitse-prezidenti Bruno Berggren tikinti müddətində onlara yaradılan şəraitə və köməyə, diqqət və qayğıya görə dövlətimizin başçısına dərin təşəkkürünü bildirdi. Burada çalışan yerli mütəxəssislərin fəaliyyətini yüksək qiymətləndirdi. Xüsusi vurğuladı ki, dünyada məşhur olan “ABB” şirkəti tərəfindən indiyədək heç bir ölkədə bu cür stansiya quraşdırılmamışdır. Qısa müddət ərzində stansiyanın quraşdırılması xarici şirkətlərlə yerli mütəxəssislərin birgə fəaliyyətinin nəticəsidir və alqışa layiqdir. Biz bu işimizlə fəxr edirik.

Sonra stansiyanın açılışını bildirən təntənəli mərasim keçirildi.

Astara Rayon İcra Hakimiyyətinin başçısı Oqtay Abbasov mərasimi açaraq dedi ki, Azərbaycanın dahi oğlu, ümummilli liderimiz Heydər Əliyevin ölkəmizin tarixində müstəsna rol oynadığını hər bir astaralı aydın dərk edir. Məhz ulu öndərimizin səyləri nəticəsində Azərbaycan öz müstəqilliyini qorudu, iqtisadiyyatda tənəzzülə son qoyuldu, inkişafın möhkəm təməli yaradıldı. Azərbaycan dünya birliyində layiqli yerini tutdu.

2003-cü ilin oktyabrında keçirilən prezident seçkiləri xalqımızın Heydər Əliyev siyasətinə sadiqliyinin parlaq sübutu oldu. Ulu öndərin siyasətinin layiqli davamçısı olan Prezident İlham Əliyevin fəaliyyətini xalqımız ürəkdən bəyənir. Regionların sosial-iqtisadi inkişafına dair Dövlət proqramının həyata keçirilməsi bütün respublikada olduğu kimi, Astara rayonunda da öz bəhrəsini verir. 2003-2005-ci illərdə rayonda sosial-iqtisadi inkişaf sahəsində bir sıra işlər görülmüşdür. Sahibkarlığın inkişafı, xüsusilə, yeni iş yerlərinin açılması daim diqqət mərkəzində olmuşdur. Beynəlxalq yük terminalının, Astara qaz-kompressor stansiyasının, indi isə elektrik stansiyasının tikilib istifadəyə verilməsi rayonun strateji əhəmiyyətini daha da artırmışdır. Rayonda yeni istehsal müəssisələri, təhsil, mədəniyyət, idman obyektləri tikilmişdir. Son iki ildə 3 minə yaxın yeni iş yeri açılmışdır.

İcra hakimiyyətinin başçısı dedi ki, cənab Prezident, rayonumuzda sosial-iqtisadi inkişaf sahəsində qazanılan uğurlar məhz Sizin astaralılara göstərdiyiniz böyük qayğının bəhrəsidir və buna görə Sizə dərin minnətdarlığımızı bildiririk. Sizin apardığınız siyasət Azərbaycanın milli maraqlarından doğan siyasətdir və ölkəmizin gücünü daha da artıracaqdır. Xalqımız Sizə inanır və Sizi ürəkdən dəstəkləyir.

Sonra çıxış edən “Azərenerji” Səhmdar Cəmiyyətinin prezidenti Etibar Pirverdiyev dedi ki, Azərbaycan iqtisadiyyatının sürətli inkişafını təmin edən amillərdən biri də ölkənin müstəqil energetika sisteminə malik olmasıdır. Bu isə ulu öndərimiz Heydər Əliyevin siyasətinin nəticəsidir. Məhz onun uzaqgörənliyi sayəsində regionun ən böyük elektrik stansiyası olan Azərbaycan DPES-i tikilmişdir. Müstəqilliyimiz dövründə mövcud iqtisadi-siyasi problemlərə baxmayaraq, ümummilli liderimiz respublikada 3 yeni elektrik stansiyasının tikintisini reallaşdırmışdır. İndi istifadəyə verilən Astara elektrik stansiyası Prezident İlham Əliyevin daimi nəzarəti və xüsusi qayğısı sayəsində çox qısa müddətdə tikilib başa çatdırılmışdır.

“Azərenerji”nin rəhbəri stansiyanın texniki göstəriciləri barədə ətraflı məlumat verərək bildirdi ki, burada ildə 700 min kilovat-saata qədər elektrik enerjisi istehsal olunacaqdır. Stansiya Astara, Lənkəran, Lerik, Yardımlı və Masallı rayonları əhalisinin tələbatını tam ödəyəcək və burada əlavə sənaye və qeyri-sənaye obyektlərinin elektrik enerjisi ilə təchizatına şərait yaradacaqdır. Cari ilin avqust ayında Şəkidə, sentyabrda Xaçmazda, ilin sonunda isə Bakı və Naxçıvanda bu tipli stansiyaların tikintisi başa çatdırılacaqdır.

E.Pirverdiyev daha sonra dedi ki, Sumqayıt elektrik stansiyasının təməlinin qoyulması mərasimində Prezident İlham Əliyev xüsusi vurğulamışdır ki, hər bir Azərbaycan vətəndaşının evində daim işıq olmalı, respublikanın enerji müstəqilliyi daha da möhkəmləndirilməli, elektroenergetikanın inkişafı elə səviyyəyə çatdırılmalıdır ki, ölkənin tələbatını tamamilə ödəməklə yanaşı, elektrik enerjisinin ixrac potensialı da yaradılsın. Bu strategiya müvəffəqiyyətlə həyata keçirilir. Sumqayıt elektrik stansiyasında tikinti işləri uğurla davam etdirilir. Stansiya nəzərdə tutulmuş vaxtda, yəni 2007-cı ilin oktyabrında istismara veriləcəkdir. Naxçıvan istilik-elektrik stansiyası əsaslı yenidənqurmadan sonra fevral ayında işə düşəcəkdir.

Respublikada alternativ enerji mənbələrindən istifadə olunması istiqamətində də işlər aparılır. Qobustan ərazisində ümumi gücü 50 meqavat olan külək elektrik stansiyasının tikintisi layihəsi üçün texniki-iqtisadi əsaslandırma hazırlanmışdır.

X X X

Azərbaycan Prezidenti İlham Əliyev mərasimdə nitq söylədi.