Azərbaycan Prezidentinin son müsahibəsi erməni cəmiyyətini bir daha düşünməyə vadar edəcək
Bakı, 11 yanvar, AZƏRTAC
Prezident İlham Əliyevin yerli televiziya kanallarına müsahibəsi, verdiyi bəyanatlar, səsləndirdiyi fikirlər 2023-cü ildə Azərbaycanın istər regional, istər beynəlxalq müstəvidə irəliləyəcəyi yol xəritəsini müəyyən etmək baxımından ciddi siyasi hadisə hesab edilməlidir.
Sirr deyil ki, 2022-ci il kifayət qədər gərgin bir period olub. Bu mənada, dövlətimizin başçısının müsahibəsində ilk diqqət çəkən məqam, heç şübhəsiz, ötən dövr ərzində çoxsaylı xarici təzyiq cəhdləri, xüsusən sentyabr hadisələri və ekofəalların aksiyalarından sonra şiddətlənən qaralama kampaniyaları fonunda Azərbaycanın nəinki güc və imkanlarını qoruya bilməsi, üstəlik, əvvəlki dövrlərdən daha güclü görünməsidir. Biz bunu Prezident İlham Əliyevin qətiyyətli ritorikasında əyani olaraq müşahidə etdik. Qısa formada desək, biz 2022-ci ili də qalib kimi başa vurmuşuq.
Bu fikirləri Milli Məclisin deputatı Bəhruz Məhərrəmov AZƏRTAC-a açıqlamasında söyləyib.
Onun sözlərinə görə, belə bir situasiyada, 2023-cü ilin əvvəlində qalib Azərbaycanın rəhbərinin verəcəyi bəyanatlar, müəyyən edəcəyi hədəf və qırmızı xətlər, istər region dövlətləri, istərsə də regionda marağı olan kənar güclər üçün sonrakı addımları müəyyən etmək baxımından həlledici direktiv olacaq.
Xüsusən regionda əsas düyün nöqtəsi olan Azərbaycan və Ermənistan arasında yekun sülh müqaviləsi ilə bağlı qalib liderin yeni situasiyaya uyğun müəyyənləşən mövqeyi isə bütövlükdə Cənubi Qafqazın gələcəyi ilə bağlı həlledici amil olması mübahisəsizdir.
“Xatırlayırsınızsa, Prezident İlham Əliyev 2022-ci ilin yanvarın 12-də də yerli televiziya kanallarına müsahibə vermiş, illik fəaliyyət kursu və hədəflərin çərçivəsini bəyan etmişdi. Ötən il ərzində müşahidə edilən proseslər, xüsusən postmünaqişə dövründə həyata keçirilən cəza tədbirləri, o cümlədən beynəlxalq müstəvidə göstərilən qətiyyət, əldə edilən qələbələr nümayiş etdirdi ki, ilin əvvəlində müəyyən olunan qırmızı cizgilər toxunulmazdır. Xüsusən yekun sülh müqaviləsi mövzusunda.
Müsahibədən də göründüyü kimi, bu mövzuda Prezident İlham Əliyevin müəyyən etdiyi və milli maraqların ehtiva olunduğu mövqe dəyişməzdir. Mümkün sülh müqaviləsi yalnız Azərbaycan və Ermənistan arasında münasibətləri tənzimləyə bilər, daxili məsələlərimiz, o cümlədən Qarabağla bağlı hər hansı nüansın sülh müqaviləsinə aidiyyəti ola, hətta bundan söhbət belə gedə bilməz”, - deyə deputat vurğulayıb.
O qeyd edib ki, ikincisi, mümkün sülh müqaviləsi Azərbaycanın sadə, tarixi ədalətə, beynəlxalq hüquqa uyğun şərtlərinə müvafiq olmalı, dövlətimizin başçısının da vurğuladığı kimi, "hansısa çoxcildlik olmayan, çox sadə bir kağız, əsas prinsipləri əks etdirən sadə sənəd olmalıdır". Bu o deməkdir ki, Azərbaycan bundan sonra daha 30 il hansısa sənədlər toplusunu müzakirə etməyin nə niyyətində, nə də həvəsində deyil.
Prezident İlham Əliyev çox haqlı olaraq bu prosesdə hər hansı bəhanəni qəbul etmir. Xüsusən İrəvan xarici təsirləri, diasporun təzyiqlərini bəhanə gətirməməlidir, çünki Azərbaycan Prezidentinin dediyi kimi, "hər ölkənin, hər bir liderin öz çətinlikləri var, lakin bununla spekulyasiya etmək olmaz. Ermənistanın hakimiyyət orqanları da məsuliyyəti tamamilə öz üzərilərinə götürməli və sülh müqaviləsinin imzalanmasına hazır olmalıdır".
Bəhruz Məhərrəmovun sözlərinə görə, ifadə edilən digər konseptual məqam isə sülh müqaviləsinin əslində daha çox kimə lazım olması, yaxud prosesin ləngiməsindən kimin daha zərərli çıxa biləcəyi ilə bağlı oldu. Prezident İlham Əliyev birbaşa formada ifadə etdi ki, sülh Azərbaycandan daha çox məhz Ermənistana lazımdır. “Keçirdiyimiz iztirablara, ağrılara, bizə əziz olan hər şeyin dağıdılmasına baxmayaraq, biz sülh barədə danışırıq... Bu, həm siyasi baxımdan, həm də insaniyyət baxımından asan deyil. Lakin bunun Azərbaycanın uzunmüddətli maraqlarına uyğun olduğunu başa düşdüyümüz üçün biz bunu təklif edirik”. Amma biz 2023-cü ildə bu prosesdə israrlı olacağıqmı? Dövlət başçısının mövqeyi qətidir, - "bu, masa üzərində bir müddət olacaq. Sonra, necə deyərlər, xüsusi fəallıq göstərməyəcəyik. İstəmirlər - heç lazım da deyil. Delimitasiyanı istəmirlər - heç lazım da deyil. Deməli, sərhəd bizim lazım bildiyimiz yerdən keçəcək".
“Bu məqamda Azərbaycan Prezidentinin Rusiya sülhməramlılarının səlahiyyətinin başa çatacağı 2025-ci ili xatırlatması və 2023-cü ilin son şans olduğunu bəyan etməsi, heç şübhəsiz ki, erməni cəmiyyətini bir daha düşünməyə vadar edəcək.
Təsadüfi deyil ki, müsahibədən cəmi bir neçə saat sonra, bütün diqqətlərin dövlətimizin başçısının bəyanatlarına yönəlməsi, xüsusən bu müsahibənin sosial medianın erməni seqmentinin əsas mövzusuna çevrilməsi də bir daha deyilənləri təsdiq edir. Baxmayaraq ki, bu gün Paşinyanın da jurnalistlərlə görüşü olmuşdu, amma diqqətin məhz Prezident İlham Əliyevə yönəlməsi, ermənilərin də bölgədə son sözün sahibinin kim olduğunu başa düşdüyünü göstərir”, - deyə deputat bildirib.
Bölmənin digər xəbərləri
