AZƏRBAYCAN QADINLARININ III QURULTAYINA HAZIRLIQLA BAĞLI KONFRANSLAR KEÇİRİLİR
AZƏRTAC xəbər verir ki, Azərbaycan qadınlarının III qurultayına hazırlıqla bağlı Tərtər və Bərdə rayonlarında konfranslar keçirilmişdir.
Bərdə rayon mədəniyyət evində keçirilən konfransda təhsil, səhiyyə, mədəniyyət, həmçinin sosial-iqtisadi sahələrdə, idarəetmədə, qeyri-hökumət təşkilatlarında çalışan qadınlar iştirak etmişlər.
İcra hakimiyyəti başçısının müavini Fəqət Şadlinskaya dövlət qadın siyasətindən danışmış, rayonda 71 min 200 qadının və daha 17 mindən çox məcburi köçkün qadının yaşadığını, onların ictimai-siyasi, mədəni həyatda fəal mövqe tutduğunu bildirmişdir.
İcra hakimiyyətinin başçısı İlham Ağayev, Milli Məclisin deputatı Gövhər Baxşəliyeva və başqaları qadınlara dövlət qayğısından, onların cəmiyyətdə rolundan, qadınları narahat edən problemlərdən danışmışlar.
Tərtərdə keçirilən konfransda rayon icra hakimiyyətinin başçısı Vidadi İsayev, Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova və başqaları çıxış edərək, rayon qadınlarının fəaliyyətindən, onların problemlərinin həlli istiqamətində görülən işlərdən söz açmışlar.
Konfranslarda respublika qadınlarının III qurultayına nümayəndələr seçilmiş, rayon Ağbirçəklər Şurası yaradılaraq, onun tərkibi təsdiqlənmişdir.
