Azərbaycan rəqəmsal inkişafın yeni mərhələsinə qədəm qoyur - ŞƏRH
Bakı, 5 iyul, AZƏRTAC
Azərbaycan rəqəmsal inkişafın yeni mərhələsinə qədəm qoyur. Prezident İlham Əliyevin təşəbbüsü ilə qəbul edilmiş qərarlar və 2026–2028-ci illəri əhatə edən Fəaliyyət Planı göstərir ki, rəqəmsallaşma təkcə dövlət xidmətlərinin elektronlaşdırılması deyil, ölkənin iqtisadi inkişafı, milli təhlükəsizliyi və rəqabət qabiliyyətinin əsas strateji istiqamətlərindən biri kimi müəyyən olunub.
Bu sözləri AZƏRTAC-a açıqlamasında Milli Məclisin deputatı Əlibala Məhərrəmzadə söyləyib.
O bildirib ki, Rəqəmsal İnkişaf Şurasının yaradılması bu sahədə vahid idarəetmə modelinin formalaşdırılması baxımından mühüm addımdır. Şuranın fəaliyyəti dövlət qurumları arasında koordinasiyanı gücləndirməklə yanaşı, rəqəmsal transformasiya, süni intellekt, innovasiya və kibertəhlükəsizlik sahələrində həyata keçirilən islahatların sistemli və nəticəyönümlü şəkildə icrasını təmin edəcək.
Xüsusilə "mygov" və "mygov Biznes" platformalarının vahid rəqəmsal ekosistem kimi inkişaf etdirilməsi vətəndaş və biznes üçün dövlət xidmətlərinə çıxışı daha sadə, sürətli və şəffaf edəcək. Müxtəlif dövlət qurumlarının ayrı-ayrı tətbiqlərinin vahid platformada birləşdirilməsi həm istifadəçi rahatlığını artıracaq, həm də dövlət idarəçiliyində səmərəliliyi yüksəldəcək. Proaktiv xidmətlərin genişləndirilməsi və "Yalnız bir dəfə" prinsipinin tətbiqi isə vətəndaş–məmur təmasını minimuma endirməklə bürokratik maneələrin aradan qaldırılmasına xidmət edir.
"İnnovasiya sahəsində nəzərdə tutulan genişmiqyaslı qanunvericilik islahatları Azərbaycanın texnologiya və startap ekosisteminin inkişafı üçün mühüm hüquqi baza yaradır. Vençur maliyyələşdirilməsi, kraudfandinq, "mələk investorlar" institutu, vergi güzəştləri və rəqəmsal istedadların cəlbinə yönəlmiş təşviqlər ölkənin regional texnologiya mərkəzinə çevrilməsi hədəfini dəstəkləyən mühüm addımlardır. Bu islahatlar innovativ sahibkarlığın inkişafına, xarici investisiyaların cəlbinə və yüksək əlavə dəyər yaradan iqtisadiyyatın formalaşmasına töhfə verəcək",- deyə deputat vurğulayıb.
Qeyd edilib ki, süni intellektin dövlət idarəçiliyində tətbiqinin genişləndirilməsi də strateji əhəmiyyət daşıyır. Virtual vətəndaş köməkçisi, dövlət xidmətlərinin avtomatlaşdırılması, milli hesablama infrastrukturunun yaradılması və tənzimləyici test mühitinin formalaşdırılması Azərbaycanın bu sahədə qabaqcıl texnologiyaların tətbiqinə sistemli yanaşdığını göstərir. Eyni zamanda, süni intellekt həllərinin milli maraqlar və təhlükəsizlik prinsipləri əsasında inkişaf etdirilməsi ölkənin rəqəmsal suverenliyinin möhkəmləndirilməsinə xidmət edir.
Rəqəmsallaşmanın genişlənməsi fonunda kibertəhlükəsizlik istiqamətində həyata keçirilən institusional və hüquqi islahatlar xüsusi əhəmiyyət kəsb edir. Milli Kibertəhlükəsizlik Agentliyinin yaradılması, kritik informasiya infrastrukturunun qorunmasına dair yeni tələblər, süni intellekt əsaslı kibermüdafiə mexanizmlərinin tətbiqi və insan kapitalının inkişafına yönəlmiş tədbirlər ölkənin rəqəmsal təhlükəsizlik sistemini beynəlxalq standartlara uyğun gücləndirməyi hədəfləyir.
"Təhsil sahəsində aparılan rəqəmsal transformasiya isə uzunmüddətli inkişafın əsas təminatlarından biridir. Məktəblərin müasir rəqəmsal infrastrukturla təmin olunması, "Rəqəmsal məktəb" platformasının genişləndirilməsi, elektron təhsil xidmətlərinin artırılması, eləcə də "Rəqəmsal bacarıqlar" və "STEAM Azərbaycan" layihələrinin əhatə dairəsinin genişlənməsi gələcəyin rəqabətqabiliyyətli insan kapitalının formalaşdırılmasına xidmət edir.
Ümumilikdə həyata keçirilən islahatlar göstərir ki, Azərbaycan rəqəmsal iqtisadiyyatın inkişafını, innovasiya əsaslı idarəetməni və yüksək texnologiyaların tətbiqini dövlət siyasətinin əsas prioritetlərindən birinə çevirib. Qarşıdakı illərdə bu tədbirlərin uğurlu icrası dövlət xidmətlərinin keyfiyyətinin yüksəlməsinə, biznes mühitinin daha da yaxşılaşmasına, beynəlxalq rəqabət qabiliyyətinin artmasına və ölkənin regional rəqəmsal lider kimi mövqeyinin möhkəmlənməsinə mühüm töhfə verəcək”,- deyə o əlavə edib.
Bölmənin digər xəbərləri
