AZƏRBAYCAN RESPUBLİKASININ PREZİDENTİ HEYDƏR ƏLİYEVİN TÜRKİYƏYƏ İŞGÜZAR SƏFƏRİ
Azərbaycan Prezidenti Heydər Əliyev iyunun 28-də Ankaranın Esenboğa hava limanına gəldi.
Hava limanında respublikamızın rəhbərinin şərəfinə fəxri qarovul dəstəsi düzülmüşdü.
Dövlətimizin başçısını hava limanının Şərəf salonunun qarşısında Türkiyə Cümhuriyyətinin 9-cu Prezidenti Süleyman Dəmirəl, Ankara valisi Yəhya Gur, Türkiyə Böyük Millət Məclisinin deputatları və digər rəsmi şəxslər səmimiyyətlə, mehribanlıqla salamladılar. Prezident Heydər Əliyev onlarla səmimiyyətlə görüşərək, razılığını bildirdi.
Azərbaycan Prezidenti fəxri qarovul dəstəsinin qarşısından keçdi, türk əsgərini salamladı.
Təyyarənin pilləkəni yanında Süleyman Dəmirəl, Yəhya Gur, millət vəkilləri və digər rəsmi şəxslər Azərbaycan Prezidenti Heydər Əliyev ilə səmimiyyətlə sağollaşdılar.
Azərbaycan Prezidentinin təyyarəsi Qars şəhərinə yola düşdü.
X X X
Türkiyənin 9-cu Prezidenti, ölkəmizin və xalqımızın böyük dostu Süleyman Dəmirəl Esenboğa hava limanında Azərbaycan jurnalistlərinə qısa müsahibə verdi.
Cənab Dəmirəl Ermənistan-Azərbaycan münaqişəsindən, son illərdə Azərbaycanın bütün sahələrdə inkişafından, qazandığı böyük nailiyyətlərdən, ölkələrimiz arasında səmərəli iqtisadi əlaqələrdən danışdı.
Ermənistanın işğalçılıq siyasətini tənqid edən Süleyman Dəmirəl bildirdi ki, Türkiyə Azərbaycanın ədalətli mövqeyini hər zaman dəstəkləyəcək və bu, Türkiyənin dəyişməz siyasi xəttidir.
O, xüsusi vurğuladı ki, Azərbaycanda ictimai-siyasi sabitliyin yaranması, demokratik prinsiplərin bərqərar olması, iqtisadi sahədə tərəqqi bilavasitə Prezident Heydər Əliyevin xidmətidir. Cənab Süleyman Dəmirəl dost və qardaş ölkələrimiz arasında münasibətlərin səviyyəsindən məmnun qaldığını söylədi.
X X X
Azərbaycan Prezidenti Heydər Əliyev həmin gün Türkiyənin Qars şəhərinə gəldi. Hava limanında fəxri qarovul dəstəsi düzülmüşdü.
Prezident Heydər Əliyevi Qars valisi Nevzat Turhan, şəhər bələdiyyə başqanı Naib Əlibəyoğlu və digər rəsmi şəxslər mehribanlıqla qarşıladılar. Hava limanına toplaşımış Qars sakinləri Azərbaycan Prezidentinə sevgi və məhəbbətlərini hərarətli alqışlarla izhar etdilər.
Azərbaycan Prezidenti Heydər Əliyev elə həmin gün şəhərin mərkəzində salınmış və onun adı verilmiş parkın açılış mərasimində iştirak etdi.
Qarsın füsünkar bir yerində salınmış bu istirahət guşəsinə toplaşanlar Azərbaycan rəhbərini hərarətli alqışlarla qarşıladılar.
Təntənəli açılış mərasiminin iştirakçıları əvvəlcə Azərbaycanın azadlığı, müstəqilliyi və ərazi bütövlüyü uğrunda şəhid olmuş övladlarımızın əziz xatirəsini bir dəqiqəlik sükutla yad etdilər.
Hər iki ölkənin dövlət himnləri səsləndi.
Qars valisi Nevzat Turhan və şəhər bələdiyyəsinin başçısı Naib Əlibəyoğlu mərasimdə çıxış edərək, Azərbaycan Prezidenti Heydər Əliyevin bu səfərini şəhər sakinlərinin yaddaşından silinməyəcək tarixi hadisə kimi qiymətləndirdilər, Türkiyənin bu bölgəsinə səfər etdiyinə görə dövlətimizin başçısına dərin minnətdarlıqlarını bildirdilər.
Azərbaycan Prezidenti Heydər Əliyev mərasimdə geniş nitq söylədi. Respublikamızın rəhbərinin nitqi böyük diqqətlə dinlənildi və sürəkli alqışlarla qarşılandı.
Prezident Heydər Əliyev parkın açılışını bildirən qırmızı lenti kəsdi.
Heydər Əliyev parkında həmyerlimiz, heykəltəraş Əşrəf Əşrəfovun hazırladığı “Leyli və Məcnun” abidəsi də qoyulmuşdur. Dövlətimizin başçısı həmin abidənin açılışını bildirən örtüyü də götürdü.
Daha sonra Azərbaycan Prezidenti və mərasim iştirakçıları parkın yanındakı prospektə - Heydər Əliyev bulvarına gəldilər. Prezident Heydər Əliyev prospektin açılışını bildirən lenti kəsdi.
X X X
X X X
Azərbaycan Prezidenti Heydər Əliyev daha sonra Qars şəhərindəki Qafqaz Universitetinə gəldi. Universitetin rektoru, professor Necati Qaya, bu ali təhsil ocağının professor-müəllim heyəti, tələbələr Azərbaycan dövlətinin başçısını səmimiyyətlə, mehribanlıqla qarşıladılar.
Burada Azərbaycan Prezidenti Heydər Əliyevə Qafqaz Universitetinin fəxri doktoru diplomunun təqdim edilməsinə həsr olunmuş mərasim keçirildi. Mərasimdə universitetin rektoru, professor Necati Qaya, Qars şəhərinin valisi Nevzat Turhan çıxış etdilər. Sonra Prezident Heydər Əliyevə universitetin fəxri doktoru diplomu, mantiya təqdim olundu.
Azərbaycan Prezidenti Heydər Əliyev mərasimdə nitq söylədi, universitetə Bakının mənzərəsi təsvir olunmuş rəsm əsəri hədiyyə etdi.
Mərasimdə universitetin fəxri doktoru diplomunun təqdim olunması münasibətilə Türkiyə Böyük Millət Məclisinin sədri Ömər İzginin, baş nazir Bülənd Ecevitin, Türkiyənin 9-cu Prezidenti Süleyman Dəmirəlin, ölkənin bir çox nazirlərinin, nüfuzlu ali təhsil ocaqları rektorlarının Azərbaycan Prezidentinə ünvanladıqları təbrik teleqramları oxundu.
SƏFƏR BAŞA ÇATDI
Prezident Heydər Əliyev həmin gün Qarsda əslən Azərbaycandan olan soydaşlarımızla görüşdü.
Dövlətimizin başçısı iyunun 28-də axşam Qarsa səfərini başa çatdıraraq hava limanına gəldi.
Qars valisi Nevzat Turhan, şəhərin bələdiyyə başqanı Naib Əlibəyoğlu və digər rəsmi şəxslər Azərbaycan Prezidenti Heydər Əliyev ilə təyyarənin pilləkəni yanında səmimiyyətlə sağollaşdılar.
X X X
Azərbaycan Prezidenti Heydər Əliyev həmin gün gecə vətənə qayıtdı. Respublikamızın rəhbəri Binə hava limanında jurnalistlərə müsahibə verdi. (Müsahibənin mətni qəzetin növbəti nömrəsində dərc olunacaqdır).
Prezident Heydər Əliyevi hava limanında Milli Məclisin sədri Murtuz Ələsgərov, baş nazir Artur Rasizadə, Prezidentin İcra Aparatının rəhbəri Ramiz Mehdiyev və digər rəsmi şəxslər qarşıladılar.
Aslan Aslanov,
Tural Rzayev
AZƏRTAC-ın xüsusi müxbirləri
Bölmənin digər xəbərləri
