AZƏRBAYCAN RESPUBLİKASININ PREZİDENTİ ZATİ-ALİLƏRİ CƏNAB İLHAM ƏLİYEVƏ
Bu günlərdə Azərbaycan ictimaiyyəti ölkəmizdə müntəzəm radio verilişlərinin başlanmasının 80, televiziyanın işə düşməsinin isə 50 illik yubileyini təntənə ilə qeyd etmişdir. Sizin bu tarixi-mədəni hadisəyə diqqət yetirərək teleradio işçilərinə təbrik ünvanlamağınız, “Azərbaycan Televiziya və Radio Verilişləri” Qapalı Səhmdar Cəmiyyətinin bir qrup əməkdaşını fəxri adlar və “Tərəqqi” medalı ilə təltif etməyiniz, bir qrup əmək veteranına Prezident təqaüdü verilməsi barədə Sərəncam imzalamağınız bu yubileyin məna və əhəmiyyətini qat-qat artırmışdır.
Möhtərəm Prezident!
Milli radio və televiziyamız fəaliyyət göstərdiyi bütün dövrlərdə ölkəmizdə gedən ictimai-siyasi və mədəni proseslər barədə Azərbaycan xalqının məlumatlandırılmasında, onun maariflənməsində, milli mədəniyyətimizin, ədəbi dilimizin, ədəbiyyatımızın təbliğində, tamaşaçıların estetik zövqünün formalaşmasında, dünya azərbaycanlılarının birliyi və həmrəyliyi ideyalarının yayılmasında misilsiz rol oynamışdır. Bu fəaliyyətin nəticəsidir ki, teleradiomuz həmişə Azərbaycan cəmiyyətinin diqqət mərkəzində olmuşdur.
Azərbaycan dövlət müstəqilliyini əldə etdikdən sonra yeni hüquqi çərçivədə fəaliyyət göstərən radio və televiziyamız sosial funksiyalarını xeyli genişləndirərək daha fəal şəkildə cəmiyyət həyatının güzgüsünə çevrilmiş, demokratik dövlət quruculuğunun və sosial-iqtisadi həyatımızın müxtəlif sahələrində uğurla həyata keçirilən parlaq islahatların təbliğində mühüm rol oynamışdır. Eyni zamanda texnoloji cəhətdən inkişaf edərək mükəmməl telekommunikasiya sistemini formalaşdıran teleradiomuz müstəqil Azərbaycanın bütün dünyaya yayılan səsi olmuşdur. Məhz bu bənzərsiz xüsusiyyətinə görə radio və televiziya ictimai həyatımızın və məişətimizin ayrılmaz hissəsinə çevrilmişdir.
Azərbaycanda radio və televiziyanın nüfuzlu KİV kimi formalaşmasında, maddi-texniki bazasının və yaradıcılıq sisteminin möhkəmlənməsində, operativliyin və auditoriyaya, ictimai fikrə təsir imkanlarının genişlənməsində ümummilli liderimiz Heydər Əliyevin misilsiz xidmətləri olmuşdur. Ulu öndər istər Azərbaycana rəhbərliyinin birinci dövründə, istərsə də müstəqil dövlətimizə başçılıq etdiyi illərdə radio və televiziyanın inkişafına, onun cəmiyyət həyatına təsirinin artmasına xüsusi diqqət və qayğı göstərmiş, ölkəmizdə gedən tarixi proseslərdə, azərbaycançılıq ideyalarının, milli-mənəvi dəyərlərin təbliğində onun əhəmiyyətini layiqincə qiymətləndirmişdir. Ulu öndərimizin “Azərbaycan televiziyası və radiosu zəngin və şərəfli inkişaf yolu keçərək xalqımızın yüksək əxlaqi dəyərlərinin, ictimai-siyasi ideallarının, mədəniyyətinin, arzu və istəklərinin istifadəçisinə çevrilmişdir” sözləri bizim üçün həmişə qürur mənbəyi olmuşdur.
Hörmətli cənab Prezident!
Hazırda beynəlxalq hüququn subyektinə çevrilmiş və Avropa hüquq məkanına inteqrasiya olunan Azərbaycan keyfiyyətcə yeni inkişaf mərhələsini yaşamaqdadır. Sizin bilavasitə rəhbərliyiniz altında ölkəmizin tərəqqisi, regionların sosial-iqtisadi inkişafı, güclü nəqliyyat-enerji infrastrukturların yaradılması, müasir informasiya texnologiyalarının və plüralizmə əsaslanan teleradio sisteminin, yeni və müasir təhsil, səhiyyə, mədəniyyət və idman şəbəkəsinin formalaşdırılması prosesi gedir. Siz milli mənəvi-əxlaqi dəyərlərin qorunması, qaçqınların yaşayış şəraitinin yaxşılaşdırılması, torpaqlarımızın işğaldan azad edilməsi və erməni təcavüzünün nəticələrinin aradan qaldırılması uğrunda yorulmaz mübarizə aparırsınız. Müstəqil Azərbaycanın dinamik inkişafından xəbər verən, bütün Azərbaycan xalqının, o cümlədən biz teleradio işçilərinin ürəkdən dəstəklədiyi bu nəhəng quruculuq işləri, eyni zamanda Heydər Əliyev siyasi kursunun uğurla davam etdirilməsinin parlaq təzahürüdür.
Möhtərəm Prezident!
Bu gün həqiqi mənada xalqın tribunası olan “Azərbaycan Televiziya və Radio Verilişləri” QSC-nin həyatında yeni mərhələ başlanmışdır. Kollektivimiz yaradıcılıq işlərini müasir səviyyədə qurmaq, yeni dövrün tələblərinə uyğun olaraq demokratik dövlət quruculuğu prosesini daha yüksək peşəkarlıqla işıqlandırmaq, tamaşaçı və dinləyici auditoriyasının informasiyaya artan tələbatını dolğun ödəmək, cəmiyyəti maraqlandıran aktual mövzularda yüksək səviyyəli proqramlar hazırlamaq, bir sözlə teleradiomuzu yeni inkişaf mərhələsinə çıxarmaq üçün geniş islahat işləri aparır. Hazırda bütün sutka ərzində efirə çıxan və demək olar ki, dünyanın bütün qitələrində yayımlanan teleradiomuzda əvvəlki dövrdən prinsipial şəkildə fərqlənən proqram layihələri gerçəkləşdirilir. Biz Azərbaycan xalqının tarixinin bir parçası olan televiziya və radiomuzun dinamik inkişaf etdirilməsi üçün Sizin göstərdiyiniz diqqət və qayğını hər an hiss edirik. Teleradiomuzun maddi-texniki bazasını möhkəmləndirmək, proqramlarımızın peyk vasitəsilə Avropada və Amerikada, o cümlədən ABŞ və Kanadada yayımlanmasına göstərdiyiniz kömək, kollektiv üzvlərinin əməyinin maddi və mənəvi cəhətdən stimullaşdırılması üçün atdığınız konkret addımlar bu diqqət və qayğının bariz nümunəsidir.
Hörmətli cənab Prezident!
Biz teleradio işçilərinə göstərdiyiniz diqqət və qayğıya, sadə əməyimizə verdiyiniz böyük qiymətə görə Sizə öz dərin minnətdarlığımızı bildiririk. Sizi əmin edirik ki, bu qayğıya əməli işlə cavab vermək, Azərbaycan dövlətçiliyinin inkişafı üçün fədakarlıqla çalışmaq naminə kollektivimizin hər bir üzvü öz səyini, bilik və bacarığını əsirgəməyəcəkdir.
Müraciət “Azərbaycan Televiziya və Radio Verilişləri” QSC-nin kollektivinin ümumi yığıncağında qəbul
edilmişdir
Bölmənin digər xəbərləri
