Bakı, 7 noyabr (AZƏRTAC). Azərbaycanın şahmat üzrə kişilərdən və qadınlardan ibarət yığma komandaları sabah Polşanın paytaxtında başlanacaq Avropa komanda çempionatında iştirak etmək üçün bu gün Varşavaya yola düşmüşlər.

AZƏRTAC xəbər verir ki, kişilərin turnirində Azərbaycan yığmasının heyətində Şəhriyar Məmmədyarov, Teymur Rəcəbov, Eltac Səfərli, Rauf Məmmədov, Qadir Hüseynov çıxış edəcəklər. Qadınların yarışlarında Azərbaycan şahmatçıları Gülnar Məmmədova, Zeynəb Məmmədyarova, Türkan Məmmədyarova, Xəyalə Abdulla və Nərgiz Umudova iştirak edəcəklər.

İdmançılarımızın əsas rəqibləri Rusiya, Ermənistan, Fransa, İngiltərə, Almaniya, Macarıstan, Niderland və Ukrayna yığmaları olacaqdır.

Azərbaycan idmançıları üçün ən təhlükəli rəqiblər Rusiya, Ukrayna, Gürcüstan, Polşa və Almaniya idmançıları olacaqdır.

Kişilərin turnirində 37, qadınların turnirində isə 31 komanda mükafata layiq yerlər uğrunda mübarizə aparacaqdır. Yarışlar İsveçrə sistemi üzrə 9 turda keçiriləcəkdir. Oktyabrın 13-ü iştirakçıların istirahət günüdür.

Xatırladırıq ki, 2011-ci ilin Avropa komanda çempionatında (Halkidiki, Yunanıstan) Azərbaycanın kişilərdən ibarət yığma komandası ikinci yerə çıxmışdı. Birinci yeri Almaniya komandası tutmuşdu.