AZƏRBAYCAN ŞAHMATÇILARI VƏTƏNƏ MEDALLA DÖNMÜŞLƏR
AZƏRTAC xəbər verir ki, Batumi şəhərində “Qara Dəniz Şahmat Assosiasiyası” tərəfindən təşkil edilmiş və Azərbaycan, Gürcüstan, Ermənistan şahmatçılarının iştirakı ilə keçirilən turnirə yekun vurulmuşdur.
Turnirdə üç ölkənin 200-dən çox şahmatçısı 8, 10, 12 və 14-20 yaş qrupları üzrə qüvvəsini sınamışdır.
Azərbaycan Şahmat Federasiyasının maliyyə dəstəyi ilə yarışlarda ölkəmizi 9 şahmatçı təmsil etmişdir. Həmyerlilərimiz arasında ən yüksək nəticəni Səbinə İbrahimova göstərmişdir. S.İbrahimova 7 oyundan 5,5 xal toplayaraq 12 yaşlı qızlar arasında II yeri, eyni yaş qrupunda mübarizə aparan Ülviyyə Fətəliyeva isə 7 oyundan 5 xalla IV yeri tutmuşlar.
Vüqar Rəsulovla Ayaz Məmmədov isə eyni nəticələrlə 14-20 yaşlılar arasında ilk onluqda qərarlaşmışlar. Fərqlənmiş idmançılarımız Gəncə şahmat məktəbinin yetirmələridir.
Qaliblərə medal, diplom və pul mükafatı təqdim edilmişdir.
Ümumi komanda hesabında Azərbaycan şahmatçıları Gürcüstandan sonra II yeri tutmuşlar.
Bölmənin digər xəbərləri
