AZƏRBAYCAN SƏFİRİ KUBANIN XARİCİ TİCARƏT NAZİRİ İLƏ GÖRÜŞMÜŞDÜR
AZƏRTAC-ın xüsusi müxbiri xəbər verir ki, Azərbaycanın Kuba Respublikasındakı səfiri Aqşin Mehdiyev bu ölkənin xarici ticarət naziri Raul de la Nuez Ramires ilə görüşmüşdür.
Nazir Azərbaycan-Kuba münasibətlərinin çox dinamik və səmərəli inkişaf etdiyini, iki ölkə arasında perspektivli layihə və planların mövcudluğunu bildirmiş, Ticarət Palatasının prezidenti Raul Besseranın rəhbərlik etdiyi nümayəndə heyətinin Bakıya cari ilin mayında baş tutmuş səfərini xatırlatmış, səfər çərçivəsində keçirilən görüşlərin qarşılıqlı marağı əks etdirdiyini vurğulamışdır.
Səfir A.Mehdiyev bu fikirlə razılaşdığını və hökumətlərarası komissiyanın keçən ilin noyabrında keçirilmiş ilk iclasından sonra əməkdaşlıq haqqında hər iki ölkənin təqdim etdiyi sənədlərin “masa üstündə” olduğunu, komisiyanın bu ilin sonunda Bakıda keçiriləcək ikinci iclasında imzalanacağına əmin olduğunu qeyd etmişdir.
Görüşdə müxtəlif sahələrdə əməkdaşlığın perspektivləri müzakirə olunmuşdur.
Həmin gün Aqşin Mehdiyev Kubanın nüfuzlu Avropa Tədqiqatlar Mərkəzində çıxış etmişdir. Diplomat Azərbaycanın tarixi keçmişi, bugünkü nailiyyətləri, ölkəmizin apardığı uğurlu daxili və xarici siyasətin bəhrələri, ən ağrılı problemimiz olan Ermənistan-Azərbaycan, Dağlıq Qarabağ münaqişəsinin əsl səbəbləri, nəticələri, bu münaqişənin region və dünya üçün təhlükəsi haqqında ətraflı məlumat vermişdir. Səfir bir daha vurğulamışdır ki, Azərbaycan heç bir vəchlə öz ərazi bütövlüyünün pozulmasına yol verməyəcəkdir. Dünya birliyi ölkərəri də Azərbaycanın bu ədalətli mövqeyini dəstəkləyir. Bu ilin martında BMT-nin “Azərbaycanın işğal olunmuş ərazilərindəki vəziyyət” adlı qətnamənin böyük səs çoxluğu ilə qəbul edilməsi buna əyani sübutdur.
Aqşin Mehdiyev görüş iştirakçılarının suallarına cavab vermişdir.
Bölmənin digər xəbərləri
