AZƏRBAYCAN-TÜRKİYƏ BİZNES FORUMU
Yanvarın 8-də “Hyat Recensi -Naxçıvan” otelində Azərbaycan-Türkiyə biznes forumu keçirilmişdir.
Forumda respublikamızda işgüzar səfərdə olan Türkiyənin Ədalət və İnkişaf Partiyasının sədri Rəcəb Tayyib Ərdoğan və onu müşayiət edən nümayəndə heyətinin üzvləri, qardaş ölkənin Bakıda fəaliyyət göstərən iş adamları, Azərbaycanın hökumətinin üzvləri, iqtisadiyyatla məşğul olan qurumların rəhbərləri və məsul şəxsləri iştirak edirdilər.
Türkiyə-Azərbaycan Biznes Şurasının sədri Əli Yücel, Türkiyənin Odalar və Borsalar Birliyinin sədri Rifat Hisarcıklıoğlu, dost ölkənin Bakıdakı səfiri Əhməd Ünal Çeviköz forumda çıxış etdilər, Azərbaycan barədə ətraflı məlumat verdilər, müstəqillik qazandıqdan sonra Azərbaycanla Türkiyə arasında hər sahədə əlaqələrin sürətlə inkişaf etməsindən, türk iş adamlarının ölkəmizdəki fəaliyyətindən danışdılar. Bildirildi ki, indiyədək 50-dən çox türk firması tərəfindən Azərbaycanda 1,4 milyard dollar həcmində 126 layihə həyata keçirilmişdir. Əlaqələrimizdə ən önəmli yeri olan Bakı-Tbilisi-Ceyhan boru kəməri bölgəyə sülh, əmin-amanlıq və rifah gətirəcəkdir. Müstəqillikdən sonra ötən illərdə Azərbaycan siyasi problemlərlə üzləşsə də, iqtisadi islahatları davam etdirmiş və bu sahədə önəmli addımlar atmışdır. Ötən illərdə xarici sərmayəçilər üçün əlverişli şərait yaradılmışdır.
Natiqlər vurğuladılar ki, Azərbaycan hər baxımdan həm Türkiyə, həm ümumən dünya üçün önəmli bir ölkədir. Azərbaycanın Prezidenti Heydər Əliyevin liderliyi ilə mühüm nailiyyətlər qazanılmışdır. Azərbaycan Türkiyənin Orta Asiyaya açılan qapısı, Türkiyə isə Azərbaycanın Avropaya açılan qapısıdır. Təkcə bunun özü ölkələrimiz arasında əlaqələrin daha da möhkəmləndirilməsinin nə qədər zəruri olduğunu göstərir.
“Əsrin müqaviləsi”nin və Bakı-Tbilisi-Ceyhan layihəsinin memarı olan Prezident Heydər Əliyevin xidmətlərini yüksək qiymətləndirən natiqlər əminliklə bildirdilər ki, yeni enerji layihələrinin yaradıcısı olan Azərbaycan və Türkiyənin səyləri ilə ölkələrimiz bölgənin rifah, sülh və demokratiya adası olacaqdır.
Cənubi Qafqazda sülhün bərpasının Azərbaycanın ərazi bütövlüyünün təmin olunmasının vacibliyini, Ermənistan-Azərbaycan, Dağlıq Qarabağ münaqişəsinin ədalətli həllində Türkiyənin Azərbaycana hər zaman dəstək verəcəyini vurğulayan natiqlər türk iş adamlarını Azərbaycana sərmayə qoyuluşunu artırmağa çağırdılar.
Azərbaycanın iqtisadi inkişaf naziri Fərhad Əliyev forumda çıxışında respublikamız haqqında ümumi məlumat verdi, müstəqillik əldə etdikdən sonra ölkəmizin inkişafından, xarici sərmayələr üçün yaradılmış şəraitdən, Beynəlxalq Valyuta Fondu, Dünya Bankı və digər beynəlxalq maliyə təsisatları ilə əməkdaşlıqdan, regional miqyasda, habelə neft və qeyri-neft sektorunda həyata keçirilən layihələrdən danışdı.
Yoxsulluğun azaldılması və iqtisadi inkişafın təmin edilməsi üzrə Dövlət Proqramının hazırlandığını bildirən nazir Azərbaycan-Türkiyə iqtisadi əlaqələrinə də toxunaraq dedi ki, ötən il oktyabrın 15-də İstanbulda Azərbaycan Prezidenti Heydər Əliyevin Türkiyənin nüfuzlu iş adamları ilə görüşünün keçirilməsi əməkdaşlığımızın inkişafında yeni mərhələnin başlanmasına təkan verdi. Bu görüşdən sonra Türkiyənin bir sıra nüfuzlu iş adamları Bakıda səfərdə olmuşdur və hazırda elektroenergetika, kimya sahələrində layihələrin həyata keçirlməsi, emal müəssisələrinin təşkili, otel tikintisi, sərbəst iqtisadi zonaların yaradılması ilə bağlı danışıqlar aparılır. O, Azərbaycanda yeni sərmayə imkanlarından da söz açdı və iş adamlarını bir çox sahələr üzrə birgə əməkdaşlığa çağırdı.
Türkiyənin Ədalət və İnkişaf Partiyasının sədri Rəcəb Tayyib Ərdoğan qardaş Azərbaycanda keçirilən bu tədbirdə iştirak etməkdən məmnun olduğunu, ölkələrimiz arasındakı əlaqələrin qurulmasında və möhkəmləndirilməsində Prezident Heydər Əliyevin rolunu yüksək qiymətləndirdi, Türkiyənin həmişə Azərbaycan xalqının yanında olduğunu və bundan sonra da hər sahədə əlindən gələn dəstəyi göstərməyə hazır olduğunu bildirdi. O, Bakı-Tbilisi-Ceyhan boru xəttinin 2005-ci ildən tez tamamlanması arzusunu söyləyərək dedi ki, bunu erkən gerçəkləşdirmək bizim hökumətimizin istəyidir. Biz zamanla yarışmağa məcburuq.
Azərbaycan- Türkiyə iqtisadi əlaqələrində yeni üfüqlər açılmasının vaxti çatdığını söyləyən Rəcəb Tayyib Ərdoğan iş adamlarına müraciətlə dedi: Dünən axşam hörmətli Cümhur başqanı Heydər Əliyevlə söhbət edərkən bildirdim ki, türk iş adamları Azərbaycanda yatırımlarını artırmağı, bu sahədə Prezident Heydər Əliyevin onlara qucağını açmasını istəyirlər. Hörmətli cənab Heydər Əliyev qollarını açaraq, “mən qollarımı sona qədər açdım” dedi. İndi növbə sizlərindir, açılan bu qolların arasına girməlisiniz ki, təkrar sizi qucaqlasın və beləliklə, bu, baş tutsun”.
Forumda çıxış edən türk iş adamları bəzi problemələrə toxundular, onların aradan qaldırılması üçün tədbirlər görülməsinin zəruriliyini bildirdilər. Türkiyənin və Azərbayacnın məsul şəxsləri onların qaldırdıqları məsələlərin həlli istiqamətində görülən işlərdən danışdılar.
Baş nazirin müavini Abid Şərifov, xarici işlər naziri Vilayət Quliyev, yanacaq və energetika naziri Məcid Kərimov, mədəniyyət naziri Polad Bülbüloğlu, Azərbayanın Ankaradakı səfiri Məmməd Əliyev və digər rəsmi şəxslər forumda iştirak edirdilər.
Bölmənin digər xəbərləri
