Azərbaycan Xalq Cümhuriyyətinin 100 illiyinə həsr olunan müsabiqənin qalibləri mükafatlandırılıb
Bakı, 1 iyun, AZƏRTAC
Azərbaycan Milli Elmlər Akademiyası (AMEA) Aşqarlar Kimyası İnstitutunun (AKİ) Gənc Alim və Mütəxəssislər Şurası tərəfindən gənc tədqiqatçılar arasında keçirilən “Akademik Əli Quliyev mükafatı” və “Ən yaxşı elmi məruzə” müsabiqəsinin qalibləri mükafatlandırılıb.
AMEA-dan AZƏRTAC-a bildirilib ki, müsabiqə Azərbaycan Xalq Cümhuriyyətinin (AXC) yaranmasının 100 illik yubileyinə həsr edilib.
Tədbirdə çıxış edən AKİ-nin direktoru, akademik Vaqif Fərzəliyev bildirib ki, son illərdə AMEA-da gənclərin elmi-ictimai fəallığı güclənib, fəlsəfə və elmlər doktorluğu üzrə müdafiə edən alimlərin sayı artıb. V.Fərzəliyev AKİ-də çalışan gənc alim və mütəxəssisləri elmi tədqiqatlara həvəsləndirmək üçün keçirilən müsabiqələrin artıq ənənəvi hal aldığını söyləyib. O, bu cür müsabiqələrin gənc tədqiqatçıların maddi cəhətdən dəstəklənməsində, eyni zamanda, elmi məruzə etmək və məqalə yazmaq vərdişlərinə yiyələnmələrində mühüm rol oynadığını bildirib. Akademik artıq 5-ci dəfə keçirilən müsabiqənin özünü doğrultduğunu, ildən-ilə müsabiqəyə maraq göstərən gənclərin sayının artdığını, onların elmi məruzələrinin və təqdimatlarının keyfiyyətinin yüksəldiyini diqqətə çatdırıb.
AMEA-nın Gənc Alim və Mütəxəssislər Şurasının sədri, fizika üzrə fəlsəfə doktoru, dosent Famin Salmanov gənc tədqiqatçılar arasında sağlam elmi rəqabət yaratmaq baxımından müsabiqələrin çox uğurlu təcrübə olduğunu deyib. O, AMEA rəhbərliyinin təşəbbüsü ilə bu qurumda son illərdə gənc alimlər arasında keçirilən elmi müsabiqələrin sayının artdığını vurğulayıb. Qeyd edib ki, hazırda 35 yaşa qədər elmlər doktoru olan gənc alimlərə 5 min manat məbləğində pul verilir, eləcə də beynəlxalq nüfuzlu jurnallarda məqalələri dərc edilən gənc tədqiqatçılar ildə bir dəfə mükafatlandırılır.
Gənc Alim və Mütəxəssislər Şurasının sədri, kimya üzrə fəlsəfə doktoru, dosent Əfsun Sucayev çıxışında namizədlərin seçimi zamanı mövzunun aktuallığı, əldə olunan nəticələrin elmi və praktikliyi, məruzəçinin sualları cavablandırma səviyyəsi və mövzu ilə əlaqədar dərc etdirdiyi elmi əsərlər kimi meyarların əsas götürüldüyünü bildirib. O, “Akademik Əli Quliyev adına mükafat” və “Ən yaxşı elmi məruzə” müsabiqəsinin qaliblərinin seçimi zamanı ekspert dəyərləndirməsinin şəffaf aparıldığını vurğulayıb.
Tədbirdə, həmçinin Müsabiqə Komissiyasının üzvü Şahmərdan Əliyev qaliblərin seçilməsi meyarları və qiymətləndirmə, eləcə də gənc alimlərin məruzə təqdimatları barədə danışıb.
Sonda qaliblərə diplomlar təqdim olunub.
Müsabiqə üzrə Ekspertlər Şurası üzvlərinin qərarı ilə 10 saylı laboratoriyanın doktorantı Mənsurə Hüseynova I yerə, 7 saylı laboratoriyanın kiçik elmi işçisi Lalə Mahmudova və 3 saylı laboratoriyanın dissertantı Günay İsmayılova II yerə, 1 saylı laboratoriyanın kiçik elmi işçisi Xədicə Məmmədyarova və 11 saylı laboratoriyanın elmi işçisi Aida Yusifova III yerə, 7 saylı laboratoriyanın dissertantı Ulduz Cəfərova isə həvəsləndirici mükafata layiq görülüb.
Bundan əlavə, son bir ildə elmi nailiyyətlərinə görə 6 saylı laboratoriyanın dissertantı Könül Qəhrəmanova gənclər üçün “Akademik Əli Quliyev mükafatı” ilə təltif olunub.
Bölmənin digər xəbərləri
