Azərbaycan xalqı öz lideri ilə qürur duyur və onun ətrafında sıx birləşib
Bakı, 22 sentyabr AZƏRTAC
Azərbaycanın rəşadətli ordusunun Qarabağda qanunsuz erməni hərbi birləşmələrinə qarşı həyata keçirdiyi lokal antiterror tədbirləri xalqımız tərəfindən böyük qürur hissə qarşılanır. Qarabağda mövcud olan Ermənistan hərbi birləşmələri və qondarma rejimin qanunsuz silahlı dəstələri Azərbaycanın ərazi bütövlüyünə və suverenliyinə təhdid idi. Ordumuzun peşəkarlıqla həyata keçirdiyi antiterror tədbirləri nəticəsində qarşı tərəf qısa müddətdə ağ bayraq qaldırmağa məcbur oldu. Prezident İlham Əliyev sentyabrın 20-də xalqa müraciəti zamanı antiterror tədbirlərinin səbəb və məqsədləri barədə geniş məlumat verdi.
Bu fikirləri AZƏRTAC-a açıqlamasında Milli Məclisin Beynəlxalq münasibətlər və parlamentlərarası əlaqələr komitəsinin sədr müavini Sevinc Fətəliyeva deyib.
Deputat bildirib ki, son zamanlar erməni tərəfinin hərbi təxribatları xeyli artmışdı. Buna paralel olaraq Ermənistan və xarici havadarları guya Azərbaycanın Qarabağ ermənilərini “blokadada saxlaması” barədə beynəlxalq miqyasda qərəzli kampaniya aparırdılar. Lakin dövlətimiz bu yalanı konkret faktlarla ifşa edirdi. Qarabağda antiterror tədbirləri də məhz belə bir şəraitdə keçirildi. Bu, Prezidentimizin dəmir iradəsinin, qətiyyətinin və milli maraqlarımızı dönmədən qorumasının parlaq ifadəsidir. Xalqa müraciətində də Prezident qeyd etdi ki, beynəlxalq vasitəçilər antiterror tədbirlərinin hansı şərtlər əsasında dayandırılacağını soruşduqda cavab konkret olub. Dövlətimizin başçısı deyib: “Mən dedim ki, Ermənistan ordusunun bizim ərazimizdə qanunsuz məskunlaşmış birləşmələri silahları yerə qoymalı, tərk-silah olunmalı, bizim ərazimizdən tamamilə çıxarılmalıdır və eyni zamanda, bütün silahları və texnikaları təhvil verməlidirlər. Ancaq o təqdirdə Azərbaycan antiterror tədbirlərini dayandıra bilər. Əks təqdirdə sona qədər gedəcəyik və düşmən bizim gücümüzü də, qətiyyətimizi də yaxşı bilir”. Bundan sonra bizim şərtlərimiz qəbul edilib və bir neçə ay ərzində bizim nümayəndələrimizlə görüşdən imtina edən Qarabağda yaşayan erməni icmasının nümayəndələri Yevlax şəhərində görüşməyə də məcbur oldular. Prezidentimizin dediyi kimi, Azərbaycan hər zaman olduğu kimi, öz sözünə sadiqdir.
Sevinc Fətəliyevanın sözlərinə görə, dövlətimizin mövqeyi regionumuzda sülhün təmin olunmasından ibarətdir. Amma müəyyən beynəlxalq güclər var ki, gərginliyi saxlamağa çalışırlar. Prezident İlham Əliyev xalqa müraciətində bununla bağlı bildirdi ki, bu bölgə əsrlər boyu davalar, savaşlar məkanı olub və buna son vermək lazımdır. Dövlətimizin başçısı Azərbaycan və Ermənistanın öz aralarında olan məsələləri tənzimləyəcəyinə, sülh müqaviləsinin imzalayacağına və Cənubi Qafqaz ölkələri üçtərəfli formatda gələcək əməkdaşlıq haqqında işləməyə başlayacağına ümid etdiyini diqqətə çatdırdı. Vurğulandı ki, heç kim bizimlə diktə və ultimatum dilində danışa bilməz. Bu, müəyyən dairələrə ciddi mesajdır. Azərbaycan xalqı öz lideri ilə qürur duyur və onun ətrafında sıx birləşib.
S.Fətəliyeva Yevlax şəhərində baş tutan görüşün də əhəmiyyətli olduğunu vurğulayıb: “Məlumdur ki, sentyabrın 21-də Yevlax şəhərində Qarabağın erməni sakinləri ilə təmaslar üzrə müəyyən edilmiş məsul şəxs Ramin Məmmədov Qarabağın erməni sakinlərinin təmsilçiləri qismində Sergey Martirosyan və David Melkumyan ilə görüşüb. Görüşün müsbət atmosferdə keçirildiyi bildirilir. Bu çox yaxşı haldır. Çünki artıq Qarabağ erməniləri də reallıqları dərk etməyə başlayıblar. Erməni nümayəndələrin görüşdə sosial və humanitar xarakterli məsələlərin müzakirəsi kontekstində xüsusilə yanacağa ehtiyac duyulduğunu, eləcə də qida məhsulları da daxil olmaqla humanitar yardımın göstərilməsini xahiş etmələri də bunu təsdiqləyir. Onlar birdəfəlik anlamalıdır ki, Qarabağ Azərbaycan torpağıdır və dövlətimiz öz daxilində “boz zona”nın mövcudluğuna imkan verməyəcək. Qarabağ erməniləri bütün vətəndaşlarımız kimi bərabər hüquqlara malik olacaqlar. Çoxmillətli dövlət olaraq Azərbaycanda bütün xalqlar mehriban şəraitdə yaşayırlar. Bu mənada, Qarabağdakı erməni sakinlərimiz də bütün hüquqlardan istifadə edə biləcəklər”.
Bölmənin digər xəbərləri
