Bakı, 26 noyabr, AZƏRTAC

Azərbaycanın 12 gün ev sahibliyi etdiyi beynəlxalq iqlim konfransı - COP29 bir sıra yeniliklərlə yadda qaldı. Bu mötəbər tədbiri ölkəmizdə yaşıl enerji infrastrukturunun yaradılması və inkişaf etdirilməsi, yeni texnologiyaların cəlb olunması istiqamətində də böyük uğur saymaq olar. Düşünürəm ki, gələcəkdə Azərbaycan bu platformadan çıxış edərək yaşıl enerji texnologiyalarının digər ölkələrə sürətlə yayılmasına töhfə verə bilər. Bu baxımdan COP29 Azərbaycana siyasi nüfuzla yanaşı, iqtisadi cəhətdən də böyük uğur gətirdi.

Bu sözləri AZƏRTAC-a açıqlamasında Beynəlxalq Münasibətlərin Təhlili Mərkəzinin baş məsləhətçisi Şahmar Hacıyev söyləyib.

COP29-u miqyasına və iştirak edən ölkələrin sayına görə qlobal tədbir adlandıran siyasi ekspert bildirib ki, Azərbaycan bu tədbiri layiqincə başa çatdırdı: “Bildiyimiz kimi, tədbir keçirilməzdən əvvəl də, tədbir zamanı da ölkəmizə qarşı çirkin qarayaxma kampaniyaları aparıldı, hətta boykota çağırıldı. Bütün bu çağırışlar nəticəsiz oldu. COP29-da ən uğurlu nəticə kimi 300 milyard ABŞ dolları məbləğində iqlim dəyişikliyi üzrə təklif olunan paket qəbul olundu. Bu da doğrudan da, böyük naliyiyyətdir. 100 milyard ABŞ dollarının məbləği 300 milyard ABŞ dollarına çatdırılıdı. Tədbir başlamazdan əvvəl ekspertlər deyirdilər ki, COP29 maliyyə COP-u olacaq. Həqiqətən də biz gördük ki, COP29 maliyyə baxımından olduqca önəmli tədbir oldu və bu paketin qəbul edilməsi gələcəkdə inkişaf etməkdə olan ölkələrə iqlim dəyişikliyi ilə mübarizədə kömək göstərəcək”.

Azərbaycanın yaşıl enerjiyə keçidin inkişafı ilə bağlı təkliflərinin həm ölkəmizdə, həm də regionda bu prosesi sürətləndirəcəyini vurğulayan ekspert deyib: “Xüsusilə Azərbaycan üçün bu, böyük önəm daşıyır, çünki hazırda biz yaşıl enerji layihələri həyata keçiririk. Regionda yaşıl enerji ilə bağlı elmi araşdırmaların aparılması, layihələrin həyata keçirilməsi ilə bağlı müqavilələr imzalandı. Bu da Azərbaycanın yaşıl enerjiyə keçidini sürətləndirməyə kömək edəcək. Alternativ və bərpaolunan enerji mənbələrinin səviyyəsini daha da artıracaq”.