AZƏRBAYCAN YAZIÇISININ SATİRALARI TÜRK DİLİNDƏ
Xeyrəddin Qoca ədəbiyyata 70-ci illərdə gəlmişdir. O, satirik hekayələrdən ibarət bir neçə kitabın müəllifidir. Bu satiralarda cəmiyyətdəki eybəcərliklər, çatışmazlıqlar, nöqsanlar bütün çılpaqlığı ilə oxuculara təqdim olunur və nəticə çıxarmaq onların öz ixtiyarına buraxılır. Bu isə Xeyrəddin Qocanı orijinal satirik yazıçı kimi başqalarından fərqləndirən əsas xüsusiyyətlərdən biridir.
Yazıçının bir neçə illik ədəbi fəaliyyətinin nəticəsi olan satiralar toplusu - “Bu dünyadan məktublar...” adı ilə bu günlərdə Türkiyədə çap edilmişdir. Bu, Azərbaycan yazıçısının türk oxucuları ilə ilk görüşüdür. Kitabda 200-dən çox satirik hekayə toplanmışdır.
Kitab doktor Camal Anadolun ön sözü ilə açılır. Türkiyəli professor “Azərbaycanın Əziz Nesini” adlandırdığı Xeyrəddin Qocanın satiraları barədə yazır: “Dəyərli yazarın satirası ibrətamiz fikirlərlə doludur və düşündürücüdür. Bu fikirlərin çoxu Türkiyə xalqına asanlıqla uyğunlaşa biləcək bir dəyər daşıyır. Dost və qardaş Azərbaycanın bu satirik yazıçısı ölkəsinin insanlarının üzləşdiyi müxtəlif sosial problemləri mükəmməl şəkildə qələmə alaraq oxucularının diqqətinə çatdırır...”
Türkiyəli professor əmin olduğunu bildirir ki, Azərbaycan ədəbiyyatında xüsusi yeri olan, əsərləri həsrətlə gözlənilən Xeyrəddin Qoca yaradıcılığı türk oxucuları tərəfindən də eyni istək və sevgi ilə qarşılanacaqdır.
Kitabı Türkiyədəki Bilgə Karınca nəşriyyatı nəfis şəkildə çapdan buraxmışdır.
Bölmənin digər xəbərləri
