Avqustun 9-da Milli Olimpiya Komitəsinin (MOK) prezidenti, ARDNŞ-in birinci vitse-prezidenti, Milli Məclisin deputatı İlham Əliyev Almaniyanın Münxen şəhərində  kişilər və qadınlar arasında cüdo üzrə keçirilmiş dünya çempionatında yüksək nəticələr göstərmiş Azərbaycan idmançıları və onların məşqçiləri ilə görüşmüşdür.

Görüşdə Iyulun 21-dən 26-dək davam edən dünya çempionatiında bürünc medallarqazanmış Elxan Rəcəbli, Rəsul Səlimov və beşinci yeri tutmuş Elçin İsmayılov, Azərbaycan cüdo federasiyasının prezidenti Füzuli Məmmədov,cüdo üzrə Azərbaycan yığma komandasının baş məşqçisi Ağayar Axundzadə, məşqçilər Hacı Hacıəhmədov və Nazim Hüseynov iştirak edirdilər.

Füzuli Məmmədov onları qəbul etdiyinə görə MOK-un prezidenti İlham Əliyevə minnətdarlığını bildirərək, idmançılarımızın dünya çempionatındakı uğurlu çıxışları barədə qısa hesabat verdi. O dedi ki, son səkkiz il ərzində ilk dəfədir ki, Azərbaycan cüdoçuları dünya çempionatında iki medal qazanmışlar. 92 ölkədən 625 idmançının iştirak etdiyi bu yarışda ölkəmizi təmsil edənlər  kişilər arasında 14-15-ci, ümumi hesabda isə 21-22-ci yerləri tutmuşlar. Federasiyanın başçısı beynəlxalq yarışlarda respublikamızın qazandığı müvəffəqiyyətləri MOK-un prezidentinin idmançılara bilavasitə qayğısının nəticəsi kimi qiymətləndirdi.

Milli Olimpiya Komitəsinin prezidenti  İlham Əliyev  idmançıları   və onların məşqçilərini təbrik edərək dedi:

- Mən sizinlə çoxdan görüşmək isstəyirdim. Amma müəyyən səbəblərə görə bu, alınmırdı.

Sizinlə çempionatdan əvvəl görüşmək istəyirdim. Sonra qərara gəldim ki, çempionatdan sonra görüşək. Mən doğrudanda çox şadam ki, Azərbaycanda cüdo çox yüksək səviyyədə inkişaf edir. Bu, bizim üçün ənənəvi idman növü deyildir. Deyə bilərəm ki, bəlkə 10, ya 15 il bundan qabaq Azərbəycanda görkəmli cüdo ustaları mövcud idi. Bizim ilk nailiyyətimizi Nazim Hüseynov göstərmişdir. O, olimpiya çempionudur və bilirsiniz ki, Milli Olimpiya Komitəsinin icraiyyə komitəsinin üzvüdür. Olduqca sevindirici haldır ki, Azərbaycanda cüdo çox inkişaf edibdir. Hazırda bizim çox gözəl, perspektivli gənc idmançılarımız var. Sidney olimpiadasında mən belə fikrə gəldim ki, Azərbaycan cüdoçuları gələcəkdə dünya, olimpiya çempionları ola bilərlər.

Çox sevindirici haldır ki, olimpiadadan sonra, 2001-ci ildə artıq bizim idmançılarımız Azərbaycana bir neçə medal gətiriblər. Avropa çempionatından Elçin və Rəsul qızıl və gümüş medal gətirdilər. Eyni zamanda dünya çempionatından iki bürünc medal gətirdilər. Nəzərə alsaq ki, bu medalları gətirən adamlar çox gəncdirlər, ümid edə  bilərik ki, gələcəkdə çempionatlarda, xüsusilə Afinada keçiriləcək olimpiadada da Azərbaycan bayrağı qaldırılacaqdır.

Bütün bunlar onu göstərir ki, Azərbaycanda artıq güclü cüdo məktəbi  mövcuddur. Mən çox şadam ki, bu nailiyyətləri öz gücümüzün hesabına əldə etmişik. Həm bizim idmançılarımız Azərbaycanda yaşayan, Azərbaycanda doğulmuş və böyümüş insanlardır, həm də məşqçilər yerli məşqçilərdir. Biz  Sidneydə belə bir mənzərə ilə üzləşdik ki, bəzi inkişaf etmiş ölkələr medal naminə idmançıları xaricdən gətirirlər və onları öz komandalarına daxil edirlər. Beləliklə, yəqin ki, öz reytinqlərini qaldırmaq istəyirlər. Ancaq bizdə cüdoda vəziyyət tamamilə başqadır. Biz öz yerli kadrlarımızla böyük nailiyyətlər əldə etmişik.

Biz Elçinin və Rəsulun qələbələrinə artıq alışmışıq. Bu, bir növ ənənəvi xarakter alıbdır və deyə bilərəm ki, onlar öz məharətiləri ilə bizi ona alışdırıblar ki, hər bir yarışda onlardan medal gözləyirik. Hər kəs bunu təbii hesab edir. Halbuki Avropa və dünya çempionatlarında medal qazanmaq çox böyük uğurdur, böyük nailiyyətdir.

Xüsusilə cüdo kimi idman növündə, hansı ki, bir gün ərzində idmançılar azı 4-5 dəfətatami üzərinə çıxırlar. Əlbəttə ki, bu, həm fiziki, həm də mənəvi yükdür. Çox şadam ki, idmançılarımız həm fiziki cəhətdən, həm də mənəvi cəhətdən çox hazırlıqlılar.

Bu gün Elxan da buradadır. Səhv etmirəmsə, Elxan birinci dəfədir ki, beləbeynəlxalq yarışda iştirak edirdi. Onun debütü çox uğurlu oldu. Bu onu göstərir ki, Azərbaycanda bir neçə güclü idmançı var.

Əlbəttə, bu qələbələr bizi arxayın etməməlidir. Biz əldə edilmiş nailiyyətlərlə kifayətlənməməliyik. Bilirəm ki, siz də bu fikirdəsiniz. Bütün imkanlarımızı ona yönəltməliyik ki, Azərbaycan cüdoçularıgələcəkdə də müxtəlif beynəlxalq yarışlarda yüksək yerləri tuta bilsinlər.

 May ayında Avropa cüdo federasiyasınınprezidenti cənab Vizirburada idi. Biz onunla görüşdük. Deyə bilərəm ki, o, Azərbaycanda cüdonun vəziyyətindən çox razı qalmışdı və bildirmişdi ki,  öz tərəfindən bizə kömək göstərəcəkdir. Indi çempionatda bu nə dərəcədə öz əksini tapıbdır, mən deyə bilmərəm. Amma hər halda biz həmişə çalışmışıq ki, beynəlxalq idman qurumları ilə, təkcə beynəlxalq olimpiya komitəsi ilə yox, Avropa olimpiya komitəsi ilə, - bilirsiniz ki, o, Azərbaycana çox böyük hörmət göstərir, - eyni zamanda müxtəlif beynəlxalq federasiyalarla işlər aparaq. Deyə bilərəm ki, Əbülfəz müəllim ilə birlikdəbiz dünyanın müxtəlif ölkələrində bir sıra beynəlxalq federasiyalarda olmuşuq. Hesab edirik ki, bu əlaqələr məhz federasiyalar səviyyəsində olmalıdır.

Eyni zamanda cüdo federasiyası da bu sahədə çox böyük işlər görür və cənab Vizir  mənə məlumat vermişdi ki, sizinlə çox gözəl əlaqələr yaranıbdır. Bu əlaqələri gücləndirmək lazımdır və artıq Azərbaycan beynəlxalq idman aləmində öz layiqli yerini tuta bilibdir.

Olimpiadadan sonra bizimlə görüşən bütün idman rəhbərləri, o cümlədən cənab Samaranç, Beynəlxalq Olimpiya Komitəsinin yeni seçilmiş prezidenti cənab Roq bizi ürəkdən təbrik edirlər və deyirlər  çox şadıq ki, son illər ərzində Azərbaycanda idman sahəsində olan müsbət dəyişikliklər öz məntiqi nəticəsini veribdır. Yəni məntiqi nəticə də medaldır. Biz nə qədər çalışsaq, nə qədər şərait yaratsaq, yaxud da işlər görsək, əsas nəticə çempionatların və olimpiadaların medallarıdır. Yenə də deyirəm, şadam ki, bizim tərəfimizdən, uşaqlar və məşqçilər tərəfindən çox böyük işlər görülür vəhamı bir nöqtəyə vurur. Ona görə mən sizin hamınızı - federasiyanı, məşqçiləri və idmançıları bir daha ürəkdən təbrik edirəm. Güman edirəm ki, belə gözəl görüşlərimizi, yəni qələbə ilə bağlı görüşlərimizi gələcəkdə də bir neçə dəfə keçirəcəyik. Sağ olun.

                                       X            X          X

Azərbaycan yığma komandasının baş məşqçisi Ağayar Axundzadə, olimpiya və ikiqat çempionu Nazim Hüseynov idmançılara, cüdonun inkişafına göstərdiyi qayğıya görə Milli Olimpiya Komitəsinin prezidenti İlham Əliyevə təşəkkür etdilər. Onlar Almaniyada keçirilmiş sonuncu dünya çempionatının təşkili, gedişi, idmançılarımızın rəqibləri, keçirdikləri görüşlər və nailiyyətləri barədə məlumat verdilər, idmançılarımızın çox güclü cüdoçularla mübarizələrini yüksək qiymətləndirdilər və gələcəkdə keçiriləcək beynəlxalq əhəmiyyətli yarışlarda daha yüksək nəticələr göstərəcəklərinəəmin olduqlarını bildirdilər.

Nazim Hüseynov Beynəlxalq Cüdo Federasiyasının dünyanın ən yaxşı 50 cüdoçusu haqqında nəşr etdiyi kitabı MOK-un prezidenti İlham Əliyevə təqdim etdi. Həmin kitaba daxil edilmiş idmançılardan biri də Nazim Hüseynovdur. Bu, təkcə məşhur idmançımıza deyil, ümumən Azərbaycan cüdo məktəbinə verilən yüksək qiymətdir.

x       x      x

Gənclər, idman və turizm naziri, Milli Olimpiya Komitəsinin birinci vitse-prezidenti Əbülfəz Qarayev görüşdə çıxış edərək dedi ki, Azərbaycanda hər il görkəmli sərkərdə, iki dəfə Sovet İttifaqı Qəhrəmanı Həzi Aslanovun xatirəsinə həsr olunmuş ənənəvi cüdo turniri təşkil olunur və bu yarışlar yüksək səviyyədə keçir. Nazir bildirdi ki,  2003-cü ildə Bakıda cüdo üzrə Qran-pri yarışları keçiriləcəkdir.  

        MOK-un prezidenti  İlham Əliyev görüşə yekun vuraraq dedi:

        - Ümumiyyətlə, 2001-ci il Azərbaycan idmanı üçün çox uğurlu olubdur. Yəni həm cüdo, həm ağır atletika, həm də stend atıcılığı sahəsində. Mən ancaq idmanın olimpiya növlərini deyirəm. Məsələn, qeyri-olimpiya növlərini götürək  - Bakıda bodibildinq çempionatı keçirilmişdir, uşu, kinq-boks, karate üzrə idmançılarımızın çox yüksək nailiyyətləri vardır. Biz taekvandoçularımızı Sidneyə apara bilmədik. Onlar vəsiqə qazana bilməmişdilər. Bu da çox perspektivli idman növüdür və Azərbaycanda yaxşı gələcəyi ola bilər. Ona görə qərara gəldik ki, federasiyanı gücləndirək. Onların ilk çıxışları göstərir ki, biz düz etdik. Yəni artıq orada böyük perspektivlər var. Federasiyanın nümayəndələri bizə söz verirlər ki, növbəti olimpiadada bir neçə medal qazanacaqlar. Beləliklə, Azərbaycanda federasiyalar arasında rəqabət gedir ki, kim çox medal gətirə bilər.

        Mən sizi bir daha təbrik edirəm. Əminəm ki, siz gələcəkdə uzun illər hamımızı, Azərbaycan xalqını öz qələbələrinizlə sevindirəcəksiniz. Sağ olun.