İQTİSADİYYAT
Azərbaycanda ilin birinci yarısında 319 nəqliyyat vasitəsi özəlləşdirilib
Bakı, 7 iyul, AZƏRTAC
Əmlak Məsələləri Dövlət Xidməti tərəfindən hərraclar vasitəsilə dövlət əmlakının özəlləşdirilməsi ilə bağlı işlər davam etdirilir. Digər dövlət əmlakları ilə yanaşı, hərraclarda nəqliyyat vasitələrinin də satışı həyata keçirilir. Belə ki, cari ilin birinci yarımilliyində nəqliyyat vasitələrinin satışa çıxarıldığı 24 hərrac baş tutub.
Xidmətdən AZƏRTAC-a bildirilib ki, hərraclara çıxarılan 384 nəqliyyat vasitəsindən 319-u satılıb. Bu, ötən ilin eyni dövrü ilə müqayisədə 3,7 dəfə çoxdur. Nəqliyyat vasitələrinə olan sifarişlərin çoxluğu səbəbindən hərraclar daha rəqabətli olub. Bu ilin yanvar-iyun ayları ərzində nəqliyyat vasitələri üzrə ümumilikdə ilkin satış qiyməti 1 milyon 269 min 425 manat olsa da, rəqabətli hərrac nəticəsində bu, 1 milyon 620 min 911 manat təşkil edib. Başqa sözlə, təklif ilkin satış qiymətindən 351 min 486 manat çox olub.
Cari ilin ilk 6 ayı ərzində nəqliyyat vasitələrinin hərracından dövlət büdcəsinə 1,22 milyon manat vəsait daxil olub. Bu rəqəm ötən ilin eyni dövrü ilə müqayisədə 4,8 dəfə çoxdur.