AZƏRBAYCANDA UKRAYNA MƏDƏNİYYƏTİ GÜNLƏRİ BAŞLANDI
Mayın 23-də Azərbaycanda Ukrayna mədəniyyəti günləri başlanmışdır.
Ukraynalı qonaqlar əvvəlcə Şəhidlər xiyabanını ziyarət edərək, vətənimizin azadlığı, müstəqilliyi uğrunda canlarından keçmiş cəsur Azərbaycan övladlarının xatirəsini ehtiramla andılar.
Nümayəndə heyətinin rəhbəri, Ukraynanın mədəniyyət naziri Yuri Boqutski “Əbədi məşəl” abidəsinin önünə əklil qoydu.
Sonra qonaqlar R.Mustafayev adına Dövlət İncəsənət Muzeyinin həyətinə gələrək, Natəvanın, Üzeyir Hacıbəyovun və Bülbülün burada saxlanılan abidələri önünə gül-çiçək qoydular. Azərbaycanın mədəniyyət naziri Polad Bülbüloğlu məlumat verdi ki, vaxtilə abidələr bu böyük insanların vətənində - Azərbaycan şəhəri Şuşada ucaldılmışdı. Bu şəhər Ermənistan silahlı birləşmələri tərəfindən işğal olunduqdan sonra abidələr gülləbaran edilmişdir. O vaxt Azərbaycan hökuməti xəbər tutdu ki, ermənilər bu abidələri metal kimi əritməyə göndərmək istəyirlər. Lakin vasitəçilərin köməyi ilə abidələr alındı və həmin vaxtdan burada saxlanılır.
Elə həmin gün Muzey mərkəzində iki ölkənin mədəniyyət nazirləri arasında əməkdaşlıq protokolu imzaladılar. İmzalanma mərasimindən sonra keçirilən mətbuat konfransında nazirlər vurğuladılar ki, ölkələrimiz arasında dostluq münasibətləri mövcuddur. Ukrayna Prezidenti Leonid Kuçmanın və Azərbaycan Prezidenti Heydər Əliyevin şəxsi dostluğu bu münasibətlərə xüsusi əhəmiyyət verir. Artıq ənənəyə çevrilən mədəniyyət günləri dostluq tarixinin böyük kökləri olan iki xalqı daha da yaxınlaşdırır.
Mətbuat konfransında bildirildi ki, mədəniyyət günləri çərçivəsində Bakıda iki sərgi açılacaq, Ukrayna incəsənət ustalarının konsertləri olacaqdır.
Sonra Səttar Bəhlulzadə adına Dövlət Sərgi Salonunda Ukrayna dekorativ - tətbiqi sənət əsərləri sərgisinin açılışı oldu.
Sərgidə ölkənin ən böyük incəsənət muzeyi olan Ukrayna Xalq Dekorativ - Tətbiqi Sənət Muzeyinin zəngin kolleksiyasından gətirilmiş eksponatlar münayiş etdirilir.
100 illik tarixi olan muzeydə Ukraynanın XV-XXI əsrlərə aid xalq və dekorativ - tətbiqi sənət əsərlərinin 75 mindən çox nümunəsi saxlanılır. Burada Ukraynanın bütün regionlarını təmsil edən sənət nümunələri nümayiş etdirilir. Ukraynanın xalq rəssamı Katerina Belokurun mənzərə əsərləri isə muzey kolleksiyasının inciləri sayılır.
Ekspozisiyada Çerniqov, Poltava və İvano-Frankovsk vilayətlərinin XIX əsrə və XX əsrin əvvəlinə aid xalq geyimlərinin 4 dəsti nümayiş etdirilir. Sərgidə təmsil olunmuş tətbiqi sənət növlərindən biri də xalçaçılıqdır. Yüzilliklər ərzində bu sahədə vahid milli üslub formalaşmışdır.
X X X
Həmin gün Dövlət Musiqili Komediya Teatrında Azərbaycanda Ukrayna mədəniyyəti günlərinin təntənəli açılış mərasimi oldu.
İki ölkənin dövlət himnləri səsləndi.
Azərbaycanın mədəniyyət naziri Polad Bülbüloğlu və Ukraynanın mədəniyyət naziri Yuri Boqutski mərasimdə çıxış edərək vurğuladılar ki, belə tədbirlərin keçirilməsi xalqlarımızın adət və ənənələrini daha yaxından öyrənməyə imkan verir. Ötən il Ukraynada keçirilən Azərbaycan mədəniyyəti günləri çoxəsrlik dostluq münasibətləri olan xalqlarımızın mədəni həyatında böyük hadisəyə çevrildi. Ukrayna və Azərbaycan müstəqillik əldə etdikdən sonra bu münasibətlər xüsusi əhəmiyyət kəsb etmişdir. Nazirlər vurğuladılar ki, Ukrayna Prezidenti Leonid Kuçma ilə Azərbaycan Prezidenti Heydər Əliyevin şəxsi dostluğu bu münasibətlərə böyük təkan vermişdir.
Yuri Boqutski Ukrayna Prezidenti Leonid Kuçmanın Mədəniyyət günlərinin iştirakçılarına təbrik məktubunu oxudu.
Açılış mərasiminin sonunda Ukraynanın xalq artisti Viktor Qutsalanın idarəsi ilə Ukrayna Milli xalq çalğı alətləri orkestrinin və Ukrayna incəsənət ustalarının konserti oldu.
Baş nazirin birinci müavini Abbas Abbasov, baş nazirin müavini Elçin Əfəndiyev, Ukraynanın Bakıdakı səfiri Boris Aleksenko, Azərbaycanın Kiyevdəki səfiri Tələt Əliyev açılış mərasimində iştirak edirdilər.
Foto İlqar Cəfərovundur
Bölmənin digər xəbərləri
