Azərbaycanın uğurları Prezident İlham Əliyevin uzaqgörən diplomatik addımlarının nəticəsidir - ŞƏRH
Bakı, 21 dekabr, AZƏRTAC
Dünya nizamının yenidən formalaşdığı bir mərhələdə qlobal sistemdə kəskin təlatümlər və qarşıdurmalar yaşanır. Hətta bir çox bölgələrdə dövlətlərarası münasibətlərdəki gərginliklər aktiv münaqişə həddinə çataraq ciddi təhlükəsizlik problemləri yaratmağa davam edir. Qlobal institutların və güc mərkəzlərinin münaqişələrin nizamlanması ilə bağlı təsir mexanizmlərini tamamilə itirdiyi bir mərhələdə Azərbaycan təkbaşına işğala son qoyaraq münaqişəni bitirən yeganə dövlətdir. Heç şübhəsiz ki, ölkəmizin bu uğurları Prezident İlham Əliyevin müdrik siyasətinin və uzaqgörən diplomatik addımlarının nəticəsidir. Dövlətimizin başçısı bütün cəbhələrdə olduğu kimi, informasiya məkanında da milli maraqlarımızın qorunmasını, Azərbaycan həqiqətlərinin və xarici siyasət prioritetlərimizin aydın şəkildə ifadə edilməsini təmin edir. Prezident İlham Əliyevin yerli və xarici media qurumlarına verdiyi bütün müsahibələri, eləcə də “Rossiya Seqodnya” Beynəlxalq İnformasiya Agentliyinin Baş direktoruna müsahibəsi bütövlükdə çox mühüm mesajları özündə ehtiva edir. Müsahibə zamanı Prezident İlham Əliyev Azərbaycanın xarici siyasət prioritetlərindən, Azərbaycan-Rusiya əlaqələrinin önəmindən, regional və qlobal sistemdə baş verən hadisələrdən, davam edən sülh danışıqlarının indiki mərhələsindən və eləcə də, Azərbaycanın yüksələn nüfuzundan ətraflı şəkildə bəhs edərək, geniş təhlillər aparıb.
Bu sözləri AZƏRTAC-a açıqlamasında politoloq Aytən Qurbanova söyləyib.
O bildirib ki, Rusiya ilə əməkdaşlığımızın önəmini vurğulayan dövlətimizin başçısı 2022-ci il fevralın 22-də imzalanmış “Azərbaycan Respublikası ilə Rusiya Federasiyası arasında müttəfiqlik qarşılıqlı fəaliyyəti haqqında Bəyannamə”ni mühüm siyasi addım kimi dəyərləndirdi. İkitərəfli münasibətlərdəki müsbət dinamikanın gələcək dönəmlərdə də inkişaf edəcəyinə əminliyini ifadə etdi. Müstəqil xarici siyasət prioritetlərinə və heç bir hərbi-siyasi blokda təmsil olunmamaqla balanslı siyasi kursa sahib olan Azərbaycan Respublikasının qlobal sistemdəki rolu hər gün bir az daha möhkəmlənməyə davam edir. İkinci Qarabağ müharibəsində əldə edilmiş qələbənin diplomatik platformada qətiyyətli şəkildə davam etdirilməsi Azərbaycan üçün yeni imkanlar formalaşdırmış oldu. Bu imkanlardan uğurlu şəkildə istifadə edərək, beynəlxalq sistemdəki rolunu daha da gücləndirən Azərbaycan, eyni zamanda, qarşılaşdığı təhdidlərə münasibətdə də kifayət qədər praqmatik və adekvat addımlar atmağa davam edir. Sivilizasiyalar və fərqli qütblər arasında balanslı siyasət yürüdən Azərbaycan müstəqil aktor olaraq ədalətə və beynəlxalq hüquqa əsaslanan milli maraqlarının müdafiəsini prioritet qəbul edir.
Politoloqun sözlərinə görə, ölkəmizin hədəfləri böyüdükcə əlaqələri də genişlənir. Yeni tərəfdaşlarla yanaşı, əzəli dost və müttəfiq olduğumuz dövlətlərlə münasibətlərimiz də möhkəmlənməyə davam edir. Heç şübhəsiz ki, bu dövlətlər sırasında dost və qardaş ölkə olan Türkiyə ilə münasibətlərimiz ilk sırada dayanır. Təbii ki, Azərbaycan-Türkiyə əlaqələrinin inkişaf dinamikası dostlarımızı sevindirdiyi kimi, düşmənlərimizi də məyus edir. Ona görə də, iki dövlət arasındakı münasibətləri hədəf alan əsassız iddialar və qərəzli məlumatlara hər zaman rast gəlmək mümkün olur.
“Prezident İlham Əliyevin müsahibə zamanı ilk dəfə səsləndirdiyi məsələlərdən biri də sülh danışıqlarında Ermənistan ilə razılaşdırılmamış iki bəndlə bağlıdır. Bu məsələ uzun müddətdir müzakirə edilsə də, açıq şəkildə hansı bəndlərə dair fikir ayrılıqlarının olması ilə bağlı məlumat verilməmişdi. Təqribən üç il ərzində davam edən danışıqlar prosesində sülh müqaviləsində əks olunacaq 17 maddədən 15-i ilə bağlı artıq razılıq edilib. Razılaşdırılmamış iki maddənin məzmunu ilə bağlı heç bir rəsmi məlumat verilməmişdi. Azərbaycan Prezidenti ilk dəfə bu məsələyə aydınlıq gətirərək, razılaşdırılmamış iki maddə və Ermənistan tərəfinin həyata keçirməli olan iki məqam haqqında məlumat vermiş oldu. İlk məqam təbii ki, Ermənistan Konstitusiyasına dəyişiklik edilməsi ilə bağlıdır. Çünki Konstitusiyaya dəyişiklik edilmədən imzalanacaq sülh müqaviləsi heç bir halda davamlı sülhün zəmanəti ola bilməz. Ümumiyyətlə, heç bir dövlət ali qanun hesab olunan Konstitusiyasında və ya dövlət rəmzlərində başqa suveren dövlətlərin ərazisinə iddia ifadə edə bilməz. Bu, beynəlxalq hüququn bütün norma və prinsiplərinə zidd olmaqla yanaşı, birbaşa işğalçılıq ideologiyasının təbliğidir. İkinci ən əsas məqam ATƏT-in Minsk qrupunun ləğv edilməsi ilə bağlıdır. Belə ki, Minsk qrupunun yaranma səbəbi münaqişənin sülh yolu ilə həllinə nail olmaq idi. Təəssüflər olsun ki, 27 ilə yaxın davam edən danışıqlar dövründə bu istiqamətdə heç bir real addım atılmadı və tamamilə əksinə olaraq, bu qrup işğalçının “himayə çətirinə” çevrildi. 44 günlük Vətən müharibəsindən sonra Azərbaycan öz ərazi bütövlüyünün bərpa olunmasına təkbaşına nail oldu və bu gün Minsk qrupunun mövcudluğuna heç bir zərurət yoxdur. Ancaq bu məsələ konsensusla həll edildiyinə görə Ermənistanın razılığı mütləq xarakter daşıyır. Əgər Ermənistan həqiqətən də sülh istəyirsə, mütləq şəkildə Azərbaycanın bu tələbləri yerinə yetirilməlidir. Əks halda “Ermənistan+” qüvvələrin sülhü imitasiya oyunu və paralel şəkildə Ermənistanı silahlandırma prosesi heç bir halda bizi davamlı sülhə apara bilməz”, - deyə A.Qurbanova vurğulayıb.
Bölmənin digər xəbərləri
